കൊലക്കേസ് പ്രതികൾ മദ്യപിച്ച് ജയിലിലെത്തിയത് അന്വേഷിക്കുന്നു

കണ്ണൂർ: കൊലക്കേസിൽ ശിക്ഷിക്കപ്പെട്ട പ്രതികൾ മദ്യപിച്ച് ജയിലിൽ എത്തിയ സംഭവത്തിൽ അന്വേഷണം ആരംഭിച്ചു. തലശേരി പൊലീസാണ് ഇക്കാര്യം അന്വേഷിക്കുന്നത്. ബിജെപി പ്രവർത്തകനായിരുന്ന കെ.വി സുരേന്ദ്രനെ കൊലപ്പെടുത്തിയ കേസിലെ പ്രതികളായ സിപിഎം പ്രവർത്തകരാണ് കഴിഞ്ഞ ദിവസം മദ്യപിച്ച് ജയിലിലെത്തിയത്.

മദ്യലഹരിയിലായതിനാൽ പ്രതികളെ ജയിലിൽ പ്രവേശിപ്പിച്ചിരുന്നില്ല. ഇവരെ പിന്നീട് ആശുപത്രിയിൽ എത്തിച്ച് വൈദ്യപരിശോധനയ്ക്ക് വിധേയമാക്കുകയായിരുന്നു.

കെ.വി. സുരേന്ദ്രൻ വധക്കേസിൽ അഞ്ച് പ്രതികളെയാണ് കഴിഞ്ഞ ദിവസം തലശേരി കോടതി ജീവപര്യന്തം തടവിന് ശിക്ഷിച്ചത്. ശിക്ഷാവിധി പുറത്തുവന്ന കഴിഞ്ഞ ദിവസം കോടതി പരിസരത്തുനിന്നോ ഭക്ഷണം കഴിക്കാൻ പോയപ്പോഴോ ഇവർക്ക് മദ്യമെത്തിച്ച് നൽകിയതാകാമെന്നാണ് പൊലീസ് സംശയിക്കുന്നത്.