ചിരിയോർമകളിൽ കണ്ണുനീരിന്റെ നനവ് ബാക്കിയാക്കി സുബി യാത്രയായി; വിടചൊല്ലി കലാകേരളം

പ്രശസ്ത സിനിമ ടി വി സീരിയൽ താരം സുബി സുരേഷ് ഇനി ദീപ്ത സ്മരണ. എറണാകുളം ചേരനല്ലൂർ പൊതു ശ്‌മശാനത്തിൽ സംസ്കാര ചടങ്ങുകൾ നടന്നു. കണ്ണുനീരോടെയാണ് പ്രിയ താരത്തിന് നാട് വിട ചൊല്ലിയത്.

രാജഗിരി ആശുപത്രി മോർച്ചറിയിൽ നിന്ന് രാവിലെ എട്ട് മണിയോടെ മ്യതദേഹം വരാപ്പുഴയിലെ വീട്ടിൽ എത്തിച്ചപ്പോൾ മുതൽ അവസാനമായി ഒരു നോക്ക് കാണാൻ നിരവധി പേരാണ് എത്തിയത്. സുബിയുടെ അകാലവിയോഗത്തിലെ നടുക്കം മാറാതെ സ്ത്രീകളും കുട്ടികളും അടക്കമുള്ളവർ വിതുമ്പുന്നുണ്ടായിരുന്നു.

പ്രതിപക്ഷ നേതാവ് വി ഡി സതീശൻ , മുൻ മന്ത്രി എസ് ശർമ, ബിജെ പി നേതാവ് എ എൻ രാധാകൃഷ്ണൻ , സംവിധായകൻ സിദിഖ്, നിർമാതാവ് ആന്‍റോ ജോസഫ് തുടങ്ങി നാടിന്റെ നാനാ തുറകളിൽ നിന്നുള്ളവരാണ് അന്തിമോപചാരം അർപ്പിക്കാൻ എത്തിയത്.

വരാപ്പുഴ പുത്തൻപള്ളി ഓഡിറ്റോറിയത്തിൽ നിന്ന് മൂന്ന് മണിയോടെ സംസ്കാര ചടങ്ങുകൾക്കായി ചേരാനല്ലൂർ പാെതു ശ്മശാനത്തിലേക്ക് കാെണ്ടു പോയി. ബന്ധുക്കളും ഉറ്റ സുഹൃത്തുക്കളുടെയും സാന്നിധ്യത്തിൽ ആയിരുന്നു അവസാന ചടങ്ങുകൾ..

തങ്ങളുടെ പ്രിയപ്പെട്ട കൂട്ടുകാരിക്ക് കണ്ണീരോടെയാണ് പല സഹപ്രവർത്തകരും വിടപറഞ്ഞത്. സുബിയുടെ മൃതദേഹം കണ്ട തസ്നി ഖാൻ പൊട്ടിക്കരയുകയായിരുന്നു. അജു വർഗീസ്, പിഷാരടി, പേളി മാണി, അൻസിബ, ബീന ആന്റണി തുടങ്ങിയ നിരവധി താരങ്ങളും അന്ത്യാഞ്ജലി അർപ്പിക്കാൻ എത്തിയിരുന്നു.