39 പേർ ചേർന്ന് പീഡിപ്പിച്ചെന്ന് യുവതിയുടെ പരാതി; വ്യാജ പരാതിയെന്ന് നാട്ടുകാർ

ബറേലി: 39 പേർ ചേർന്ന് പീഡനത്തിനിരയാക്കിയെന്ന് യുവതിയുടെ പരാതി. ഉത്തർപ്രദേശിലെ ബറേലിയിലെ 32കാരിയാണ് പരാതിയുമായി രംഗത്തെത്തിയിരിക്കുന്നത്. തിരിച്ചറിയാവുന്ന നാല് പേർക്കെതിരെയും തിരിച്ചറിയാത്ത 35 പേർക്കെതിരെയുമാണ് യുവതി പരാതി നല്‍കിയിരിക്കുന്നത്.

എന്നാൽ പരാതിക്കാരിക്കെതിരെ നാട്ടുകാർ പ്രതിഷേധവുമായി രംഗത്തെത്തി. യുവതിയുടെ പരാതി വ്യാജമാണെന്നാണ് നാട്ടുകാർ ആരോപിക്കുന്നത്. കടംവാങ്ങിയ പണം തിരികെ ആവശ്യപ്പെട്ടതിനെ തുടർന്നാണ് ഇത്തരത്തിലൊരു വ്യാജ പരാതിയുമായി എത്തിയിരിക്കുന്നതെന്നാണ് നാട്ടുകാർ പറയുന്നത്.

സംഭവത്തിൽ വ്യക്തമായ അന്വേഷണം നടത്തുമെന്നും ഒരു നിരപരാധി പോലും ശിക്ഷിക്കപ്പെടില്ലെന്നും സർക്കിൾ ഓഫീസർ അശോക് കുമാർ പറഞ്ഞു.

മദ്യപാനിയായ യുവതിയുടെ ഭർത്താവ് ഈ 39 പേരിൽ നിന്നായി 2.50 ലക്ഷം രൂപ കടം വാങ്ങിയിരുന്നു. വസ്തുവിൽക്കുമ്പോൾ തിരികെ നൽകാമെന്നാണ് പറഞ്ഞിരുന്നത്. വസ്തു വിറ്റിട്ടും പണം തിരികെ നൽകാത്തതിനെ തുടർന്ന് ഇവർ കാശ് ആവശ്യപ്പെട്ടിരുന്നു. ഇതിനു പിന്നാലെയാണ് യുവതിയെ ഉപയോഗിച്ച് പീഡന പരാതി നൽകിയത്. എന്നാണ് നാട്ടുകാരുടെ ആരോപണം.

ഡിസംബർ 17നാണ് യുവതി പരാതി നൽകിയത്. അമിത്, ശംഭു, ചാമൻ, പുഷ്പേന്ദ്ര എന്നിവര്‍ തന്നെ മർദിച്ചെന്നും പീഡനത്തിനിരയാക്കിയെന്നുമാണ് യുവതിയുടെ പരാതി. പീഡന ദൃശ്യങ്ങൾ മൊബൈലിൽ പകർത്തിയതായും പരാതിയിൽ ആരോപിക്കുന്നു. കഴിഞ്ഞ ഒരു വർഷത്തോളമായി 35 പേർക്കൊപ്പം കിടക്ക പങ്കിടാൻ ഇവർ നിർബന്ധിച്ചുവെന്നും പരാതിയിലുണ്ട്. ഇതിനു പുറമെ അമിത് വീട്ടിൽ നിന്ന് 50,000 രൂപ കവർന്നതായും യുവതി ആരോപിച്ചു.

യുവതിയുടെ പരാതിയിൽ അമിത്, ശംഭു, ചാമൻ, പുഷ്പേന്ദ്ര എന്നിവര്‍ക്കെതിരെയും കണ്ടാലറിയാത്ത 35 പേർക്കെതിരെയും പൊലീസ് കേസ് രജിസ്റ്റർ ചെയ്തു. എന്നാൽ ആരെയും ഇതുവരെ അറസ്റ്റ് ചെയ്തിട്ടില്ല.

യുവതിയെ മെഡിക്കൽ പരിശോധനയ്ക്ക് വിധേയയാക്കി. ഇതിന്റെ റിപ്പോർട്ട് ലഭിച്ചിട്ടില്ല. സംഭവത്തിൽ അന്വേഷണം പുരോഗമിക്കുകയാണെന്ന് പൊലീസ് പറഞ്ഞു. ഗ്രാമം വിട്ടു പോകണമെന്ന് നാട്ടുകാർ ഭീഷണിപ്പെടുത്തിയതായി മറ്റൊരു പരാതിയിൽ യുവതി വ്യക്തമാക്കുന്നു.