ശ്രീവല്ലിയാകാൻ രശ്മികയേക്കാൾ കൂടുതൽ അനുയോജ്യ താൻ: ഐശ്വര്യ രാജേഷ്

തന്റെ പുതിയ ചിത്രം ഫർഹാനയുടെ പ്രമോഷൻ തിരക്കിലാണ് നടി ഐശ്വര്യ രാജേഷ്. ഇതിനിടയിലാണ് അല്ലു അർജുന്റെ പുഷ്പയിൽ രശ്മിക അവതരിപ്പിച്ച നായികാ കഥാപാത്രം തനിക്കാണ് കൂടുതൽ അനുയോജ്യമെന്ന ഐശ്വര്യയുടെ പരാരമർശം വാർത്തയാകുന്നത്.

പുഷ്പയിലെ ശ്രീവല്ലി രശ്മികയ്ക്ക് ഇന്ത്യ മുഴുവൻ ആരാധകരെ നേടിക്കൊടുത്ത കഥാപാത്രമാണ്. പുഷ്പയുടെ രണ്ടാം ഭാഗത്തിന്റെ ചിത്രീകരണവും പുരോഗമിക്കുകയാണ്.

ഇതിനിടയിലാണ് ഐശ്വര്യയുടെ പരാമർശം സോഷ്യൽമീഡിയയിൽ വൈറലാകുന്നത്. ഏത് സാഹചര്യത്തിലാണ് ഐശ്വര്യ രശ്മികയുടെ ശ്രീവല്ലിയെ കുറിച്ച് പറഞ്ഞതെന്ന് കൂടി അറിയാം.

തമിഴിൽ സജീവമായ ഐശ്വര്യ രാജേഷ് തെലുങ്കിൽ വിജയ് ദേവരകൊണ്ടയ്ക്കൊപ്പം വേൾഡ് ഫെയ്മസ് ലൗവർ എന്ന ഒരു ചിത്രത്തിൽ മാത്രമാണ് അഭിനയിച്ചത്. തെലുങ്കിൽ മികച്ച കഥാപാത്രങ്ങൾ ചെയ്യാൻ താത്പര്യമുണ്ടെന്ന് പറയുന്നതിനിടയിലാണ് ഐശ്വര്യ ശ്രീവല്ലിയെ കുറിച്ചും രശ്മികയെ കുറിച്ചും പറഞ്ഞത്.

തെലുങ്കിൽ നല്ല ഒരു ചിത്രത്തിലൂടെ തിരിച്ചുവരണമെന്നാണ് ആഗ്രഹം. തെലുങ്കിൽ വേരുകളുള്ള തന്റെ കുടുംബത്തിനും അത് അഭിമാനമാകും. വിജയ് ദേവരകൊണ്ടയ്ക്കൊപ്പം വേൾഡ് ഫെയ്മസ് ലൗവറിൽ അഭിനയിച്ചെങ്കിലും പ്രതീക്ഷിച്ച വിജയം നേടാനായില്ല.

പുഷ്പ പോലൊരു സിനിമയിൽ ക്ഷണം ലഭിച്ചിരുന്നെങ്കിൽ ഉറപ്പായും സ്വീകരിക്കുമായിരുന്നുവെന്നും ഐശ്വര്യ. ശ്രീവല്ലി എന്ന കഥാപാത്രത്തെ രശ്മിക മനോഹരമായിട്ടാണ് ചെയ്തത്. പക്ഷേ, ആ വേഷം തനിക്കായിരുന്നു കൂടുതൽ ചേരുക എന്ന് തോന്നിയിരുന്നു. ഐശ്വര്യ പറഞ്ഞതായി പിങ്ക് വില്ല റിപ്പോർട്ടിൽ പറയുന്നു.