Rashmika Mandanna| 'കുട്ടിക്കാലം തൊട്ടുള്ള ഇഷ്ടം'; ഇഷ്ട നടൻ ആരെന്ന് വെളിപ്പെടുത്തി രശ്മിക മന്ദാന

തെന്നിന്ത്യൻ സിനിമയിൽ ഏറ്റവും കൂടുതൽ ആരാധകരുള്ള യുവ നട‌ി രശ്മിക മന്ദാന (Rashmika Mandanna)ഇന്ന് 26ാം പിറന്നാൾ ആഘോഷിക്കുകയാണ്(rashmika mandanna birthday). കന്നഡ സിനിമയിലൂടെ അഭിനയ ലോകത്ത് എത്തിയ ഈ കൊടക് സ്വദേശി തെലുങ്ക്, തമിഴ് സിനിമകളിലൂടെ നിരവധി ആരാധകരെയാണ് സ്വന്തമാക്കിയത്.

ഇപ്പോൾ ബോളിവുഡിൽ ചുവടുറപ്പിക്കാനുള്ള ഒരുക്കത്തിലാണ് രശ്മിക. ബോളിവുഡിലെ ആദ്യ ചിത്രം മിഷൻ മജ്നു ഈ വർഷം പുറത്തിരങ്ങാനിരിക്കുകയാണ്. രൺബീർ കപൂറിന്റെ നായികയായും പുതിയ ചിത്രത്തിൽ രശ്മിക എത്തുന്നുണ്ട്.

'ഇന്ത്യയുടെ നാഷണൽ ക്രഷ്' എന്നാണ് ആരാധകർ രശ്മികയെ വിശേഷിപ്പിക്കുന്നത്. രാജ്യത്ത് നിരവധി യുവാക്കളുടെ ഇഷ്ടതാരമായ രശ്മികയുടെ ഇഷ്ടതാരം ആരായിരിക്കും? തനിക്ക് ആരാധനയും ഇഷ്ടവും തോന്നിയ നടൻ ഏതാണെന്ന് രശ്മിക തന്നെ ഒടുവിൽ തുറന്നു പറഞ്ഞിരിക്കുകയാണ്.

തെലുങ്ക് സിനിമ ഭീഷ്മയുടെ പ്രമോഷൻ പരിപാടിക്കിടെ അവതാരികയാണ് രശ്മികയോട് ആ ചോദ്യം ചോദിച്ചത്. രശ്മികയ്ക്ക് ക്രഷ് തോന്നിയത് ആരോടാണ്? അതിന് രശ്മികയുടെ മറുപടി‌ ഇങ്ങനെ,

കുട്ടിക്കാലം തൊട്ട് ദളപതി വിജയിയേണ് താൻ ഇഷ്ടപ്പെട്ടത്. അദ്ദേഹമാണ് തന്റെ ക്രഷ്. എന്നെങ്കിലും വിജയ്ക്കൊപ്പം ഒരു ചിത്രത്തിൽ അഭിനയിക്കാനാകുമെന്ന പ്രതീക്ഷയിലാണ് താനെന്നും രശ്മിക പറഞ്ഞു. ‌

സുഹൃത്തായും കാമുകനായും ഭർത്താവായും മൂന്ന് സെലിബ്രിറ്റികളെ തിരഞ്ഞെടുക്കാനുള്ള ചോദ്യത്തിനും രശ്മിക രസകരമായി മറുപടി പറഞ്ഞു.

തെലുങ്ക് താരം നിതിനെയാണ് രശ്മിക സുഹൃത്തായി തിരഞ്ഞെടുത്തത്. പക്ഷേ, കാമുകനായും ഭർത്താവായും തനിക്ക് വിജയെ മതിയെന്നായിരുന്നു രശ്മികയുടെ മറുപടി.

അതേസമയം, വിജയ്ക്കൊപ്പം അഭിനയിക്കണമെന്ന രശ്മികയുടെ ആഗ്രഹം പൂവണിയുകയാണെന്നാണ് കോളിവുഡിൽ നിന്നുള്ള റിപ്പോർട്ടുകൾ. വംശി പൈഡിപ്പള്ളി സംവിധാനം ചെയ്യുന്ന വിജയ് ചിത്രം ദളപതി66 ൽ രശ്മിക നായികയാകുമന്നാണ് വാർത്തകൾ.

ചിത്രത്തിന്റെ അണിയറ പ്രവർത്തകർ ഇക്കാര്യം ഔദ്യോഗികമായി സ്ഥിരീകരിച്ചിട്ടില്ലെങ്കിലും രശ്മിക തന്നെ നായികയായി എത്തുമെന്നാണ് വാർത്തകൾ. പൂജ ഹെഗ്ഡെ, കിയാര അദ്വാനി എന്നീ നടിമാരെ പരിഗണിച്ച ശേഷമാണത്രേ നിർമാതാക്കൾ വിജയ് ചിത്രത്തിലെ നായികയായി രശ്മികയെ തീരുമാനിച്ചത്.