ഭർത്താവ് തലാഖ് ചൊല്ലി; നിഖാഹ് ഹലാലക്കായി യുവതിയെ ബലാത്സംഗം ചെയ്ത ബാബ അറസ്റ്റില്‍

ഭോപ്പാൽ: ഭർത്താവ് തലാഖ് ചൊല്ലിയ യുവതിയെ നിഖാഹ് ഹലാലാക്കാൻ ബാബ ബലാത്സംഗം ചെയ്തു. മധ്യപ്രദേശിലെ ഭോപ്പാലിൽ 21കാരിയാണ് പീഡനത്തിനിരയായത്. യുവതിയുടെ ഭർത്താവും ബലാത്സംഗം ചെയ്ത ബാബയും പൊലീസ് പിടിയിലായി.

നവംബർ 23ന് ഭാര്യയുമായി കലഹിച്ച ഭർത്താവ് അവരെ മൂന്ന് തവണ തലാഖ് ചൊല്ലുകയായിരുന്നുവെന്ന് പരാതിയിൽ പറയുന്നു. പിന്നീട് മനസ് മാറിയ ഭർത്താവിന് വീണ്ടും യുവതിയെ പുനർവിവാഹം ചെയ്യണമെന്ന ആഗ്രഹമുദിച്ചു. ഇതിന് പിന്നാലെയാണ് പീഡനം നടന്നതെന്ന് ജഹംഗിരാബാദ് സിറ്റി എസ് പി അബ്ദുൽ അലീം ഖാൻ പറഞ്ഞു.

വിവാഹത്തിന് മധ്യസ്ഥത വഹിച്ച അൻപതുകാരനായ അൻവർ ബാബയെ ഇരുവരും സമീപിച്ചു. എന്നാൽ മൊഴി ചൊല്ലിയ ഭാര്യയെ വീണ്ടും വിവാഹം കഴിക്കുന്നതിന് മുൻപ് യുവതി മറ്റൊരാളെ വിവാഹം കഴിക്കേണ്ടതുണ്ടെന്ന് ബാബ അറിയിച്ചു. ആ ബന്ധം ഒഴിഞ്ഞ ശേഷം മാത്രമേ ആദ്യ ഭർത്താവിനെ വീണ്ടും വിവാഹം കഴിക്കാവൂവെന്നും നിഖാഹ് ഹലാല ചൂണ്ടിക്കാട്ടി ബാബ നിർദേശിച്ചു.

മന്ത്രവാദിയായ ബാബ യുവതിയെ അഷ്ബാഗിലെ ഫ്ളാറ്റിലെത്തിച്ച് ബലാത്സംഗം ചെയ്യുകയായിരുന്നു. അതിനുശേഷം വീട്ടിൽ മടങ്ങിയെത്തിയെങ്കിലും യുവതിയെ സ്വീകരിക്കാൻ ഭർത്താവ് തയാറായില്ല. തുടർന്ന് ഭർത്താവിനും ബാബക്കും എതിരെ യുവതി പൊലീസിൽ പരാതി നൽകുകയായിരുന്നു. മുത്തലാഖ് നിരോധന നിയമപ്രകാരം ഭർത്താവിനെയും ബലാത്സംഗ കുറ്റത്തിന് ബാബയെയും അറസ്റ്റ് ചെയ്തതായി പൊലീസ് അറിയിച്ചു.