എന്റെയും മറിയത്തിന്റെയും വീട്ടിൽ വന്ന് തീരുമാനം മാറ്റാൻ ശ്രമിച്ചവരുണ്ട്; വിവാഹത്തെ പറ്റി ചെമ്പൻ വിനോദ് ജോസ്

45കാരനായ ചെമ്പൻ വിനോദ് ജോസ്, സൈക്കോളജിസ്റ്റായ ഭാര്യ മറിയത്തിന് പ്രായം 25 വയസ്സ്. ലോക്ക്ഡൗണിനിടെ ഏപ്രിൽ 28ന് ഒരു സോഷ്യൽ മീഡിയ പോസ്റ്റിലൂടെയാണ് ചെമ്പൻ വിവാഹക്കാര്യം ഏവരെയും അറിയിച്ചത്. എന്നാൽ ഈ പ്രതിസന്ധിക്കാലഘട്ടത്തിലും ചെമ്പന് നേരെയുള്ള വിമർശനത്തിന് കുറവൊന്നുമുണ്ടായില്ല. 'ചെറിയ പെണ്ണിനെ' കെട്ടിയതാണ് വിമർശകരുടെ പ്രശ്നം. എന്നാലിപ്പോൾ ചെമ്പൻ എല്ലാത്തിനും മറുപടി നൽകുന്നു

'വിവാഹത്തിന് സ്ത്രീക്കും പുരുഷനും ഇടയിലെ പ്രായവ്യതാസം ഇത്രയും ആയിരിക്കണം എന്ന് നിയമവും ഉണ്ടോ എന്നറിയില്ല. ഇരുപത്തി അഞ്ചു വയസുള്ള ഒരു പെൺകുട്ടിക്ക് സ്വന്തമായി തീരുമാനം എടുക്കാൻ അറിയില്ലെന്ന് ആരെങ്കിലും പറയുമോ. ഒരു പൈങ്കിളി പ്രണയം ആയിരുന്നില്ല ഞങ്ങളുടേത്...

'സൗഹൃദം വളർന്നു എപ്പോഴോ പ്രണയമായി മാറി. വിട്ടു പോകില്ല എന്ന് തോന്നിയപ്പോൾ വിവാഹിതരാകാൻ തീരുമാനിച്ചു. കല്യാണം കഴിഞ്ഞപ്പോഴാണ് ആദ്യം പ്രണയം പറഞ്ഞത് ആരാണെന്നുള്ള ചോദ്യം ഞങ്ങൾക്കിടയിൽ വന്നത്. അതിനെ പറ്റിയുള്ള ചർച്ച നടന്നു കൊണ്ടിരിക്കുകയാണ്. അതൊരു കുടുംബകലഹത്തിലേക്ക് പോകും എന്ന് തോന്നിയപ്പോൾ നിർത്തി. ആര് ആദ്യം പറഞ്ഞാലും ഞാനും അവളും പെട്ടു. അതാണ് സത്യം...

എന്റെയും മറിയത്തിന്റെയും വീട്ടിൽ വന്നു തീരുമാനം മാറ്റാൻ ശ്രമിച്ചവരുണ്ട്. “ഇത്ര ചെറിയ പെണ്ണിനെ ഇവൻ കെട്ടുന്നത് ശെരിയാണോ” എന്ന ചോദ്യവുമായി വന്നവരോട് എന്റെ അപ്പനും അമ്മയും പറഞ്ഞത് ” എത്രകാലം അവൻ ഒറ്റക്ക് ജീവിക്കും.? അവനു ഇഷ്ടമുള്ള ഒരാളെ കല്യാണം കഴിച്ചു ജീവിക്കട്ടെ “എന്നായിരുന്നു...

'ആളുകളെ കൊണ്ട് നല്ലത് പറയിക്കാമെന്നു വിചാരിച്ചാലും സമൂഹത്തെ തൃപ്തിപ്പെടുത്താൻ കഴിയില്ല. പക്ഷെ ഞങ്ങൾക്ക് പരസ്പരം തൃപ്തിപ്പെടുത്താൻ പറ്റും, സമൂഹത്തെ ബുദ്ധിമുട്ടിക്കാതെ.' ചെമ്പന്റെ വാക്കുകൾ

റെജിസ്ട്രർ ഓഫീസിൽ പതിപ്പിച്ച വിനോദിന്റെയും മറിയത്തിന്റെയും വിവാഹ നോട്ടീസാണ് ഇവർ വിവാഹിതരാവുന്നു എന്ന വാർത്ത പുറത്തുവരാനുള്ള കാരണം