Alia Bhatt| ഗംഗുഭായ് ആകാൻ ആലിയ ഭട്ട് വാങ്ങിയത് 20 കോടി; സഞ്ജയ് ലീല ബൻസാലി ചിത്രത്തിന് താരങ്ങൾക്ക് ലഭിച്ച പ്രതിഫലം അറിയാം

ബോളിവുഡിലെ സൂപ്പർ ഹിറ്റ് സംവിധായകൻ സഞ്ജയ് ലീല ബൻസാലിയും (Sanjay Leela Bhansali)ആലിയ ഭട്ടും (Alia Bhatt)ആദ്യമായി ഒന്നിച്ച ചിത്രമാണ് ഗംഗുഭായ് കത്തിയാവാഡി(Gangubai Kathiawadi). ഫെബ്രുവരി 25 ന് റിലീസ് ചെയ്ത ചിത്രം മികച്ച പ്രേക്ഷക പ്രതികരണം നേടി മുന്നേറുകയാണ്.

സഞ്ജയ് ലീല ബൻസാലിയുടെ ഇതുവരെയുള്ള ചിത്രങ്ങളിൽ ഏറ്റവും മുതൽമുടക്കുള്ള ചിത്രമാണ് ഗംഗുഭായ് എന്നാണ് കരുതുന്നത്. ഒപ്പം ആലിയ ഭട്ടിന്റെ ശക്തമായ കഥാപത്രങ്ങളിലൊന്നുമാണ് ഗംഗുഭായ്.

ബൻസാലി ചിത്രങ്ങളുടെ മുഖ്യ ആകർഷകങ്ങളായ വർണാഭമായ സെറ്റും പാട്ടുകളും വസ്ത്രധാരണവുമെല്ലാം ഗംഗുഭായിയിലും കാണാം. നൂറ് കോടിക്ക് മുകളിലാണ് ചിത്രത്തിന്റെ ബജറ്റ് എന്നാണ് റിപ്പോർട്ടുകൾ.

പുതുതായി വന്ന റിപ്പോർട്ടുകൾ ആലിയ ഭട്ടിന്റെ പ്രതിഫലത്തെ കുറിച്ചാണ്. ഗംഗുഭായ് ആയി വേഷമിടാൻ ആലിയ ഭട്ടിന് ലഭിച്ച പ്രതിഫലത്തെ കുറിച്ചുള്ള ചർച്ചകളാണ് നടന്നു കൊണ്ടിരിക്കുന്നത്.

ബൻസാലിയുടെ കടുത്ത ആരാധികയാണ് താനെന്ന് നേരത്തേ പലവട്ടം ആലിയ ഭട്ട് തുറന്നു പറഞ്ഞിരുന്നു. ഒമ്പത് വയസ്സുള്ളപ്പോൾ തന്നെ സഞ്ജയ് ലീല ബൻസാലി ചിത്രത്തിൽ അഭിനയിക്കാൻ ആഗ്രഹിച്ചിരുന്നതായി ആലിയ പറഞ്ഞിരുന്നു.

വാർത്തകൾ അനുസരിച്ച് 20 കോടിയാണ് ആലിയ ഭട്ട് ഗംഗുഭായിക്ക് വേണ്ടി പ്രതിഫലമായി വാങ്ങിയത്. ചിത്രത്തിൽ അതിഥി വേഷത്തിലാണെങ്കിലും സുപ്രധാന കഥാപത്രമായി എത്തിയ അജയ് ദേവഗണും വമ്പൻ തുകയാണ് പ്രതിഫലമായി ലഭിച്ചത്.

ഗംഗുഭായിയിൽ റഹിം ലാലയുടെ കഥാപാത്രമാണ് അജയ് ദേവഗൺ അവതരിപ്പിച്ചത്. മുഴുനീള വേഷമല്ലെങ്കിൽ കൂടി 11 കോടി രൂപയാണത്രേ അജയ് ദേവഗണിന് പ്രതിഫലമായി നൽകിയത്.

ഹുസൈന്‍ സെയ്ദി, ജെയിന്‍ ബോര്‍ഗസ് എന്നിവര്‍ രചിച്ച 'മാഫിയ ക്വീന്‍സ് ഓഫ് മുംബൈ; സ്റ്റോറീസ് ഓഫ് വിമണ്‍ ഫ്രം ദ ഗ്യാങ്ലാന്‍ഡ്സ്' എന്ന പുസ്തകത്തിലെ ഒരു അധ്യായമാണ് സഞ്ജയ് ലീല ബൻസാലി ചലച്ചിത്രരൂപത്തിലാക്കിയത്. ബോംബെ നഗരത്തെ വിറപ്പിച്ച 13 സ്ത്രീകളുടെ ജീവിത കഥയാണ് പുസ്തകം.