Murder for Cigarettes | സിഗരറ്റിന്റെ പണം ചോദിച്ചു; പൊലീസുകാരനും കൂട്ടുകാരും ചേർന്ന് കടയുടമസ്ഥനെ കൊന്നു

ഉദം സിംഗ് നഗർ: പാൻ ഷോപ്പ് കടയുടമസ്ഥനെ കൊലപ്പെടുത്തിയതിന് പൊലീസുകാരൻ അറസ്റ്റിലായി. ഉത്തരാഖണ്ഡിലെ ഉദം സിംഗ് നഗർ ജില്ലയിലെ ബാജ്പുരിലാണ് കടയുടമസ്ഥനെ പൊലീസ് കൊലപ്പെടുത്തിയത്.

സംഭവവുമായി ബന്ധപ്പെട്ട് ബാജ്പുർ പൊലീസ് സ്റ്റേഷനിലെ കോൺസ്റ്റബിൾ, ഇയാളുടെ രണ്ട് സുഹൃത്തുക്കൾ എന്നിവർ ചേർന്ന് പാൻ ഷോപ്പ് ഉടമസ്ഥനെ കാറിന്റെ ചക്രം കയറ്റി കൊലപ്പെടുത്തിയെന്നാണ് ആരോപണം. കടയുടമസ്ഥനിൽ നിന്ന് ഇവർ സിഗരറ്റ് വാങ്ങിയിരുന്നു. ഈ സിഗരറ്റിന്റെ പണം നൽകണമെന്ന് കടക്കാരൻ ആവശ്യപ്പെട്ടതാണ് കൊലപാതകത്തിൽ കലാശിച്ചത്.

കോൺസ്റ്റബിൾ പ്രവീൺ, സുഹൃത്തുക്കളായ ഗൗരവ് റാത്തോർ, ജീവൻ എന്നിവരെ ഇന്ത്യൻ പീനൽ കോഡ് സെക്ഷനുകളായ 302, 504, 506 എന്നിവ പ്രകാരമാണ് അറസ്റ്റ് ചെയ്തത്.

ബുധനാഴ്ച രാത്രിയാണ് സംഭവം ഉണ്ടായത്. പ്രകോപിതരായ നാട്ടുകാർ മൃതദേഹം കോട് വാലിക്ക് പുറത്തു വെയ്ക്കുകയും പൊലസിനെ എതിരെ മുദ്രാവാക്യം വിളിക്കുകയും ചെയ്തതായി ഉദം സിംഗ് നഗർ എസ് എസ് പി ഡി.എസ് കുൻവാർ പറഞ്ഞു.

സംഭവത്തെക്കുറിച്ച് അന്വേഷിക്കാൻ കാഷിപുർ പൊലീസ് സ്റ്റേഷൻ ഇൻ-ചാർജിനോട് ആവശ്യപ്പെട്ടിട്ടുണ്ട്. മൃതദേഹം പോസ്റ്റുമോർട്ടം നടത്തും. പ്രദേശത്തെ സംഘർഷാവസ്ഥ കണക്കിലെടുത്ത് സമീപ പ്രദേശങ്ങളിൽ നിന്നുള്ള അധിക പൊലീസ് ഉദ്യോഗസ്ഥരെ വിന്യസിച്ചിട്ടുണ്ടെന്ന് എസ് എസ് പി അറിയിച്ചു.