അപ്പൻ ഇപ്പൊ പോകണ്ടാന്നല്ലേ പറഞ്ഞത്; റേഷൻ വാങ്ങാൻ ഇറങ്ങിയ ഇന്നസെന്റിനെ വിലക്കി മകൻ

കോവിഡ് പ്രതിസന്ധിക്കിടെ സർക്കാർ നൽകുന്ന ഫ്രീ റേഷൻ വേണ്ടെന്നു വയ്ക്കാൻ പലരും തയാറല്ല. സിനിമാക്കാർ ഉൾപ്പെടെയുള്ളവർ റേഷൻ വാങ്ങുന്ന വാർത്ത പല ദിവസങ്ങളിലായി വാർത്തയായിട്ടുണ്ട്. പക്ഷെ അക്കൂട്ടത്തിലൊന്നും എം.പി.യും നടനുമായ ഇന്നസെന്റ് റേഷൻ വാങ്ങാൻ പോയ വാർത്ത വന്നിരുന്നില്ല. എന്നാൽ ഇന്നസെന്റ് റേഷൻ വാങ്ങാതിരുന്നതല്ല, മകൻ തടസം പറഞ്ഞതാണ് കാരണം. വനിത മാസികയ്ക്കു നൽകിയ അഭിമുഖത്തിൽ ഇന്നസെന്റ് ആ രസകരമായ സംഭവം വിവരിക്കുന്നു

ഇന്നസെന്റ് പറയുന്നു: "എന്റെ വീട്ടിൽ നിന്ന് നാലഞ്ച് കടകൾക്ക് അപ്പുറം ആണ് ഞങ്ങളുടെ റേഷൻകട. ഒരു ദിവസം ഞാൻ സഞ്ചിയും റേഷൻകാർഡും എടുത്തു വീട്ടിൽ നിന്നിറങ്ങിയപ്പോൾ മകൻ സോണറ്റ് ചോദിച്ചു 'അപ്പൻ ഇത് എങ്ങോട്ടാ?'. ഞാൻ പറഞ്ഞു 'റേഷൻ വാങ്ങാൻ. സർക്കാർ എല്ലാവർക്കും സൗജന്യമായി അരി കൊടുക്കുന്നുണ്ടല്ലോ... '

'അപ്പൻ ഇപ്പോ പോകണ്ട'. പെട്ടെന്ന് സോണറ്റിന്റെ മുഖം മണിച്ചിത്രത്താഴിലെ സുരേഷ് ഗോപിയെ പോലെ. ഞാനും വിട്ടില്ല. തിരിച്ചു ചോദിച്ചു. 'അതെന്താ ഞാൻ പോയാല്'...

'അത് ശരിയാകില്ല.' സോണറ്റ് കടുപ്പിച്ച് തന്നെയാണ്. അങ്ങനെ യാത്ര മുടങ്ങി. രണ്ടു ദിവസം കഴിഞ്ഞ് ഞാൻ അവനോടു ചോദിച്ചു. 'ഡാ, സൊണറ്റേ, നീ എന്തിനാടാ അപ്പന്റെ റേഷൻ കടയിൽ പോക്ക് മുടക്കിയത്?'

'അപ്പന്റെ ഉദ്ദേശം എനിക്ക് മനസ്സിലായി. അപ്പൻ റേഷൻ വാങ്ങാൻ പോയി എന്ന് പറഞ്ഞ് നാളെ പത്രത്തിൽ വാർത്ത വരണം. കുറച്ച് പബ്ലിസിറ്റി കിട്ടണം. അതു കഴിഞ്ഞ് മന്ത്രി സുനിൽകുമാർ അപ്പനെ കാണാൻ ഇവിടെ വരും. അതും വാർത്തയാക്കണം. അപ്പൻ അങ്ങനെ ആൾ ആകേണ്ട എന്ന് കരുതി തന്നെയാണ് ഞാൻ പോകണ്ട എന്നു പറഞ്ഞത്...'

'എന്റെ ഈശോയെ...' എന്നു വിളിച്ച് ഒരു നിമിഷം പകച്ചു നിന്നെങ്കിലും സമനില വീണ്ടെടുത്ത് ഞാൻ ഭാര്യയെ വിളിച്ചു പറഞ്ഞു. 'ആലീസേ, നമ്മുടെ ഒരു ഉരുപ്പടിയും മോശല്ലാട്ടോ' ഇന്നസെന്റ് വിവരിക്കുന്നു