ആദ്യം കാറിൽ ഫുൾ ടാങ്കടിച്ചു; പിന്നീട് കന്നാസുകളിലും; 26500 രൂപയുടെ ഡീസൽ വാങ്ങി കാശ് നൽകാതെ കടന്നതായി പരാതി

ചണ്ഡിഗഢ്: കാറിലും കന്നാസുകളിലുമായി 26500 രൂപയുടെ ഡീസൽ നിറച്ചശേഷം പണം നൽകാതെ രണ്ടു യുവാക്കൾ കടന്നുകളഞ്ഞതായി പരാതി. പഞ്ചാബ് ചണ്ഡിഗഢിലെ സെക്ടർ 55ലെ പെട്രോൾ പമ്പിലാണ് സംഭവം. വെള്ളിയാഴ്ച രാവിലെ 6.30ഓടെയാണ് സംഭവം.

ഒരു എസ്.യു.വിയിൽ എത്തി രണ്ടു യുവാക്കളാണ് തട്ടിപ്പ് നടത്തിയത്. ആദ്യം കാറിൽ ഫുൾ ടാങ്ക് അടിക്കാൻ നിർദേശം നൽകി. അതിനുശേഷം കാറിന്‍റെ ഡിക്കിയിലുണ്ടായിരുന്ന പ്ലാസ്റ്റിക് കന്നാസുകളിലും ഡീസൽ നിറയ്ക്കാൻ ആവശ്യപ്പെട്ടു. ആകെ 26500 രൂപയുടെ ഡീസലാണ് നിറച്ചത്.

ഡീസൽ നിറച്ചശേഷം പണം ആവശ്യപ്പെട്ടപ്പോൾ, അതിവേഗം ഓടിച്ചുപോകുകയായിരുന്നുവെന്ന് പെട്രോൾ പമ്പിലെ ജീവനക്കാരനായ വിജയ് കുാമർ പറയുന്നു.

പഞ്ചാബ് രജിസ്ട്രേഷൻ നമ്പറുള്ള വെള്ള എസ്‌യുവി കാറിലെത്തിയാണ് തട്ടിപ്പ് നടത്തിയത്. സംഭവത്തിൽ പെട്രോൾ പമ്പ് ഉടമ പൊലീസിൽ പരാതി നൽകിയിട്ടുണ്ട്.

ഇന്ത്യൻ ശിക്ഷാ നിയമത്തിലെ സെക്ഷൻ 420 (വഞ്ചന), 473 (വ്യാജ മുദ്ര ഉണ്ടാക്കുകയോ കൈവശം വയ്ക്കുകയോ ചെയ്യുക, വ്യാജരേഖ ചമയ്ക്കുക എന്ന ഉദ്ദേശ്യത്തോടെ), 120-ബി (ക്രിമിനൽ ഗൂഢാലോചന) എന്നിവ പ്രകാരം സെക്ടർ-39 പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. സിസിടിവി ദൃശ്യങ്ങൾ കേന്ദ്രീകരിച്ചാണ് അന്വേഷണം നടക്കുന്നത്. പ്രതികളെക്കുറിച്ച് സൂചന ലഭിച്ചതായും പൊലീസ് പറയുന്നു.