പിരിഞ്ഞു ജീവിക്കുന്ന ഭാര്യയെ ഭർത്താവ് ബലാത്സംഗം ചെയ്തു; ഒത്താശ ചെയ്തത് ഭർത്താവിന്റെ സഹോദരൻ

സഹോദരന്റെയും സുഹൃത്തിന്റെയും സാന്നിധ്യത്തിൽ 34 കാരിയായ യുവതിയെ ഭർത്താവ് ബലാത്സംഗം ചെയ്തു. കഴിഞ്ഞ 11 മാസമായി യുവതി ഭർത്താവുമായി വേർപിരിഞ്ഞ് താമസിക്കുകയായിരുന്നു. സംഭവത്തിൽ പോലീസിൽ പരാതി നൽകിയിട്ടുണ്ട്. വേർപിരിഞ്ഞ ഭർത്താവിൽ നിന്ന് യുവതി പീഡനത്തിന് ഇരയായതായും റിപ്പോർട്ടുണ്ട്. 2022 ഡിസംബർ 20ന് യുവതിയെ നഗരത്തിലെ ഗസ്റ്റ് ഹൗസിലേക്ക് പ്രതികൾ ബലം പ്രയോഗിച്ച് കൊണ്ടുപോയിരുന്നു

ടൈംസ് ഓഫ് ഇന്ത്യയിൽ പ്രസിദ്ധീകരിച്ച ഒരു റിപ്പോർട്ട് അനുസരിച്ച്, ഡിസംബർ 20 ന് യുവതിയുടെ ഭർത്താവ് അവരുടെ വീടിന്റെ വാതിൽ തകർത്ത് അകത്തുകയറുകയായിരുന്നു. ആ സമയം അവർ കുളിമുറിയിലായിരുന്നു. ഭർത്താവിന്റെ സുഹൃത്തും സഹോദരനും ചേർന്ന് തന്നെ മുടിയിൽ പിടിച്ച് വലിച്ച് കിടപ്പുമുറിയിലേക്ക് കൊണ്ടുപോയെന്ന് യുവതി പോലീസിൽ നൽകിയ പരാതിയിൽ പറയുന്നു (തുടർന്ന് വായിക്കുക)

തുടർന്ന് ഭർത്താവ് വടികൊണ്ട് മർദിക്കുകയും വസ്ത്രങ്ങൾ വലിച്ചുകീറുകയും ചെയ്തു. പ്രതി യുവതിയെ ബലാത്സംഗം ചെയ്തുവെന്നാണ് റിപ്പോർട്ട്. ഭർത്താവിന്റെ സഹോദരനും സുഹൃത്തും വീടുവിട്ടിറങ്ങി വാതിൽ പുറത്തുനിന്ന് പൂട്ടി. ഗുജറാത്തിലെ രാജ്‌കോട്ടിൽ ഭവാനിപൂർ പ്രദേശത്താണ് സംഭവം

വൈകുന്നേരം പ്രതി സുഹൃത്തിനെ വിളിച്ചതായി റിപ്പോർട്ട് ഉണ്ട്. യുവതിയെ കാറിൽ ഗസ്റ്റ് ഹൗസിലേക്ക് കൊണ്ടുപോയി. പ്രതി വീണ്ടും ബലാത്സംഗം ചെയ്തു. ഡിസംബർ 21ന് രാവിലെ ഭർത്താവ് ഉറങ്ങിക്കിടക്കുമ്പോൾ ഗസ്റ്റ് ഹൗസിൽ നിന്ന് യുവതി രക്ഷപ്പെട്ട് പോലീസ് കമ്മീഷണറുടെ ഓഫീസിലെത്തി

തുടർന്ന് ഇവരെ ചികിത്സയ്ക്കായി ആശുപത്രിയിൽ പ്രവേശിപ്പിച്ചു. യുവതി സുഖം പ്രാപിച്ചപ്പോഴാണ് വിഷയത്തിൽ പരാതി നൽകിയത്. വിശദമായ അന്വേഷണം ആരംഭിച്ചിട്ടുണ്ട്. എന്നാൽ, ഇതുവരെ ആരെയും അറസ്റ്റ് ചെയ്തിട്ടില്ല

മൂന്ന് വർഷം മുമ്പാണ് ഇവർ തമ്മിലെ വിവാഹം നടന്നത്. യുവതിയുടെ രണ്ടാം വിവാഹമായിരുന്നു. എന്നാൽ വഴക്കുകൾ പതിവായതോടെ അവർ മാറി താമസിക്കാൻ തുടങ്ങി