Allu Arjun | പ്രതിഫലമായി വാഗ്ദാനം ചെയ്തത് കോടികള്‍; പുകയില പരസ്യത്തിനോട് 'നോ'പറഞ്ഞ് അല്ലു അര്‍ജുന്‍

തെലുങ്കിന് പുറമെ മറ്റ് ദക്ഷിണേന്ത്യന്‍ ഭാഷകളിലും നിരവധി ആരാധകരുള്ള താരമാണ് അല്ലു അര്‍ജുന്‍. ടോളിവുഡിന്‍റെ സ്റ്റൈലിഷ് സ്റ്റാര്‍ എന്നറിയപ്പെടുന്ന അല്ലുവിന് കേരളത്തിലും നിരവധി ആരാധകരുണ്ട്. കോടികള്‍ പ്രതിഫലം വാഗ്ദാനം ചെയ്ത ഒരു പുകയില ഉല്‍പ്പന്നത്തിന്‍റെ പരസ്യത്തില്‍ അഭിനയിക്കാനുള്ള ഓഫര്‍ താരം നിരസിച്ചെന്ന വാര്‍ത്തയാണ് സിനിമാ ലോകം ചര്‍ച്ച ചെയ്യുന്നത്.

എന്നാല്‍ ആരാധകര്‍ക്ക് തെറ്റായ മാതൃക സൃഷ്ടിക്കും എന്നതിനാല്‍ അദ്ദേഹം ഓഫര്‍ നിരസിക്കുകയായിരുന്നു. കോടികളാണ് കമ്പനി അല്ലുവിന് വാഗ്‍ദാനം ചെയ്‍തത്. രണ്ടാമതൊന്ന് ആലോചിക്കാതെയാണ് അല്ലു ഈ തീരുമാനം എടുത്തതെന്ന് അദ്ദേഹവുമായി അടുത്ത വൃത്തങ്ങളെ ഉദ്ധരിച്ച് ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.

പുകയില ഉല്‍പ്പന്നങ്ങള്‍ ഉപയോഗിക്കുന്ന ആളല്ല അല്ലു അര്‍ജുന്‍. ആയതിനാല്‍ അത്തരമൊരു ഉല്‍പ്പന്നത്തിന്‍റെ പരസ്യ മോഡല്‍ ആവുന്നതിനോട് അദ്ദേഹത്തിന് വിയോജിപ്പാണ് ഉള്ളതെന്നും അവര്‍ പറയുന്നു.

അടുത്തിടെ പുറത്തിറങ്ങിയ തന്‍റെ ചിത്രമായ പുഷ്പയില്‍ ഗംഭീര പ്രകടനം നടത്തിയ താരം . പുഷ്പ രാജ് എന്ന ചന്ദനക്കള്ളക്കടത്തുകാരന്‍റെ വേഷത്തിലാണ് എത്തിയത്. കഥാപാത്രത്തിന്‍റെ പൂര്‍ണതയ്ക്കായി സിനിമയില്‍ പുകവലിക്കുന്നുണ്ടെങ്കിലും വ്യക്തി ജീവിതത്തില്‍ അദ്ദേഹം പുകവലിയെ പിന്തുണയ്ക്കില്ല.

അല്ലു അര്‍ജുന്‍റെ കരിയറിലെ തന്നെ ഏറ്റവും ജനപ്രീതി നേടിയ കഥാപാത്രങ്ങളില്‍ ഒന്നായി മാറിയിരുന്നു പുഷ്പയിലെ ടൈറ്റില്‍ കഥാപാത്രം. സുകുമാര്‍ സംവിധാനം ചെയ്‍ത ആക്ഷന്‍ ത്രില്ലര്‍ ചിത്രത്തില്‍ ചന്ദനക്കടത്തുകാരനായിട്ടാണ് അല്ലു അര്‍ജുന്‍ അഭിനയിച്ചിരിക്കുന്നത്. പ്രതിനായകനായി എത്തിയത് മലയാളത്തിന്‍റെ ഫഹദ് ഫാസില്‍ ആയിരുന്നു. ഫഹദിന്‍റെ തെലുങ്ക് അരങ്ങേറ്റ ചിത്രം കൂടിയായിരുന്നു ഇത്.

വാർത്ത പുറത്തുവന്നതോടെ ആരാധകരടക്കം നിരവധിപേർ അല്ലുവിനെ അഭിനന്ദിച്ചെത്തി. ‘പുഷ്പ’ സിനിമയിലൂടെ ഇന്ത്യ മുഴുവൻ ആരാധകരെ സ്വന്തമാക്കിയ താരമാണ് അല്ലു അർജുൻ. സിനിമയുടെ ഹിന്ദി പതിപ്പും 200 കോടി ക്ലബ്ബിൽ ഇടം നേടിയിരുന്നു.