ദീദിയെപ്പോലെ ബഹുമാനിതയായ ഒരാൾ സദ്ദാംഹുസൈനെപ്പോലെ പെരുമാറുന്നതെന്തിനെന്ന് മനസിലാകുന്നില്ല; മമതക്കെതിരെ വിവേക് ഒബ്റോയ്

ന്യൂഡൽഹി: പശ്ചിമബംഗാൾ മുഖ്യമന്ത്രി മമതാ ബാനർജിക്കെതിരെ വിമർശനവുമായി ബോളിവുഡ് താരം വിവേക് ഒബ്റോയ് രംഗത്ത്.

മമത ഇറാഖിലെ സ്വേച്ഛാധിപതിയായിരുന്ന സദ്ദാംഹുസൈനെപ്പോലെ പെരുമാറുന്നത് എന്തിന് വിവേക് ഒബ്റോയ് ചോദിച്ചു. ട്വിറ്ററിലൂടെയാണ് അദ്ദേഹത്തിന്റെ പ്രതികരണം.

ഡൽഹി ബിജെപി വക്താവ് തേജീന്ദർപാൽ സിംഗ് ബാഗയെ കൊൽക്കത്ത ഹോട്ടൽ മുറിയിൽ നിന്ന് അറസ്റ്റ് ചെയ്തതിലും മമത ബാനർജിയുടെ ചിത്രം മോർഫ് ചെയ്തതിന് അറസ്റ്റിലായ ബിജെപി യൂത്ത് വിംഗ് കൺവീനർ പ്രിയങ്ക ശർമയെ സുപ്രീംകോടതി ജാമ്യം നൽകിയിട്ടും 18 മണിക്കൂറോളം കസ്റ്റഡിയിൽ സൂക്ഷിച്ചതിലും അതൃപ്തി അറിയിച്ചു കൊണ്ടാണ് താരത്തിന്റെ ട്വീറ്റ്.

കൊൽക്കത്തയിൽ മമത ബാനർജിയുടെ ഭരണത്തിനു കീഴിൽ ജനാധിപത്യം ഭീഷണി നേരിടുകയാണെന്നും അപകടാവസ്ഥയിലാണെന്നും അദ്ദേഹം ട്വീറ്റ് ചെയ്തു.

ദീദിയെപ്പോലെ ബഹുമാനിതയായ ഒരാൾ എന്തുകൊണ്ട് സദ്ദാം ഹുസൈനെപ്പോലെ പെരുമാറുന്നുവെന്ന് മനസിലാകുന്നില്ലെന്നും വിവേക് ഒബ്റോയ് വ്യക്തമാക്കി. പ്രിയങ്ക ശർമ, തേജിന്ദർ ബാഗ, സേവ് ബംഗാൾ സേവ് ഡെമോക്രസി എന്നീ ഹാഷ് ടാഗുകളിലാണ് വിവേക് ഒബ്റോയ് ട്വീറ്റ് ചെയ്തിരിക്കുന്നത്.

നേരത്തെ സ്വതന്ത്ര ഇന്ത്യയിലെ ആദ്യ ഭീകരവാദി ഒരു ഹിന്ദുവാണെന്ന കമൽ ഹാസന്റെ പരാമർശത്തിനെതിരെയും ഒബ്റോയ് രംഗത്തെത്തിയിരുന്നു. രാജ്യത്തെ വിഭജിക്കാൻ ശ്രമിക്കരുതെന്ന് ഒബ്റോയ് ആവശ്യപ്പെട്ടു.