IFFK| മമ്മൂട്ടിയുടെ 'നൻപകൽ നേരത്ത് മയക്കം'; തിരക്കേറി സംഘർഷാവസ്ഥയായി; അധിക ഷോ വേണമെന്ന് ആവശ്യം

രാജ്യാന്തര ചലച്ചിത്ര മേളയില്‍ പ്രദര്‍ശിപ്പിക്കുന്ന മമ്മൂട്ടി - ലിജോ ജോസ് പെല്ലിശ്ശേരി ചിത്രം 'നന്‍പകല്‍ നേരത്ത് മയക്ക'ത്തിന് വന്‍ തിരക്ക്. റിസര്‍വേഷന്‍ ചെയ്ത ആളുകള്‍ക്ക് പോലും സിനിമ കാണാന്‍ സാധിക്കാതെ വന്നതോടെ പ്രദര്‍ശന വേദിയായ ടാഗോര്‍ തിയേറ്ററില്‍ സംഘര്‍ഷമുണ്ടായി. 

രാവിലെ മുതല്‍ ചിത്രം കാണുന്നതിന് വേണ്ടി ഡെലിഗേറ്റുകളുടെ നീണ്ട നിരയായിരുന്നു.

റിസര്‍വേഷന്‍ ചെയ്തവരും ചെയ്യാത്തവരും തിയേറ്ററിന് മുന്നില്‍ ക്യു നില്‍ക്കുകയും ഒടുവില്‍ ടിക്കറ്റ് കിട്ടാതെ വന്നതോടെ പ്രതിഷേധത്തിലേക്ക് നീങ്ങുകയായിരിന്നു. 

പ്രതിഷേധക്കാരില്‍ ചിലരെ പൊലീസ് കസ്റ്റഡിയിലെടുത്ത് നീക്കി

ഡെലിഗേറ്റുകളിൽ ചിലർ തിയേറ്ററിനുള്ളിലേക്ക് തള്ളിക്കയറാൻ ശ്രമിച്ചതോടെ പോലീസും ഡെലിഗേറ്റുകളും തമ്മിൽ ഉന്തും തള്ളുമുണ്ടായി.

ഏറെ പണിപ്പെട്ടാണ് പോലീസ് ആളുകളെ നിയന്ത്രിച്ചത്. കൂടുതൽ പോലീസ് എത്തിയാണ് സ്ഥിതി നിയന്ത്രണവിധേയമാക്കിയത്.

ചലച്ചിത്രമേളയുടെ പ്രധാന വേദിയായ ടാഗോർ തിയേറ്ററിൽ തിങ്കളാഴ്ച വൈകുന്നേരം 3:30നായിരുന്നു നൻപകൽ നേരത്ത് മയക്കം എന്ന ചിത്രത്തിന്റെ വേൾഡ് പ്രീമിയർ.

ഷോ ആരംഭിക്കുന്നതിന് മണിക്കൂറുകൾക്ക് മുൻപ് തന്നെ തിയേറ്ററിന് മുന്നിൽ ആളുകൾ വരി നിന്ന് തുടങ്ങിയിരുന്നു. ഇതിനിടെ റിസേർവ് ചെയ്യാത്തവരെ കയറ്റിവിടുന്നുണ്ടെന്ന പരാതികൾ വരി നിന്നിരുന്ന ഡെലിഗേറ്റുകൾ ഉയർത്തിയിരുന്നു.

സിനിമയുടെ പ്രദർശനം ആരംഭിച്ചതോടെ റിസേർവ് ചെയ്ത ഡെലിഗേറ്റുകൾക്കും പ്രവേശനം അനുവദിക്കാത്തതോടെയാണ് ടാഗോർ തീയേറ്ററിന് മുന്നിൽ സംഘർഷവും പ്രതിഷേധവും അരങ്ങേറിയത്.

പൊലീസ് ഇടപെടാൻ ശ്രമിച്ചതോടെ 'പോലീസ് ഗോ ബാക്ക്' മുദ്രാവാക്യങ്ങളോടെ തിയേറ്ററിന് മുന്നിൽ ഡെലിഗേറ്റുകൾ സംഘംചേർന്നു.

പ്രതിഷേധം കനത്തതോടെ ഡെലിഗേറ്റുകളിൽ നിന്ന് രണ്ട് പ്രതിനിധികളെ സംഘാടകരുമായി ചർച്ചയ്ക്ക് ക്ഷണിച്ചു.

നൻപകൽ നേരത്ത് മയക്കം എന്ന എന്ന ചിത്രം കാണാൻ തിയേറ്ററിനുള്ളിൽ കയറാൻ സാധിക്കാത്തവർക്ക് വേണ്ടി ഒരു ഷോ കൂടി അനുവദിക്കണമെന്നാണ് ഡെലിഗേറ്റുകളുടെ ആവശ്യം.

സിനിമയുടെ സംവിധായകൻ ലിജോ ജോസ് പെല്ലിശ്ശേരിയും കഥാകൃത്ത് എസ് ഹരീഷും തീയേറ്ററിൽ എത്തിയിരുന്നു.