'ആ ജൂനിയര്‍ ഡോക്ടര്‍ എന്‍റെ കെട്ട്യോനാണ് സൂര്‍ത്തുക്കളെ' 'രോമാഞ്ച'ത്തിലെ നയന സിസ്റ്റര്‍

തിയേറ്ററുകളില്‍ ചിരിനിറച്ച ഈ വര്‍ഷത്തെ ആദ്യ സൂപ്പര്‍ ഹിറ്റ് ചിത്രമായ രോമാഞ്ചം സിനിമ കാണാത്തവര്‍ കുറവായിരിക്കും. തിയേറ്ററിന് പിന്നാലെ ഒടിടിയിലും സിനിമ കണ്ട പ്രേക്ഷകര്‍ക്ക് മറക്കാനാവാത്ത കഥാപാത്രമാണ് നഴ്സ് നയന. ബോധംകെട്ട് ആശുപത്രിക്കിടക്കയില്‍ കഴിയുന്ന സൗബിനെ പരിപരിക്കാനെത്തുന്ന നയന സിസ്റ്ററെ അവതരിപ്പിച്ചത് യുവ നടി ദീപിക ദാസ് ആണ്.

സിനിമയില്‍ വളരെ കുറച്ച് സമയം മാത്രമാണ് പ്രത്യക്ഷപ്പെടുന്നതെങ്കിലും ദീപികയും അഭിനയം ശ്രദ്ധിക്കപ്പെട്ടു. ഇപ്പോഴിതാ രോമാഞ്ചം സിനിമയിലെ മറ്റൊരു കൗതുകം പ്രേക്ഷകരുമായി പങ്കുവെച്ചിരിക്കുകയാണ് ദീപിക.

സിനിമയില്‍ സൗബിന്‍ അവതരിപ്പിക്കുന്ന ജിബിന്‍ മാധവന്‍ എന്ന കഥാപാത്രത്തെ പരിശോധിക്കാനെത്തുന്ന ഡോക്ടര്‍മാരുടെ സംഘത്തിലെ ജൂനിയര്‍ ഡോക്ടര്‍ തന്റെ ഭര്‍ത്താവാണെന്ന് വെളിപ്പെടുത്തിയിരിക്കുകയാണ് ദീപിക.

ജീവിത പങ്കാളികളായ ദീപികയും ഭര്‍ത്താവ് ശ്രീനാഥ് എരമവും സ്ക്രീനില്‍ നഴ്സും ഡോക്ടറുമായെത്തിയ കൗതുകം ദീപിക തന്നെയാണ് സോഷ്യല്‍ മീഡിയയിലൂടെ പങ്കുവെച്ചത്. 'അങ്ങനെ നയനയും ജൂനിയർ ഡോക്ടറും ഒന്നിക്കുകയാണ് സൂർത്തുക്കളെ that junior doctor is my kettyon....' എന്നാണ് ദീപിക ഫേസ്ബുക്കില്‍ കുറിച്ചത്.

ഷോര്‍ട് ഫിലിമുകളിലൂടെ സിനിമാരംഗത്ത് ശ്രദ്ധ നേടിയ ദീപിക കണ്ണൂരിലെ പ്രാദേശിക ന്യൂസ് ചാനലുകളില്‍ അവതാരകയായും  ജോലി ചെയ്തിട്ടുണ്ട്. കോവിഡ് കാലത്ത് ഹിറ്റായ‘കള്ളിക്കള്ളി മാസ്‌ക്’ എന്ന വിഡിയോയിലൂടെ ശ്രദ്ധ നേടിയ ദീപികയെ  ക്ലാസ്‌മേറ്റും ചിത്രത്തിന്റെ അസോഷ്യേറ്റ് ഡയറകടറുമായ ഷിഫ്‌ന ബബിന്‍ ആണ് രോമാഞ്ചത്തിലേക്ക് ക്ഷണിക്കുന്നത്.