വാഴ കൊണ്ട് എന്ത് പ്രയോജനം? കൈക്കൂലി ഒളിപ്പിക്കാന്‍ ഒന്നാംതരമെന്ന് മൃഗസംരക്ഷണ വകുപ്പ് ചെക്ക് പോസ്റ്റ്

പാലക്കാട്: മൃഗസംരക്ഷണ വകുപ്പിന്റെ ചെക്‌പോസ്റ്റില്‍ വിജിലന്‍സ് നടത്തിയ റെയ്ഡില്‍ കൈക്കൂലി ഇടപാടുകള്‍ കണ്ടെത്തി. വാഴയിലും ഓടിനുള്ളില്‍ ഒളിപ്പിച്ചാണ് കൈക്കൂലി കൈപ്പറ്റിയിരുന്നത്. കന്നുകാലികളുമായി എത്തുന്ന വാഹനങ്ങളെ പരിശോധന കൂടാതെ കടത്തിവിടുന്നതിനായാണ് കൈക്കൂലി വാങ്ങിയിരുന്നത്. വിജിലന്‍സ് മിന്നല്‍ പരിശോധനയില്‍ 8,931 രൂപ പിടികൂടി.

രഹസ്യവിവരത്തെ തുടര്‍ന്ന് ബുധനാഴ്ച പുലര്‍ച്ചെയാണ് വിജിലന്‍സ് പരിശോധന നടത്തിയത്. പാലവാഹനങ്ങളില്‍ നിന്നായി വാങ്ങിയ കൈക്കൂലി പണം ചുരുളുകളായി ചെപോസ്റ്റ് കെട്ടിടത്തിന്റെ ഓടുകളിലും സമീപത്തുള്ള വാഴകളിലും ഒളിപ്പിച്ചിരിക്കുകയായിരുന്നു.

കന്നുകാലികളുടെ എണ്ണത്തിനനുസരിച്ചാണ് ചെക്‌പോസ്റ്റില്‍ പണമടയ്‌ക്കേണ്ടത് എന്നാല്‍ ലോറിയിലെ ജീവനക്കാര്‍ നല്‍കുന്ന കൈക്കൂലി വാങ്ങി വാഹനങ്ങള്‍ പരിശോധന കൂടാതെ കടത്തിവിടുകയാണ് ചെയ്യുന്നത്.

കന്നുകാലികളെ ഡോക്ടര്‍ പരിശോധിച്ച്് മെഡിക്കല്‍ സര്‍ട്ടിഫിക്കറ്റ് നല്‍കണമെന്നും നിര്‍ദേശമുണ്ട്. എന്നാല്‍ മെഡിക്കല്‍ സര്‍ട്ടിഫിക്കറ്റും തലേദിവസം ഒപ്പിട്ടു സീല്‍ ചെയ്തതായി കണ്ടെത്തി.

ചെക്‌പോസ്റ്റിലുണ്ടായിരുന്ന ലൈവ് സ്‌റ്റോക് ഇന്‍സ്‌പെക്ടര്‍ക്കും അറ്റന്‍ഡര്‍ക്കുമെതിരെ വിജിലന്‍സ് ഡയറക്ടര്‍ക്ക് റിപ്പോര്‍ട്ട് നല്‍കുമെന്ന് ഉദ്യോഗസ്ഥര്‍ അറിയിച്ചു.