മോർഫ് ചെയ്ത ചിത്രങ്ങളുപയോഗിച്ച് നൂറോളം സത്രീകളെ ബ്ലാക്ക് മെയിൽ ചെയ്തു; 26കാരൻ പൊലീസ് വലയിൽ

ന്യൂഡൽഹി: മോർഫ് ചെയ്ത നഗ്ന ചിത്രങ്ങൾ സോഷ്യല്‍ മീഡിയയിൽ  പോസ്റ്റ് ചെയ്യുമെന്ന്  ഭീഷണിപ്പെടുത്തി സ്ത്രീകളിൽ നിന്ന് പണം തട്ടിയ വിരുതനെ ഒടുവിൽ പൊലീസ് പിടികൂടി. 26കാരനായ സുമിത് ഝാ ആണ് അറസ്റ്റിലായത്. ബികോം ബിരുദധാരിയായ യുവാവ് നൂറോളം സ്ത്രീകളെയാണ് ഭീഷണിപ്പെടുത്തിയതെന്ന് പൊലീസ് അന്വേഷണത്തിൽ വ്യക്തമായി.

പരാതി ലഭിച്ചതിന്റെ അടിസ്ഥാനത്തിലാണ് പൊലീസ് യുവാവിനെ രഹസ്യമായി നിരീക്ഷിച്ചത്. സ്വകാര്യ ബാങ്കിലെ മാനേജരും മാൾവിയ നഗർ സ്വദേശിയുമായ യുവതിയാണ് ആദ്യം പൊലീസിന് പരാതി നൽകിയത്. തന്റെ മോർഫ് ചെയ്ത നഗ്ന ചിത്രങ്ങൾ സോഷ്യൽ മീഡിയയിൽ പോസ്റ്റ് ചെയ്യുമെന്ന് ഭീഷണിപ്പെടുത്തി അപരിചിതൻ പണം ആവശ്യപ്പെടുന്നുവെന്നായിരുന്നു പരാതി.

തുടർന്ന് സോഷ്യൽമീഡിയ പ്ലാറ്റ്ഫോമുകളിൽ നിന്ന് സാങ്കേതിക വിവരങ്ങൾ ശേഖരിച്ചു. ഈ വിവരങ്ങളിൽ നിന്നാണ് നോ‍യിഡയിൽ താമസിക്കുന്ന യുവാവിനെ പൊലീസ് അറസ്റ്റ് ചെയ്തത്. തുടർന്നുള്ള അന്വേഷണത്തിലാണ് നൂറോളം സ്ത്രീകളിൽ നിന്ന് ഇയാൾ സമാന മാതൃകയിൽ പണം തട്ടാൻ ശ്രമിച്ചിരുന്നതായി പൊലീസ് കണ്ടെത്തിയത്.

സമൂഹമാധ്യമങ്ങളിൽ നിന്ന് സ്ത്രീകളുടെ ഫോട്ടോകൾ ഡൗൺലോഡ് ചെയ്യും. പിന്നീട് ഇവ മോർഫ് ചെയ്ത് നഗ്ന ചിത്രങ്ങളാക്കി മാറ്റും. പിന്നാലെ ഫേക്ക് പ്രൊഫൈൽ ഉണ്ടാക്കുകയും അതിലൂടെ പെൺകുട്ടിക്ക് ഭീഷണി സന്ദേശവും ഫോട്ടോയും അയച്ചുകൊടുക്കുകയും ചെയ്യും. പണം നൽകിയില്ലെങ്കിൽ പെൺകുട്ടിയുടെ അക്കൗണ്ട് ഹാക്ക് ചെയ്ത് അതുവഴി നഗ്ന ഫോട്ടോ അപ്ലോഡ് ചെയ്യുമെന്നാണ് ഭീഷണി.

അതേസമയം,  40 കാരനെ കള്ളനെന്ന് ആരോപിച്ച് തല്ലിക്കൊന്ന കേസിൽ രാജ്യതലസ്ഥാനത്ത് രണ്ട് പേര്‍ അറസ്റ്റിലായി. ഗാസിയാബാദ് സ്വദേശി സുനിൽ വർമയാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഖജൗരി ഖാസിലെ പ്രവീൺ കുമാർ (26), സോണിയാ വിഹാറിലെ മൻജീത്(26 )എന്നിവരാണ് അറസ്റ്റിലായത്.