ഹോട്ടൽ മുറിയിൽ 20കാരിയെ രണ്ട് പൊലീസുകാർ പീഡനത്തിനിരയാക്കി; അന്വേഷണം ആരംഭിച്ചു

ഗോരഖ്പൂർ: ഹോട്ടൽ മുറിയിൽ വെച്ച് രണ്ട് പൊലീസ് ഉദ്യോഗസ്ഥർ ചേർന്ന് ഇരുപതുകാരിയെ ബലാത്സംഗം ചെയ്തതായി പരാതി. ഉത്തർപ്രദേശിലെ ഗൊരഖ്പൂരിലാണ് സംഭവം. റെയിൽവേ സ്റ്റേഷന് അടുത്തുള്ള ഹോട്ടലിൽ വെച്ചാണ് യുവതി പീഡനത്തിനിരയായത്. വ്യാഴാഴ്ചയാണ് സംഭവം ഉണ്ടായത്.

സംഭവത്തെ കുറിച്ച് പെൺകുട്ടി പൊലീസിൽ അറിയിക്കുകയായിരുന്നു. തുടർന്ന് നൽകിയ പരാതി അനുസരിച്ച് പൊലീസ് കേസ് രജിസ്റ്റർ ചെയ്യുകയായിരുന്നു. തിരിച്ചറിയാത്ത രണ്ട് പൊലീസുകാർക്കെതിരെ കൂട്ട ബലാത്സംഗം ഉൾപ്പെടെയുള്ള കുറ്റങ്ങളാണ് ചുമത്തിയിരിക്കുന്നത്. സംഭവത്തിൽ ആരെയും ഇതുവരെ അറസ്റ്റ് ചെയ്തിട്ടില്ല.

ഗോരഖ്പുര്‍ പൊലീസ് സ്‌റ്റേഷനിലെ മുഴുവന്‍ പൊലീസുകാരെയും സസ്‌പെന്‍ഡ് ചെയ്യണമെന്ന് ആവശ്യപ്പെട്ട് കോണ്‍ഗ്രസ്, സമാജ്‌വാദി പാര്‍ട്ടി,ബി.എസ്.പി., പൂര്‍വാഞ്ചല്‍ സേന എന്നീ പാര്‍ട്ടികള്‍ ജില്ലാ മജിസ്‌ട്രേട്ട് ഓഫീസിനു മുന്നില്‍ കുത്തിയിരിപ്പ് ധര്‍ണ നടത്തി. സംഭവത്തില്‍ മജിസ്റ്റീരിയല്‍ അന്വേഷണം വേണമെന്നും ഇവര്‍ ആവശ്യപ്പെട്ടു.

പെൺകുട്ടി ജില്ലാ ആശുപത്രിയിൽ ചികിത്സയിലാണ്. ഹോട്ടലിലെ സിസിടിവി ദൃശ്യങ്ങൾ പരിശോധിച്ച് വരികയാണെന്നും സെക്യൂരിറ്റി ജീവനക്കാരന്റെ മൊഴി എടുത്തിട്ടുണ്ടെന്നും ഗോരഖ്പൂർ എസ്എസ്പി സുനിൽ കുമാർ ഗുപ്ത പറഞ്ഞു.

ചില പുരുഷന്മാര്‍ക്കൊപ്പം ഹോട്ടല്‍ മുറിയിലേക്ക് പെണ്‍കുട്ടി സ്വമേധയാ പോയെന്നാണ് പ്രാഥമിക അന്വേഷണത്തില്‍ വ്യക്തമായത്. എന്നിരുന്നാലും അന്വേഷണം പുരോഗമിക്കുകയാണ്. കുറ്റവാളികള്‍ രക്ഷപ്പെടില്ലെന്നും അദ്ദേഹം കൂട്ടിച്ചേര്‍ത്തു.

രണ്ടുപോലീസുകാരും ചേര്‍ന്ന് തന്നെ മര്‍ദിക്കുകയും അനാശാസ്യത്തില്‍ ഉള്‍പ്പെട്ടവളെന്ന് ആരോപിക്കുകയും ചെയ്തുവെന്ന് യുവതി മാധ്യമങ്ങളോട് പറഞ്ഞു. വിട്ടയക്കാൻ ആവശ്യപ്പെട്ടപ്പോൾ രണ്ട് പൊലീസ് ഉദ്യോഗസ്ഥരും ചേർന്ന് ബലാത്സംഗം ചെയ്യുകയായിരുന്നുവെന്നും പെൺകുട്ടി പറഞ്ഞു.

അതിനു ശേഷം ഓട്ടോയിൽ വീട്ടിലേക്ക് പോകാനും പൊലീസുകാർ പറഞ്ഞതായി പെൺകുട്ടി വ്യക്തമാക്കി. പീഡനം നടന്ന ഹോട്ടൽ മുറിയും പീഡനം നടത്തിയ ഉദ്യോഗസ്ഥരെയും കണ്ടാല്‍ തിരിച്ചറിയാമെന്ന് പെണ്‍കുട്ടി പറഞ്ഞു.