ഇനി ഭാവിയിൽ ഹാൻസിനോടുള്ള താത്പര്യം പോവുമോ എന്നറിയില്ല; കളിയാക്കിയവരുടെ വായടപ്പിക്കുന്ന പ്രതികരണവുമായി അഭിരാമി സുരേഷ്

മലയാളത്തിലെ ശ്രദ്ധേയരായ സെലിബ്രിറ്റി സഹോദരിമാരാണ് അമൃതയും അഭിരാമിയും. ഒന്നിച്ചു വേദികളിൽ നിന്നും സിനിമയിലേക്കും ബിഗ് ബോസ് വീട്ടിലേക്കും ഇവർ രണ്ടുപേരും തങ്ങളുടെ സാന്നിദ്ധ്യം അറിയിച്ചിട്ടുണ്ട്

ഇരുവരും ചേർന്ന് അമൃതംഗമയ എന്ന പേരിൽ ഒരു സംഗീത ബാൻഡുമായി നിരവധി പെർഫോമൻസുകൾ ചെയ്തുകഴിഞ്ഞു. കൂടാതെ താര സഹോദരിമാരുടെ വീഡിയോ ബ്ലോഗും ശ്രദ്ധേയമാണ്

എന്നിരുന്നാലും പലപ്പോഴായി സോഷ്യൽ മീഡിയയിലും മറ്റുമായി പലതരത്തിലും അവഹേളനം നേരിടേണ്ടി വന്നിട്ടുണ്ട് അഭിരാമിക്ക്. അടുത്തിടെ ഓരോരോ കമന്റുകൾ തിരഞ്ഞെടുത്ത് അഭിരാമി മറുപടി നൽകിയിരുന്നു. പക്ഷെ അവിടം കൊണ്ടും അവസാനിക്കില്ലെന്ന മട്ടിൽ കാര്യങ്ങൾ എത്തിയപ്പോൾ അഭിരാമി വീണ്ടും പ്രതികരിക്കുകയാണ്

ഓരോരുത്തരും വ്യത്യസ്‍തരായാണ് ജനിക്കുന്നത്. അഭിരാമിയുടെ കാര്യത്തിൽ താടിയെല്ല് അൽപ്പം മുന്നോട്ടായ പ്രോഗ്‌നാത്തിസം എന്ന അവസ്ഥയുണ്ട്. എന്നാൽ അതിന്റെ പേര് പറഞ്ഞു പോലും കളിയാക്കുന്നവർ ഉണ്ടെന്ന് അഭിരാമി. അടുത്തിടെ അഭിരാമിയുടെ അഭിമുഖം പ്രസിദ്ധീകരിച്ചു വന്ന ആർട്ടിക്കിളിന് താഴെ പോലും ഇമ്മാതിരി കമന്റുകൾ എത്തി. ശേഷം തന്റെ ഇൻസ്റ്റാഗ്രാം പേജിൽ അഭിരാമി തുറന്ന പ്രതികരണം നടത്തി

"ചുമ്മാ എന്റെ ചുണ്ടിനടിയിൽ ഹാൻസ് ഉണ്ടോ എന്നുള്ള കമന്റ് വായിച്ചു വായിച്ചു ഇപ്പൊ ബോറായി ... “സാധനം' “അഹങ്കാരി” “ജാടതെണ്ടി” മുതലായവ കേൾക്കുമ്പോ തോന്നിയിട്ടുണ്ട് എന്നെ യാതൊരു പരിചയവുമില്ലാതെ എന്തിനാണ് പ്രഹസനങ്ങൾ എന്ന്...

എന്തായാലും ഹാൻസും ശംഭുവും ഒകെ അവിടെ തന്നെ ഇരിക്കട്ടെ, ഭൂമിയിലേക്ക് പോന്നപ്പോൾ ദൈവം തന്നയച്ചതാ ... ഇപ്പൊ വരെ എടുത്ത് കളയാൻ തോനീട്ടില്ല, ഇനി ഭാവിയിൽ ഹാൻസിനോടുള്ള താല്പര്യം പോവുമോ എന്നുമറിയില്ല...

ആരെയും ഉപദ്രവിക്കാതെ ഇരിക്കുന്നവരെ കുത്തുമ്പോ എന്ത് സുഖമാണോ എന്തോ ചിലർക്ക് കിട്ടുന്നത്, അല്ലെ? ചിന്തിച്ചിട്ടുണ്ടോ?" തന്റെ കുറിപ്പിൽ അഭിരാമി ചോദിക്കുന്നു