നടൻ വിഷ്ണു ഉണ്ണിക്കൃഷ്ണൻ വിവാഹിതനാകുന്നു; വധു ഐശ്വര്യ

മലയാളസിനിമയിൽ ഇതാ വീണ്ടുമൊരു താരവിവാഹം. നടനും തിരക്കഥാകൃത്തുമായ നടൻ വിഷ്ണു ഉണ്ണിക്കൃഷ്ണൻ വിവാഹിതനാകുകയാണ്. വിവാഹനിശ്ചയം കഴിഞ്ഞു. ഐശ്വര്യയാണ് വിഷ്ണുവിന്‍റെ പ്രതിശ്രുത വധുവായി എത്തുന്നത്.

വിവാഹനിശ്ചയത്തിന്‍റെ ചിത്രങ്ങൾ സോഷ്യൽ മീഡിയ വഴിയാണ് പുറത്തുവന്നത്. ആശംസകൾ നേർന്ന് നടൻ ധർമജൻ ബോൾഗാട്ടി ഫേസ്ബുക്കിൽ ചിത്രങ്ങൾ പങ്കുവെച്ചു.

അതേസമയം, വിവാഹം എന്നത്തേക്കാണ് നിശ്ചയിച്ചിരിക്കുന്നത് എന്നത് സംബന്ധിച്ച് വ്യക്തതയില്ല. അടുത്ത ബന്ധുക്കളും സുഹൃത്തുക്കളും മാത്രമാണ് വിവാഹനിശ്ചയ ചടങ്ങിൽ പങ്കെടുത്തത്.

ബാലതാരമായി 2003 മുതൽ അഭിനയരംഗത്ത് വിഷ്ണു ഉണ്ട്. 2015ൽ പൃഥ്വിരാജ്, ഇന്ദ്രജിത്ത്, ജയസൂര്യ എന്നിവരെ നായകന്മാരാക്കി നാദിർഷ സംവിധാനം ചെയ്ത സിനിമയായ അമർ അക്ബർ അന്തോണിക്ക് വേണ്ടി ബിബിൻ ജോർജുമായി ചേർന്ന് തിരക്കഥ രചിച്ചു. കട്ടപ്പനയിലെ ഋത്വിക് റോഷനിൽ നായകനായി എത്തിയ വിഷ്ണു പിന്നീട് നിരവധി ചിത്രങ്ങളിൽ അഭിനയിച്ചു.