ഒടുവിൽ ആ സന്തോഷവാർത്ത എത്തി; ആദ്യത്തെ കുഞ്ഞിനെ വരവേൽക്കാനൊരുങ്ങി നടൻ രാംചരൺ

ഒടുവിൽ ആരാധകർ കാത്തിരുന്ന ആ സന്തോഷവാർത്ത എത്തി. തെലുങ്ക് സൂപ്പർ താരം രാം ചരൺ അച്ഛനാകുന്നു. രാം ചരണും ഭാര്യ ഉപാസനയും ആദ്യത്തെ കൺമണിയെ സ്വീകരിക്കാൻ ഒരുങ്ങുകയാണെന്ന സന്തോഷ വാർത്ത പുറത്തുവിട്ടത് രാംചരണിന്റെ പിതാവും തെലുങ്ക് സൂപ്പർ സ്റ്റാറുമായ ചിരഞ്ജീവിയാണ്. ട്വിറ്ററിലൂടെയാണ് അദ്ദേഹം വാർത്ത പുറത്തുവിട്ടത്.

വിവാഹിതരായി പത്ത് വർഷത്തിനു ശേഷമാണ് രാം ചരണിനും ഉപാസനയ്ക്കും കുഞ്ഞ് പിറക്കാൻ പോകുന്നത്. ഇതിന്റെ ആഘോഷത്തിലാണ് ആരാധകർ. പത്ത് വർഷം ആകുമ്പോഴും കുഞ്ഞിനെ കുറിച്ച് ചിന്തിക്കുന്നില്ലേ എന്നായിരുന്നു താരവും ഭാര്യയും നിരന്തരം കേട്ടുകൊണ്ടിരുന്ന ചോദ്യം.

കോളേജ് കാലത്താണ് ഉപാസനയും രാംചരണും ആദ്യം കാണുന്നത്. ഇരുവരുടേയും സുഹൃത്ത് വഴിയാണ് പരിചയപ്പെടുന്നത്. ലണ്ടനിൽ ഒരു സ്പോർട്സ് ക്ലബ്ബിൽ വെച്ചാണ് ഇരുവരുടേയും ആദ്യ കൂടിക്കാഴ്ച്ചയെന്നാണ് പിങ്ക് വില്ല റിപ്പോർട്ടിൽ പറയുന്നത്.

ഡേറ്റ് ചെയ്യുന്നതിന് മുമ്പ് ഇരുവരും അടുത്ത സുഹൃത്തുക്കളായിരുന്നു. 2011 ഡിസംബറിലായിരുന്നു വിവാഹ നിശ്ചയം. 2012 ജൂൺ 14 ന് വിവാഹിതരായി. വിവാഹിതരായതിനു പിന്നാലെ ഇരുവരും ഏറ്റവും കൂടുതൽ നേരിട്ട ചോദ്യം കുഞ്ഞുങ്ങളെ കുറിച്ചായിരുന്നു.

രാംചരൺ സിനിമയിലും ഉപാസന ബിസിനസ്സിലും ശ്രദ്ധ കേന്ദ്രീകരിച്ചിരിക്കുകയായിരുന്നു ഇത്രകാലം. തങ്ങൾ തയ്യാറായി എന്ന് തോന്നുമ്പോൾ മാത്രമേ കുഞ്ഞിനെ കുറിച്ച് ആലോചിക്കൂ എന്ന് ഉപാസന നേരത്തേ തന്നെ വ്യക്തമാക്കിയിരുന്നു.

നേരത്തേ, നിരവധി തവണ ഉപാസന ഗർഭിണിയാണെന്ന വർത്തകളും പ്രചരിച്ചു. അപ്പോഴെല്ലാം അമ്മയാകുന്നതിനെ കുറിച്ചുള്ള തന്റെ നിലപാട് ഉപസാന വ്യക്തമാക്കുകയും ചെയ്തിരുന്നു.