യുവതിയെ മക്കളുടെ മുന്നിൽ തോക്കു ചൂണ്ടി ബലാത്സംഗം ചെയ്തു; പാകിസ്ഥാനിലെ സോഷ്യൽ മീഡിയയിൽ വൻ പ്രതിഷേധം

ലാഹോർ: കാറ് കേടായതിനെ തുടർന്ന് വഴിയിലായ യുവതിയെ തോക്കു ചൂണ്ടി പീഡിപ്പിച്ചു. പാകിസ്ഥാനിലെ ലാഹോർ- സിയാൽകോട്ട് മോട്ടോർവേയില്‍ സെപ്തംബര്‍ 9നാണ് സംഭവം ഉണ്ടായത്.

വാഹനം കേടായതിനെ തുടർന്ന് സഹായം അഭ്യർഥിച്ച് നിൽക്കുകയായിരുന്ന യുവതിയെ രണ്ടുപേർ ചേർന്നാണ് പീഡനത്തിനിരയാക്കിയത്.

മൂന്ന് കുട്ടികളുടെ അമ്മയായ സ്ത്രീയാണ് പീഡനത്തിനിരയായത്. മക്കളുടെ മുന്നില്‍വെച്ചാണ് യുവതിയെ പ്രതികൾ പീഡനത്തിനിരയാക്കിയത്.

സംഭവം പുറത്തറിഞ്ഞതോടെ ട്വിറ്ററിൽ സ്ത്രീ സുരക്ഷ ആവശ്യപ്പെട്ട് നെറ്റിസൺസ് രംഗത്തെത്തി. അതേസമയം കേസിൽ പ്രതികളെന്ന് സംശയിക്കുന്ന 12 പേരെ പൊലീസ് അറസ്റ്റ് ചെയ്തതായി പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.

പഞ്ചാബ് പ്രവിശ്യയിലെ ഗുജ്ജർപുര ഏരിയയിലുള്ള ലാഹോർ-സിയാൽകോട്ട് മോട്ടോർവേയിലാണ് സംഭവം ഉണ്ടായത്. ഇവിടത്തെ ടോൾപ്ലാസ കഴിഞ്ഞതും ഇന്ധനം ഇല്ലാതിരുന്നതിനെ തുടർന്ന് കാർ നിന്നു.

അതിനിടെ ഗുജ്രൻവാലയിലുള്ള ബന്ധു യുവതിയോട് പൊലീസ് ഹെൽപ് ലൈനിൽ സഹായം അഭ്യർഥിക്കാൻ ആവശ്യപ്പെട്ടു. ഇയാൾ യുവതിയെ സഹായിക്കാനായി പുറപ്പെടുകയും ചെയ്തു.

സ്ത്രീ പറഞ്ഞ സ്ഥലത്തെത്തിയപ്പോൾ ബന്ധു കണ്ടത് രക്തം പുരണ്ട വസ്ത്രത്തിൽ പരിഭ്രാന്തയായി നിൽക്കുന്ന സ്ത്രീയെയായിരുന്നു.

ആയുധധാരികളായ രണ്ടുപേർ സ്ത്രീയെയും കുട്ടികളെയും കാണുകയും തോക്കു ചൂണ്ടി ഇവരെ അടുത്തുള്ള പാടത്തേക്ക് കൊണ്ടുപോയികൂട്ടമാനഭംഗത്തിനിരയാക്കുകയായിരുന്നുവെന്നാണ് പൊലീസ് പറയുന്നത്.

പ്രതികളെ കണ്ടെത്തുന്നതിനായി പ്രത്യേക അന്വേഷണ സംഘം രൂപീകരിച്ചിട്ടുണ്ട്. 12പേരെ ഇതുവരെ അറസ്റ്റ് ചെയ്തിട്ടുണ്ടെന്നും തെരച്ചിൽ തുടരുകയാണെന്നും പാകിസ്ഥാൻ പൊലീസ് പറഞ്ഞതായി മാധ്യമങ്ങൾ റിപ്പോർട്ട് ചെയ്യുന്നു. വേണ്ട നടപടികൾ പൊലീസ് സ്വീകരിച്ചിട്ടുണ്ടെന്ന് മാധ്യമങ്ങൾ വ്യക്തമാക്കുന്നു.

അതേസമയം സംഭവത്തില്‍ ഓൺലൈനിലും പ്രതിഷേധം ശക്തമായിരിക്കുകയാണ്. ഇരയ്ക്ക് നീതി ആവശ്യപ്പെട്ടും രാജ്യത്ത് സ്ത്രീ സുരക്ഷ ആവശ്യപ്പെട്ടുമാണ് പ്രതിഷേധം.