ഇനി ബോളിവുഡിന്റെ കളി അങ്ങ് വെള്ളിത്തിരയിൽ; 2020 കാത്തിരിക്കുന്നത് അരഡസനിൽ പരം സ്പോർട്സ് ചിത്രങ്ങൾ

ക്രിക്കറ്റ്, ഫുട്ബോൾ, ഷൂട്ടിംഗ്, ബാഡ്മിന്റൺ, ബോക്സിങ് ഒക്കെ കാണണമെങ്കിൽ സ്റ്റേഡിയം വരെ പോകേണ്ട കാര്യമില്ല. എല്ലാം വെള്ളിത്തിരയിൽ തന്നെ നിങ്ങൾക്ക് കാണാം. ഇന്ത്യൻ കായിക പ്രേമികളുടെ മനമറിഞ്ഞ് വിളമ്പാൻ തയാറെടുത്തിരിക്കുന്ന ഒരു പിടി ചിത്രങ്ങൾ 2020 കഴിയും മുന്നേ അവതരിപ്പിക്കാൻ ബോളിവുഡ് തയ്യാറെടുത്തുകഴിഞ്ഞു

ഇന്ത്യൻ ക്രിക്കറ്റിന് എക്കാലവും അഭിമാനിക്കാവുന്ന ഓർമ്മകൾ സമ്മാനിച്ചു കടന്നു പോയ വർഷമാണ് 1983. കപിൽ ദേവിന്റെ നേതൃത്വത്തിലുള്ള ഇന്ത്യൻ ടീം ആദ്യമായി ക്രിക്കറ്റ് ലോകകപ്പിൽ മുത്തമിട്ട വർഷം. ആ കഥ പറയുന്ന ചിത്രം ഏപ്രിലിൽ തിയേറ്ററിലെത്തും. കപിൽ ദേവായി രൺവീർ സിംഗ് വേഷമിടുന്നു

പ്രിയപ്പെട്ട 'ദാദ'യുടെ കഥ സിനിമയിൽ വരുന്നത് കാണാൻ കാത്തിരിക്കുന്നവരുണ്ടോ? എങ്കിൽ അത് ഈ വർഷം തന്നെ സാധ്യമായേക്കും. സൗരവ് ഗാംഗുലിയുടെ കഥ നിർമ്മിക്കാൻ കരൺ ജോഹർ ആവും എത്തുക എന്ന് പിന്നാമ്പുറ ചർച്ചകൾ സജീവമാണ്

ടെണ്ടുൽക്കർ ആരാധകർക്കും കപിൽ ദേവ് ആരാധകർക്കുമൊക്കെ പ്രിയപ്പെട്ടവൾ ആവാൻ ക്രീസിൽ ബാറ്റും കൊണ്ടിറങ്ങിയ പെൺപുലി; മിതാലി രാജ്. ഇന്ത്യൻ ക്രിക്കറ്റിന് മറ്റൊരു മുഖം സമ്മാനിച്ച മിഥാലിയാവുന്നത് തപ്‌സി പന്നു. 'സബാഷ് മിതു' എന്നാണ് ചിത്രത്തിനു പേര്

ഒരു വെടിയൊച്ചയോടു കൂടിയാണ് ആദ്യമായി ഇന്ത്യ ഒളിമ്പിക്സിൽ വ്യക്തിഗത സ്വർണ്ണം നേടുന്നത്. 2008 സമ്മർ ഒളിമ്പിക്സിൽ 10 മീറ്റർ എയർ റൈഫിളിൽ രാജ്യത്തെ ആകമാനം പ്രകമ്പനം കൊള്ളിച്ച അഭിനവ് ബിന്ദ്രയായി താര പുത്രൻ ഹർഷവർധൻ കപൂർ വെള്ളിത്തിരയിലെത്തും. ചിത്രത്തിന് പേര് 'ബിന്ദ്ര'

പരിണീതി ചോപ്ര നായികയാവുന്ന സൈന വാർത്തകളിൽ ഇടം നേടിക്കഴിഞ്ഞു. സ്ക്രീനിലെ ബാഡ്മിന്റൺ ഇതിഹാസം സൈന നെവാളായി മാറാൻ കഠിന പ്രയത്നത്തിലാണ് പരിണീതി

ആധുനിക ഇന്ത്യൻ ഫുട്ബോളിന്റെ ശില്പി സയ്ദ് അബ്ദുൽ റഹീമിന്റെ ജീവിത കഥ പറയുന്ന സിനിമ 'മൈദാനിൽ' നായകനാവുന്നത് അജയ് ദേവ്ഗൺ. 2020 നവംബറിൽ റിലീസ് പ്രതീക്ഷിക്കുന്നു

ഇന്ത്യൻ ബോക്സിങ് ഇതിഹാസം എന്ന പേര് മറ്റാർക്കും അവകാശപ്പെടാനാവാതെ ഒരു പതിറ്റാണ്ടോളം ഇന്ത്യൻ ബോക്സിങ് മേഖലയെ പടുത്തുയർത്തിയ ഹവാ സിംഗ്. ഏഷ്യൻ ഗെയിംസിൽ പലവുരു സ്വർണ്ണം വാരിക്കൂട്ടി പേര് പോലെ തന്നെ കാറ്റായി, കൊടുങ്കാറ്റായി മാറിയ ഹവ സിംഗിന്റെ ആ കഥ പറയുമ്പോൾ നായകനായി എത്തുന്നത് സൂരജ് പഞ്ചോളി. നിർമ്മാണം: സൽമാൻ ഖാൻ