ദുരഭിമാനം: ബലാത്സംഗ ശ്രമത്തിൽ നിന്ന് രക്ഷപെട്ട മകളെ മാനഹാനി ഭയന്ന് കൊലപ്പെടുത്താൻ ശ്രമിച്ച് അച്ഛൻ

പട്ന: ബലാത്സംഗ ശ്രമത്തിൽ നിന്നും രക്ഷപെട്ട യുവതിയെ ദുരഭിമാനത്തിന്റെ പേരിൽ കൊല്ലാൻ ശ്രമിച്ച് പിതാവ്. ബിഹാറിലെ സസാറാമിൽ നടന്ന ഞെട്ടിക്കുന്ന സംഭവത്തെക്കുറിച്ച് പൊലീസാണ് ഇപ്പോൾ വെളിപ്പെടുത്തിയിരിക്കുന്നത്.

ഇക്കഴിഞ്ഞ ചൊവ്വാഴ്ചയാണ് ബിഹാറിലെ റോഹ്തസ് ജില്ലയിൽ ഇക്കഴിഞ്ഞ വ്യാഴാഴ്ചയാണ് യുവതിക്ക് നേരേ ബലാത്സംഗ ശ്രമം നടന്നത്. അ‍ഞ്ച് പേർ ചേർന്ന് നടത്തിയ പീഡനശ്രമം ഗ്രാമത്തിൽ ചെറിയ തോതിൽ വര്‍ഗ്ഗീയ പ്രശ്നങ്ങളും ഉയർത്തിയിരുന്നു.

പീഡന ശ്രമത്തിൽ നിന്ന് രക്ഷപെട്ട യുവതിക്ക് പിന്നീട് വീട്ടിൽ വച്ച് വെടിയേറ്റിരുന്നു. നേരത്തെ അക്രമിക്കാൻ ശ്രമിച്ച ആളുകൾ മാധ്യമപ്രവർത്തകര്‍ എന്ന വ്യാജെന വീട്ടിലെത്തി വെടിയുതിര്‍ക്കുകയായിരുന്നുവെന്നാണ് പിതാവ് പൊലീസിൽ മൊഴി നൽകിയത്. എന്നാൽ ഇതിൽ സംശയം തോന്നിയ പൊലീസ് വിശദമായ അന്വേഷണം നടത്തി.

തുടർന്നാണ് പിതാവ് തന്നെയാണ് മകളെ കൊലപ്പെടുത്താൻ ശ്രമിച്ചതെന്ന് തെളിഞ്ഞത്. പീഡന വാർത്ത പുറത്തറിഞ്ഞാലുള്ള മാനഹാനി ഭയന്നാണ് ഇയാൾ മകളെ ഇല്ലാതാക്കാൻ ശ്രമിച്ചതെന്നാണ് പൊലീസ് പറയുന്നത്. . കഴുത്തിന് വെടിയേറ്റ യുവതി ചികിത്സയിൽ തുടരുകയാണ്.

സംഭവവുമായി ബന്ധപ്പെട്ട് യുവതിയുടെ പിതാവിനെയും ഇയാള്‍ക്ക് ആയുധം നൽകിയ രണ്ട് പേരെയും പൊലീസ് അറസ്റ്റ് ചെയ്തു. യുവതിയെ പീഡിപ്പിക്കാൻ ശ്രമിച്ച  അഞ്ച് പേരെ നേരത്തെ തന്നെ അറസ്റ്റ് ചെയ്തിരുന്നു.