ബന്ധുവിനെ കെട്ടിയിട്ടശേഷം യുവതിയെ കൂട്ടബലാത്സംഗത്തിന് ഇരയാക്കി; ദൃശ്യങ്ങൾ പ്രചരിച്ചതോടെ പൊലീസ് കേസെടുത്തു

ബാന്ദ: ബലാത്സംഗ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ച ശേഷം മാത്രം യുവതിയെ കൂട്ടബലാത്സംഗത്തിനിരയാക്കിയവർക്കെതിരെ പൊലീസ് കേസെടുത്തതായി ആരോപണം. തിങ്കളാഴ്ചയാണ് ബന്ധുവീട്ടിലേക്ക് പോവുകയായിരുന്ന യുവതിയെയാണ് ആറ് പേർചേർന്ന് പീഡിപ്പിച്ചത്.

ഒപ്പമുണ്ടായിരുന്നയാളെ കെട്ടിയിട്ട ശേഷമാണ് യുവതിയെ കൂട്ടമാനഭംഗത്തിനിരയാക്കിയത്. ഇതിന്റെ ദൃശ്യങ്ങൾ മൊബൈലിൽ പകർത്തി സമൂഹമാധ്യമങ്ങളിൽ പ്രചരിപ്പിക്കുകയും ചെയ്തു. ഉത്തർപ്രദേശിലെ ചിത്രകൂടിലാണ് സംഭവം ഉണ്ടായത്.

അതേസമയം പീഡനത്തെ കുറിച്ച് പരാതി നൽകിയിട്ടും പൊലീസ് കേസെടുത്തില്ലെന്ന് യുവതി ആരോപിച്ചു. പരാതി പറയാനെത്തിയപ്പോൾ വഴക്കു പറഞ്ഞ് ഒഴിവാക്കുകയായിരുന്നുവെന്നാണ് യുവതി പറയുന്നത്. എന്നാൽ പീഡന ദൃശ്യങ്ങൾ വൈറലായതോടെയാണ് പൊലീസ് കേസെടുക്കാൻ തയ്യാറായതെന്നും യുവതി പറയുന്നു.

മൗ പൊലീസ് സ്റ്റേഷൻ പരിധിയിലാണ് യുവതി കൂട്ട മാനഭംഗത്തിന് ഇരയായത്. അതേസമയം വെള്ളിയാഴ്ച വൈകിട്ടാണ് യുവതി പരാതി നൽകിയതെന്നാണ് പൊലീസ് പറയുന്നത്.

കുടുംബാംഗത്തിനൊപ്പം ബന്ധുവീട്ടിലേക്ക് പോവുകയായിരുന്നു യുവതി. വഴിയിൽവെച്ച് ആറംഗസംഘം ഇവരെ തടഞ്ഞു. ഒപ്പമുണ്ടായിരുന്നയാളെ മരത്തിൽ കെട്ടിയിട്ട ശേഷമാണ് യുവതിയെ മാനഭംഗപ്പെടുത്തിയത്. ഇതിന്റെ ദൃശ്യങ്ങൾ മൊബൈലിൽ പകർത്തുകയും ചെയ്തു- മൗ പൊലീസ് സ്റ്റേഷനിലെ ഉദ്യോഗസ്ഥനായ അരുൺ പഥക് പറഞ്ഞു.

14 സെക്കൻഡ് ദൈർഘ്യമുള്ള പീഡനത്തിന്റെ ദൃശ്യങ്ങളാണ് സമൂഹമാധ്യമങ്ങളിൽ പ്രചരിക്കുന്നതെന്നും അദ്ദേഹം അറിയിച്ചു. ആറ് പേർക്കെതിരെ കേസെടുത്തതായും യുവതിയെ മെഡിക്കൽ പരിശോധനയ്ക്ക് വിധേയയാക്കിയതായും പൊലീസ് പറഞ്ഞു.