ദീപാവലി ആഘോഷത്തിനെത്തിയ അമ്മ കണ്ടത് മകളുടെ കത്തിക്കരിഞ്ഞ മൃതദേഹം; പ്ലസ്ടു വിദ്യാർഥിനിയുടെ മരണത്തിൽ ദുരൂഹതയെന്ന് ബന്ധുക്കൾ

തിരുവനന്തപുരം: പതിനാറുകാരിയെ വീടിനുള്ളിൽ പൊള്ളലേറ്റ് മരിച്ച നിലയിൽ കണ്ടെത്തിയ സംഭവത്തിൽ ദുരൂഹത ആരോപിച്ച് ബന്ധുക്കൾ. പ്ലസ് ടു വിദ്യാർത്ഥിനിയും തിരുവനന്തപുരം തിരുമല പെരുകാവ് സ്വദേശിനിയുമായ ആരതി ജെ എച്ച് നായരെ വെള്ളിയാഴ്ച ഉച്ചക്ക് രണ്ടരയോടെ വീടിനുള്ളിൽ പൊള്ളലേറ്റ് മരിച്ച നിലയിൽ കണ്ടെത്തിയത്.

മകൾക്ക് ദീപാവലി ആഘോഷിക്കാൻ കമ്പിത്തിരിയും പൂത്തിരിയുമായി എത്തിയ അമ്മ കണ്ടത് പതിനാറുകാരിയുടെ കത്തിക്കരിഞ്ഞ മൃതദേഹം. മരണത്തിന് 20 മിനിട്ട് മുമ്പ് അമ്മയെ ഫോണിൽ വിളിച്ച് ജോലി കഴിഞ്ഞു വരുമ്പോൾ നാരാങ്ങാവെള്ളം കലക്കി വയ്ക്കാമെന്ന് പറഞ്ഞ മകൾ വീടിനുള്ളിൽ പൊള്ളലേറ്റ് മരിച്ച നിലയിൽ കണ്ടതിലാണ് കുടുംബം ദുരൂഹത ആരോപിക്കുന്നത്.

അച്ഛൻ ഹരീന്ദ്രനാഥും അമ്മ ജയന്തിയും സ്വകാര്യ സ്ഥാപനങ്ങളിലെ ജീവനക്കാരാണ്. ഇരുവരും ജോലിക്ക് പോകുമ്പോൾ ആരതി വീട്ടിൽ ഒറ്റയ്ക്കാണ് ഉണ്ടാകാറുള്ളത്. ഏക സഹോദരൻ ഗൾഫിലാണ്. സാധാരണ ജോലി കഴിഞ്ഞ് ഉച്ചയ്ക്ക് രണ്ടു മണിയോടെ വീട്ടിലെത്താറുള്ള അമ്മയെ കാണാത്തതിനെ തുടർന്ന് 2.10 ന് മകൾ ജയന്തിയെ ഫോൺ ചെയ്തിരുന്നു.

ദീപാവലി സാധനങ്ങൾ വാങ്ങാൻ തിരുമല ജംഗ്ഷനിൽ നിൽക്കുകയാണെന്നും ഉടൻ എത്തുമെന്നും അമ്മ മകളെ അറിയിച്ചു. അമ്മയ്ക്ക് കുടിക്കാൻ നാരാങ്ങാവെള്ളം കലക്കി വയ്ക്കാമെന്ന് പറഞ്ഞ ആരതിയെയാണ് 20 മിനിട്ടിന് ശേഷം വീട്ടിലെ അടുക്കളയിൽ പൊള്ളലേറ്റ് മരിച്ച നിലയിൽ കണ്ടെത്തിയത്.

മൃതദേഹത്തിന് സമീപത്ത് നിന്ന് മണ്ണെണ്ണ കുപ്പിയും ലൈറ്ററും പൊലീസ് കണ്ടെടുത്തു. വീട്ടിലെ സ്റ്റോർ റൂമിൽ ഉണ്ടായിരുന്ന മണ്ണെണ്ണ കുപ്പി അവിടെ തന്നെയുണ്ട്. കണ്ടെടുത്ത കുപ്പി വീട്ടിലുള്ളതല്ലെന്ന് മാതാപിതാക്കൾ പൊലീസിന് മൊഴി നൽകി. അടുക്കള വാതിൽ തുറന്നു കിടന്നിരുന്നു.

മരണവെപ്രാളത്തിൽ ഓടിയതിൻ്റെയോ, മറ്റു വസ്തുക്കൾക്ക് തീപിടിച്ചതിൻ്റെയോ അടയാളങ്ങൾ വീട്ടിലില്ല. ആരതി ആത്മഹത്യ ചെയ്യേണ്ട യാതൊരു സാഹചര്യവുമില്ലെന്ന് ബന്ധുക്കൾ പറയുന്നു.

പെൺകുട്ടിയുടെ തലയ്ക്ക് പുറകിൽ മുറിവുണ്ടായിരുന്നതായി നാട്ടുകാരും വ്യക്തമാക്കുന്നു. മലയൻകീഴ് പൊലീസ് അസ്വഭാവിക മരണത്തിന് കേസെടുത്ത് അന്വേഷണമാരംഭിച്ചു.