വയസ്സ് 41, സ്വന്തമാക്കിയത് 32 ഗ്രാമി പുരസ്കാരങ്ങൾ; ചരിത്രത്തിൽ ബിയോൺസെ

ഗ്രാമി പുരസ്കാര വേദിയിൽ തിളങ്ങി ഗായിക ബിയോൺസെ. ലോക സംഗീതത്തിലെ ഏറ്റവും ഉയർന്ന പുരസ്കാരമായാണ് ഗ്രാമിയെ വിശേഷിപ്പിക്കുന്നത്. ലോസാഞ്ചൽസിൽ കഴിഞ്ഞ ദിവസം നടന്ന 65ാമത് ഗ്രാമി പുരസ്കാര വേദിയിൽ നാലെണ്ണമാണ് ബിയോൺസെ സ്വന്തമാക്കിയത്. (image: Instagram)

ഇതോടെ ചരിത്രത്തിൽ ഏറ്റവും കൂടുതൽ ഗ്രാമി നേടുന്ന കലാകാരിയെന്ന ബഹുമതിയും ബിയോൺസ് തന്റെ പേരിലാക്കി. വെറും 41 വയസ്സിനുള്ളിൽ 32 ഗ്രാമി നേട്ടങ്ങളാണ് ബിയോൺസ് നേടിയത്. (Image: Instagram)

കരിയറിലെ ഏഴാമത് സോളോ ആൽബമായ 'റിനൈസെൻസ്' നാണ് ബിയോൺസെ നാല് ഗ്രാമികൾ വാരിക്കൂട്ടിയത്. ആൽബത്തിലെ 'കട്ട് ഇറ്റ്' എന്ന ഗാനത്തിന് ബെസ്റ്റ് R&B വിഭാഗത്തിലും, മികച്ച ഡാൻസ്/ഇലക്ട്രോണിക് റെക്കോർഡിങ്, ട്രഡീഷണൽ R&B പെർഫോമൻസ് നേട്ടവും ആൽബത്തിന് മികച്ച ഡാൻസ്/ഇലക്ട്രോണിക്സ് പുരസ്കാരവുമാണ് നേടിയത്. (Image: Instagram)

ഗ്രാമി നേട്ടങ്ങൾക്കു പിന്നാലെ മാതാപിതാക്കൾക്കും കുടുംബത്തിനും നന്ദി പറഞ്ഞ ബിയോൺസെ ക്വീർ കമ്യൂണിറ്റിക്കും തന്റെ നന്ദിയും കടപ്പാടും അറിയിച്ചു. (Image: Instagram)

തൊണ്ണൂറുകളുടെ അവസാനത്തിലാണ് ബിയോൺസെ അമേരിക്കൻ സംഗീതരംഗത്തേക്ക് എത്തുന്നത്. പെൺകുട്ടികളുടെ സംഗീത ബാൻഡായ ഡെസ്റ്റിന്യ്‌'സ്‌ ചൈൽഡിലെ അംഗമായിരുന്ന ബിയോൺസെ പിന്നീട് സോളോ ആൽബങ്ങൾ പുറത്തിറക്കാൻ തുടങ്ങി. (Image: Instagram)

2003 ലാണ് ബിയോൺസെയുടെ ആദ്യ സോളോ ആൽബം 'ഡെയ്ഞ്ചറസ്ലി' പുറത്തിറങ്ങുന്നത്. അഞ്ച് ഗ്രാമി അവാർഡുകളാണ് ഈ ആൽബത്തിലൂടെ ബിയോൺസെ നേടിയത്. ചരിത്ര വിജയമാണ് ആദ്യ ആൽബത്തിലൂടെ തന്നെ അവർ സ്വന്തമാക്കിയത്. ആ വർഷം ബിൽബോർഡ് ടോപ് 100 ചാർട്ടിലെ ആദ്യ രണ്ട് സ്ഥാനങ്ങൾ ആൽബത്തിലെ ഗാനങ്ങൾക്കായിരുന്നു.

2008 ൽ ബിയോൺസെയുടെ മൂന്നാമത്തെ ആൽബമായ അയാം... സാഷ ഫിയേഴ്സ് 6 ഗ്രാമികളാണ് നേടിക്കൊടുത്തത്. ഇതോടെ ഒരു വർഷം ഏറ്റവും കൂടുതൽ ഗ്രാമി നേടുന്ന ഗായിക എന്ന നേട്ടവും ബിയോണ്‍സിനെ തേടിയെത്തി. ഇതുവരെ 88 ഗ്രാമി നോമിനേഷനുകളാണ് വിവിധ വിഭാഗങ്ങളിലായി ബിയോൺസേയ്ക്കുള്ളത്. (image: Instagram)