മൂന്ന് കോടിയുടെ മെയ്ബ ജിഎൽഎസ് 600 സ്വന്തമാക്കി ദുൽഖർ; ഇഷ്ടനമ്പർ കിട്ടാൻ മുടക്കിയത് 1.85 ലക്ഷം

മലയാള സിനിമയിലെ ഏറ്റവും വലിയ വാഹന പ്രേമികളാണ് മമ്മൂട്ടിയും മകൻ ദുൽഖർ സൽമാനും. വിന്റേജ് കാറുകളും സൂപ്പർ കാറുകളും സൂപ്പർ ബൈക്കുകളും തുടങ്ങിയ വാഹനങ്ങളുടെ ഒരു വലിയ ശേഖരം തന്നെ ദുൽഖറിന്റെ പക്കലുണ്ട്. അക്കൂട്ടത്തിലേക്ക് ഇതാ മെഴ്‌സിഡീസിന്റെ മറ്റൊരു താരം കൂടി എത്തിയിരിക്കുകയാണ്.

മെയ്ബ ജി.എല്‍.എസ് 600 ആണ് അദ്ദേഹം സ്വന്തമാക്കിയിരിക്കുന്നത്. മലയാള താരങ്ങളിലെ ആദ്യ മെയ്ബ ഉടമയാണ് ദുല്‍ഖര്‍.

രണ്‍വീര്‍ സിങ്ങ്, കൃതി സനോണ്‍, അര്‍ജുന്‍ കപൂര്‍, നീതു സിങ്ങ് തുടങ്ങിയ ബോളിവുഡ് താരങ്ങളും തെന്നിന്ത്യന്‍ സൂപ്പര്‍ താരം രാം ചരണ്‍ തുടങ്ങിയവരെല്ലാം അടുത്തിടെ ഈ വാഹനം സ്വന്തമാക്കിയിരുന്നു. ഏകദേശം മൂന്ന് കോടി രൂപയാണ് ഈ വാഹനത്തിന്റെ ഇന്ത്യയിലെ എക്‌സ്‌ഷോറൂം വില.

കഴിഞ്ഞ വർഷം ബെൻസ് ജി 63 എഎംജിയും ലാൻഡ് റോവർ ഡിഫൻഡറും ദുൽഖർ വാങ്ങിയിരുന്നു. അതിന് പിന്നാലെയാണ് മെയ്ബയുടെ അത്യാഡംബര എസ്‍യുവി. 1.85 ലക്ഷം രൂപ മുടക്കി ലേലത്തിലൂടെയാണ് അദ്ദേഹത്തിന്റെ ഇഷ്ടനമ്പറായ 369 സ്വന്തമാക്കിയതെന്നാണ് റിപ്പോര്‍ട്ട്.

കഴിഞ്ഞ ജൂണിലാണ് മെയ്ബയുടെ ആദ്യ എസ്‍യുവി ഇന്ത്യൻ വിപണിയിലെത്തിയത്. ജിഎൽഎസിൽ‌ നിരവധി ആഡംബര ഫീച്ചറുകൾ കൂട്ടിച്ചേർത്ത വാഹനമാണ് മെയ്ബ ജിഎൽഎസ് 600.