സലിംകുമാറിനോട് മാപ്പ് പറഞ്ഞ് ജ്യോതികൃഷ്ണ; 'പക്വതയില്ലാത്ത പ്രായത്തിൽ സംഭവിച്ചു പോയതാണ്'

വർഷം മുൻപ് ഷൂട്ടിംഗ് സെറ്റിലുണ്ടായ സംഭവത്തിൽ നടൻ സലിം കുമാറിനോടു മാപ്പ് പറഞ്ഞ്നടി ജ്യോതികൃഷ്ണ. സലിംകുമാറുമായി സെറ്റിൽ വഴക്കുണ്ടാക്കിയതിനും പിണങ്ങിയതിനുമായി ജ്യോതി കൃഷ്ണ ഇപ്പോൾ മാപ്പ് ചോദിക്കുന്നത്.

പക്വതയില്ലാത്ത പ്രായത്തിൽ സംഭവിച്ചു പോയതാണെന്നാണ് നടി ഇപ്പോൾ പറയുന്നത്. പല തെറ്റുകളിലും ഈഗോ കാരണം സോറി പറയാതെ മുന്നോട്ടു പോകാറുണ്ട്. എന്നാൽ പിന്നീട് കുറേ കാലങ്ങൾ കഴിഞ്ഞാകും അന്ന് ചെയ്തത് ശരിയായില്ലെന്ന തോന്നൽ ഉണ്ടാകുന്നതെന്നും ജ്യോതി കൃഷ്ണ പറയുന്നു.

ഈഗോ മാറ്റിവച്ച് സോറി പറഞ്ഞാൽ മനസിനു തന്നെ സമാധാനം ഉണ്ടാകും. അത് കേൾക്കുന്നവർക്കും സന്തോഷം. ചില പ്രശ്‌നങ്ങള്‍ കൊണ്ട് അകന്നു പോയവരെ തിരിച്ചു പിടിക്കാന്‍ പറ്റിയിരുന്നെങ്കില്‍ എന്ന് തോന്നിയവരോടും മടിക്കാതെ സോറി പറഞ്ഞ് ജീവിതത്തിലേക്ക് തിരികെ കൊണ്ടുവരണമെന്നും ജ്യോതി പറയുന്നു.

"സലിം കുമാർ ചേട്ടനോടാണ് എനിക്ക് ആദ്യം സോറി പറയേണ്ടത്. 2013ല്‍ മൂന്നാം നാള്‍ ഞായറാഴ്ചയുടെ സെറ്റില്‍ വച്ച്‌ ഞാനും സലീമേട്ടനും തമ്മിൽ വഴക്കുണ്ടായി. എന്റെ പക്വതയില്ലായ്മ കൊണ്ടാണ് അത് സംഭവിച്ചത്. ചെറിയൊരു കാര്യത്തിൽ തുടങ്ങിയതാണ്. നല്ലരീതിയിലുള്ള വഴക്കായി മാറി.പിന്നീട് ഞങ്ങൾ പരസ്പരം മിണ്ടിയിട്ടില്ല.

അന്ന് സിനിമ കഴിഞ്ഞ് സെറ്റില്‍ നിന്ന് എല്ലാവരോടും യാത്ര പറഞ്ഞ് ഇറങ്ങിയപ്പോള്‍ സലിം കുമാര്‍ ചേട്ടനോട് മാത്രം യാത്ര പറഞ്ഞില്ല." അടുത്തുവന്ന് യാത്ര പറയുമെന്ന് അദ്ദേഹം പ്രതീക്ഷിച്ചിരുന്നു. ഇക്കാര്യം അദ്ദേഹം പിന്നീട് പറഞ്ഞതായി അറിഞ്ഞു. അന്ന് ചെയ്തത് ശരിയായില്ല. പ്രായത്തിന്റെ പക്വതക്കുറവും വാശിയും ഒക്കെയാകാം അതിനു കാരണം.

പിന്നീട് സലീമേട്ടൻ വളിക്കുകയും സംസാരിക്കുകയുമൊക്കെ ചെയ്തിട്ടുണ്ടെങ്കിലും ഒരു സോറി പറയാന്‍ പറ്റിയിരുന്നില്ല. ഇപ്പോൾ ഹൃദയത്തിന്റെ അടിത്തട്ടിൽ നിന്നും ക്ഷമ ചോദിക്കുകയാണെന്നും ജ്യോതികൃഷ്ണ പറഞ്ഞു.

വിവാഹ ശേഷം സിനിമയില്‍ നിന്നു മാറി നിന്ന ജ്യോതി ഇപ്പോള്‍ ദുബായില്‍ സ്ഥിരതാമസമാക്കിയിരിക്കുകയാണ്. നടി രാധികയുടെ സഹോദരന്‍ അരുണ്‍ ആനന്ദ് രാജയാണ് ജ്യോതി കൃഷ്ണയുടെ ഭര്‍ത്താവ്.