RRR| രാജമൗലി ആദ്യം സമീപിച്ചത് ആലിയ ഭട്ടിനെ ആയിരുന്നില്ല; ആർആർആർ വേണ്ടെന്ന് വെച്ച അഞ്ച് നടിമാർ

രാജമൗലി (Rajamouli)ചിത്രത്തിന്റെ ഭാഗമായാൽ സിനിമാ ലോകത്ത് സ്ഥിരമായ ഇരിപ്പിടം കിട്ടിയെന്നാണ് അർത്ഥം. അപ്പോൾ രാജമൗലിയുടെ ബ്രഹ്മാണ്ഡ ചിത്രത്തിൽ നായിക പ്രാധാന്യമുള്ള വേഷം ചെയ്യാൻ അവസരം ലഭിച്ചാലോ? ബോളിവുഡിലെ സൂപ്പർ നടിമാർ പോലും കൊതിക്കുന്ന വേഷമായിരിക്കുമത്. പറഞ്ഞു വരുന്നത് പുതിയ ചരിത്രം കുറിച്ച രാജമൗലിയുടെ ആർആർആറിനെ (RRR)കുറിച്ചാണ്.

ബോളിവുഡിൽ ഏറ്റവും തിരക്കുള്ള നടിമാരിൽ ഒരാളായ ആലിയ ഭട്ടാണ് ചിത്രത്തിൽ നായികയായി എത്തിയത്. ചിത്രം പുറത്തിറങ്ങുന്നിതിനു മുമ്പുള്ള ഏറ്റവും പ്രധാന ആകർഷണങ്ങളിൽ ഒന്നായിരുന്നു ആലിയ ഭട്ടിന്റെ സാന്നിധ്യവും.

എന്നാൽ നായികയുടെ വേഷത്തിലേക്ക് ആലിയ ഭട്ടിനെ ആയിരുന്നില്ല രാജമൗലി ആദ്യം പരിഗണിച്ചത്. ചിത്രത്തിലെ സ്ത്രീ കഥാപാത്രങ്ങൾക്കായി സമീപിച്ച അഞ്ചോളം നടിമാർ പല കാരണങ്ങൾ കൊണ്ട് ചിത്രം വേണ്ടെന്നു വെച്ചിട്ടുണ്ട്.

‌ബോളിവുഡ് നടി ശ്രദ്ധ കപൂർ, കത്രീന കൈഫിന്റെ സഹോദരി ഇസബെൽ കൈഫ് അടക്കമുള്ള നടിമാർ ആർആർആർ പല കാരണങ്ങൾ കൊണ്ട് വേണ്ടെന്നു വെച്ചതായാണ് ഇന്ത്യ ടുഡേ റിപ്പോർട്ടിൽ പറയുന്നത്.

ചിത്രത്തിൽ ജൂനിയർ എൻടിആറിന്റെ നായികയായി ആർആർആർ ടീം ആദ്യം സമീപിച്ചത് ശ്രദ്ധ കപൂറിനെ ആയിരുന്നുവെന്നാണ് റിപ്പോർട്ടുകൾ. എന്നാൽ മറ്റ് പല ചിത്രങ്ങളുടേയും തിരക്കുകൾ ഉള്ളതിനാൽ ശ്രദ്ധ ആർആർആർ വേണ്ടെന്നു വെക്കുകയായിരുന്നു.

വിദേശ വനിതയുട വേഷ ചെയ്യാൻ ആദ്യം സമീപിച്ചത് കത്രീന കൈഫിന്റെ സഹോദരി ഇസബെൽ കൈഫിനെയായിരുന്നുവത്രേ. എന്നാൽ മുഴുവൻ തിരക്കഥയും ചിത്രത്തിന്റെ വിശദാംശങ്ങളും അറിയണമെന്ന ആവശ്യം അംഗീകരിക്കാത്തതിനെ തുടർന്നാണ് ഇസബെൽ ചിത്രത്തിൽ നിന്ന് പിന്മാറുന്നത്.

ഒലീവിയ മോറിസിന് മുമ്പ് ആ വേഷം ലഭിച്ചിരുന്നത് ഡെയ്സി എഡ്ഗർ ജോൺസ് എന്ന നടിക്കായിരുന്നു. എന്നാൽ സിനിമയുടെ ചിത്രീകരണം പലവട്ടം വൈകിയതോടെ ഡെയ്സി ചിത്രത്തിൽ നിന്ന് പിന്മാറി. ഒഴിവാക്കാനാകാത്ത കാരണങ്ങൾ കൊണ്ട് ചിത്രത്തിൽ നിന്ന് പിന്മാറുന്നുവെന്നായിരുന്നു ഡെയ്സി ഇൻസ്റ്റഗ്രാമിലൂടെ അറിയിച്ചത്.

ഡെയ്സി എഡ്ഗറുടെ പിന്മാറ്റത്തിനു ശേഷം ആ വേഷം ചെന്നെത്തിയത് ആമി ജാക്സണിലേക്കാണ്. എന്നാൽ ആ സമയത്ത് ആമി ഗർഭിണിയായതിനാൽ അതും നടന്നില്ല.

മറ്റൊരു രസകരമായ കാര്യം ആലിയ ഭട്ട് അവതരിപ്പിച്ച കഥാപാത്രത്തിന് ആദ്യം പരിഗണിച്ചിരുന്നത് ബോളിവുഡ് നടി പരിനീതി ചോപ്രയെ ആയിരുന്നുവെന്ന റിപ്പോർട്ടാണ്.