ഡോക്ടറെ കൂട്ടബലാത്സംഗം ചെയ്തു കൊലപ്പെടുത്തി; മൃതദേഹം ബ്ലാങ്കറ്റിൽ പൊതിഞ്ഞ് കത്തിച്ചു

ഹൈദരാബാദ്: 27 വയസുള്ള മൃഗഡോക്ടറെ പീഡിപ്പിച്ച് കൊലപ്പെടുത്തിയ ശേഷം മൃതദേഹം കത്തിച്ചു. ഹൈദരാബാദിലാണ് സംഭവം. നാല് പേർ ചേർന്നാണ് പെൺകുട്ടിയെ പീഡിപ്പിച്ചതെന്നാണ് സംശയിക്കുന്നത്.

ടൂവീലർ പഞ്ചറായതിനെ തുടർന്ന് അകപ്പെട്ടുപോയ പെൺകുട്ടിയെ വാഹനം ശരിയാക്കാമെന്ന് വാഗ്ദാനം ചെയ്ത സംഘമാണ് പീഡനത്തിരിയാക്കിയതെന്നാണ് സംശയിക്കുന്നത്. തോണ്ടുപള്ളി ടോൾപ്ലാസയ്ക്ക് സമീപം വെച്ചാണ് പെൺകുട്ടി പീഡനത്തിനിരയായത്. ഇവിടെ നിന്ന് 25 കിലോമീറ്റർ അകലെ നിന്നാണ് മൃതദേഹം കത്തിക്കരിഞ്ഞ നിലയിൽ കണ്ടെത്തിയത്.

സംഭവവുമായി ബന്ധപ്പെട്ട് രണ്ട് ട്രക്ക് ഡ്രൈവർമാരും രണ്ട് ക്ലീനർമാരും പിടിയിലായിട്ടുണ്ട്. മൊഹ്ദ് പാഷ, നവീൻ, കേശവുലു, ശിവ എന്നിവരാണ് അറസറ്റിലായിരിക്കുന്നത്. ടോൾപ്ലാസയ്ക്ക് സമീപത്തുള്ള സിസിടിവി ദൃശ്യങ്ങളുടെ അടിസ്ഥാനത്തിലാണ് ഇവരെ കസ്റ്റഡിയിലെടുത്തത്.

9.30നും 10നും ഇടയിലായി ഒരു യുവാവ് സ്കൂട്ടി ശരിയാക്കി നൽകാൻ കൊണ്ടു വന്നതായി സമീപത്തെ ടയർ റിപ്പയർ ഷോപ്പിന്റെ ഉടമസ്ഥൻ മൊഴി നൽകിയിട്ടുണ്ട്.

രാത്രി 9.45ന് വണ്ടി പഞ്ചറായെന്ന് പെൺകുട്ടി സഹോദരിയെ അറിയിച്ചിരുന്നു. ചിലർ സഹായിക്കാൻ തയ്യാറായിട്ടുണ്ടെന്നും ശരിയാക്കാനായി വണ്ടി കൊണ്ടുപോയിട്ടുണ്ടെന്നും ഇവർ സഹോദരിയെ അറിയിച്ചിരുന്നു. ചില ട്രക്ക് ഡ്രൈവര്‍മാരെ ഭയപ്പെടുന്നതായും ഇവർ സഹോദരിയോട് പറഞ്ഞിരുന്നു.

വണ്ടി അവിടെ ഏൽപ്പിച്ച് ടാക്സി എടുത്ത് വീട്ടിലേക്ക് മടങ്ങാൻ പെൺകുട്ടിയോട് സഹോദരി പറഞ്ഞിരുന്നു. എന്നാൽ പിന്നീട് സഹോദരി വിളിച്ചപ്പോൾ പെൺകുട്ടിയുടെ ഫോൺ സ്വിച്ച് ഓഫ് ആയിരുന്നു. തുടർന്ന് രാത്രി 11 മണിയോടെ ഇവരുടെ കുടുംബം പൊലീസിൽ പരാതി നൽകി. വ്യാഴാഴ്ച രാവിലെയാണ് പെൺകുട്ടിയുടെ മൃതദേഹം കത്തിക്കരിഞ്ഞ നിലയിൽ കണ്ടെത്തിയത്.

കൊല്ലൂരുവിലെ മൃഗാശുപത്രിയിലേക്ക് പോയതായിരുന്നു ഇവര്‍. വൈകിട്ട് മടങ്ങിയ എത്തിയ ഇവർ വാഹനം ടോൾ പ്ലാസയ്ക്ക് സമീപം പാർക്ക് ചെയ്ത ശേഷം ടാക്സിയിൽ ഗാച്ചിബൗളിയിലെ ഡെർമറ്റോളജിസ്റ്റിനെ കാണാൻ പോയതായിരുന്നു. 9 മണിക്ക് മടങ്ങി എത്തിയപ്പോൾ വാഹനം പഞ്ചറായ നിലയിൽ കാണപ്പെടുകയായിരുന്നു. പെൺകുട്ടിയെ അപായപ്പെടുത്താൻ മനഃപൂര്‍വം വാഹനം കേടാക്കിയതാണെന്നാണ് സംശയിക്കുന്നത്.