പൗരത്വ ഭേദഗതി നിയമം; ചൊവ്വാഴ്ചത്തെ ഹര്‍ത്താല്‍ നിയമവിരുദ്ധമെന്ന് പൊലീസ്

കാസര്‍കോട്: പൗരത്വ നിയമ ഭേദഗതിക്കെതിരെ ചൊവ്വാഴ്ച ആഹ്വാനംചെയ്ത ഹര്‍ത്താല്‍ നിയമവിരുദ്ധമാണെന്ന് കാസര്‍കോട് ജില്ലാ പോലീസ് മേധാവി. എസ്.ഡി.പി.ഐ., വെല്‍ഫെയര്‍ പാര്‍ട്ടി, ബി.എസ്.പി., കേരളാ മുസ്ലിം യുവജന ഫെഡറേഷന്‍, സോളിഡാരിറ്റി, എസ്.ഐ.ഒ., ജനകീയ മനുഷ്യാവകാശപ്രസ്ഥാനം, പോരാട്ടം എന്നീ സംഘടനകളുടെ സംയുക്തയോഗ തീരുമാനമാണെന്ന നിലയിലാണ് ഹര്‍ത്താല്‍ ആഹ്വാനം പ്രചരിക്കുന്നത്.

ഹര്‍ത്താല്‍ നടത്തണമെങ്കിൽ സംഘടനകൾ ഏഴുദിവസംമുമ്പ് നോട്ടീസ് നല്‍കണമെന്ന് ഹൈക്കോടതി ഉത്തരവുണ്ട്. എന്നാൽ ഇതുവരെ ഒരു സംഘടനയും ഇത്തരത്തിൽ നോട്ടീസ് നൽകിയിട്ടില്ലെന്ന് പൊലീസ് വ്യക്തമാക്കി.

ചൊവ്വാഴ്ച ജില്ലയിൽ ഹര്‍ത്താല്‍ നടത്തുകയോ അനുകൂലിക്കുകയോ ചെയ്താല്‍ ഇതിന്റെ ഭാഗമായുണ്ടാകുന്ന എല്ലാ കഷ്ടനഷ്ടങ്ങള്‍ക്കുമുള്ള ഉത്തരവാദിത്വം ഈ സംഘടനകളുടെ ജില്ലാ നേതാക്കള്‍ക്കായിരിക്കുമെന്ന് ജില്ലാ പൊലീസ് മേധാവി വ്യക്തമാക്കി.

ചൊവ്വാഴ്ച നടക്കുന്ന നഗരസഭാ, പഞ്ചായത്ത് ഉപതിരഞ്ഞെടുപ്പുകളില്‍ പൊതുജനങ്ങള്‍ക്ക് വോട്ടവകാശം വിനിയോഗിക്കുന്നതിനും മറ്റും ഇത്തരം പ്രചാരണം തടസ്സംസൃഷ്ടിക്കാന്‍ സാധ്യതയുണ്ട്.

അതിനാല്‍ തെരഞ്ഞെടുപ്പുമായി ബന്ധപ്പെട്ട കുറ്റകൃത്യങ്ങള്‍ക്കുകൂടി നേതാക്കള്‍ ഉത്തരവാദികളായിരിക്കുമെന്നും പലീസ് പുറത്തിറക്കിയ അറിയിപ്പില്‍ പറയുന്നു.