Shocking| കുഞ്ഞിന്റെ വായിൽ ഫെവി ക്വിക്ക് വെച്ച് കുറ്റിക്കാട്ടിൽ തള്ളി; അമ്മയെ ബലാത്സംഗത്തിനിരയാക്കി

ഇൻഡോർ: മനുഷ്യമനസാക്ഷിയെ ഞെട്ടിക്കുന്ന സംഭവമാണ് മധ്യപ്രദേശിലെ രത്ലം ജില്ലയിലെ മല്ല്യയിൽ നടന്നത്. യുവതിയെയും മൂന്നുവയസ്സുള്ള കുഞ്ഞിനെയും തട്ടിക്കൊണ്ടുപോയശേഷം രണ്ടുപേർ ചേർന്ന് യുവതിയെ ബലാത്സംഗം ചെയ്തു.

കുഞ്ഞ് ഒച്ചവെക്കാതിരിക്കാൻ വായിൽ ഫെവി ക്വിക്ക് തിരുകി കയറ്റുകയും കൈകൾ പിന്നിൽ കെട്ടിയിടുകയും ചെയ്തശേഷം കുറ്റിക്കാട്ടിൽ വെച്ച് യുവതിയെ ബലാത്സംഗം ചെയ്യുകയായിരുന്നു.

ഗ്രാമവാസികൾ ആശുപത്രിയിൽ എത്തിച്ചതുകൊണ്ടു കുഞ്ഞിന്റെ ജീവൻ രക്ഷിക്കാനായി. ഇതേസമയം തന്നെ യുവതിയെ കടത്തിക്കൊണ്ടുപോകാൻ ശ്രമിക്കുന്നതിനെടെ രണ്ടുപേരെയും പൊലീസ് അറസ്റ്റ് ചെയ്തു.

കഴിഞ്ഞ ചൊവ്വാഴ്ച രാവിലെ എട്ടുമണിക്കാണ് സംഭവം നടന്നത്. കന്നുകാലികളെ മേയ്ക്കാൻ ചിലർ റെയിൽവേ ട്രാക്കിന് സമീപമുള്ള കുറ്റിക്കാട്ടിലെത്തിയതോടെയാണ് സംഭവം പുറത്തറിഞ്ഞത്.

കുറ്റിക്കാട്ടിനുള്ളിൽ ഒരു കുഞ്ഞ് അബോധാവസ്ഥയിൽ കിടക്കുന്നത് കാലികളെ മേയ്ക്കാൻ എത്തിയവരുടെ ശ്രദ്ധയിൽപ്പെട്ടു. കൈ പുറകിൽവെച്ച് തുണികൊണ്ട് വരിഞ്ഞുമുറുക്കിയ നിലയിലായിരിക്കുകയായിരുന്നു.

ഉടൻ തന്നെ 100ൽ വിളിച്ച് പൊലീസിനെ അറിയിക്കുകയും കുഞ്ഞിനെ ആശുപത്രിയിലെത്തിക്കുകയും ചെയ്തു. യഥാസമയം ആശുപത്രിയിലെത്തിച്ചതുകൊണ്ടുമാത്രമാണ് കുഞ്ഞിന്റെ ജീവൻ രക്ഷിക്കാനായത്.

ഇതേസമയം തന്നെ റെയിൽവേ ട്രാക്കിന് സമീപത്ത് രണ്ടു യുവാക്കൾ ഒരു സ്ത്രീയുടെ പിന്നാലെ ഓടുന്നത് സമീപത്തുണ്ടായിരുന്നവർ കണ്ടു. ഇവർ ഓടിയെത്തി യുവാക്കളെ പിടികൂടി പൊലീസിന് കൈമാറി. അഫ്സൽപൂർ പൊലീസ് കേസ് രജിസ്റ്റർ ചെയ്തു.