'അതെല്ലാം ഏറെ വേദനിപ്പിച്ചു'; കരിയറിൽ നേരിട്ട അനുഭവങ്ങളെ കുറിച്ച് ദീപിക പദുകോൺ

ബോളിവുഡിലെ തിരക്കേറിയ നായികയാണ് ദീപിക പദുകോൺ. 2007 ൽ പുറത്തിറങ്ങിയ ഷാരൂഖ് ഖാൻ നായകനായ ഓം ശാന്തി ഓം എന്ന ചിത്രത്തിലൂടെയാണ് ദീപികയുടെ ബോളിവുഡ് അരങ്ങേറ്റം. ഇന്ന് കൈ നിറയെ ചിത്രങ്ങളാണ്. തെലുങ്കിൽ പ്രഭാസ് നായകനാകുന്ന ചിത്രത്തിലും ദീപിക നായികയാകുന്നുണ്ട്.

ഇന്ന് തിരക്കുള്ള നായികയാണെങ്കിലും കരിയറിന്റെ തുടക്കത്തിൽ തനിക്കും മോശം അനുഭവങ്ങളുണ്ടെന്ന് തുറന്നു പറയുകയാണ് ദീപിക. ഇന്ത്യ ടുഡേയ്ക്ക് നൽകിയ അഭിമുഖത്തിലാണ് ദീപിക കരിയറിന്റെ തുടക്കകാലത്തുണ്ടായ മോശം അനുഭവങ്ങളെ കുറിച്ച് വെളിപ്പെടുത്തിയിരിക്കുന്നത്.

മോഡലിങ് രംഗത്തു നിന്നാണ് ദീപിക ബോളിവുഡിൽ എത്തുന്നത്. സിനിമാ പാരമ്പര്യമില്ലാത്ത തെന്നിന്ത്യയിലെ കായിക കുടുംബത്തിൽ നിന്നും എത്തിയ പെൺകുട്ടിക്ക് അത്ര മികച്ച സ്വീകരണമായിരുന്നില്ല ബോളിവുഡിൽ ലഭിച്ചതെന്ന് പറയുകയാണ് ദീപിക.

ബോളിവുഡ് അരങ്ങേറ്റത്തെ കുറിച്ച് ദീപിക പറയുന്നത് ഇങ്ങനെ, മോഡലിങ് രംഗത്ത് വർഷങ്ങളോളം പിടിച്ചു നിന്നതിന് ശേഷമാണ് ബോളിവുഡിൽ വലിയ ബ്രേക്ക് തന്ന സിനിമ ലഭിക്കുന്നത്.

19ാമത്തെ വയസ്സിലാണ് ഓം ശാന്തി ഓമിൽ അഭിനയിക്കുന്നത്. ചിത്രത്തിൽ ഷാരൂഖും സംവിധായിക ഫറ ഖാനുമാണ് തന്നെ കൈപിടിച്ച് കാര്യങ്ങളെല്ലാം മനസ്സിലാക്കി തന്നത്. 2007ൽ ചിത്രം പുറത്തിറങ്ങിയപ്പോൾ അതിരില്ലാത്ത സ്നേഹവും സ്വീകാര്യതയുമാണ് തനിക്ക് ലഭിച്ചത്.

എന്നാൽ തന്നെ വിമർശിക്കാനും ഒരു വിഭാഗം ആളുകൾ എന്നുമുണ്ടായിരുന്നു. താൻ വെറുമൊരു മോഡൽ മാത്രമാണെന്നും അഭിനയിക്കാൻ അറിയില്ലെന്നും പലരും പറഞ്ഞു. തന്റെ സംസാരശൈലിയും പലർക്കും തമാശയായിരുന്നു.

പലരും തന്റെ ഉച്ചാരണത്തെ പരിഹസിച്ചും കളിയാക്കിയും എഴുതുകയും പറയുകയും ചെയ്തു. യഥാർത്ഥത്തിൽ ഇതെല്ലാം തന്നെ ഒരുപാട് വേദനിപ്പിച്ചിട്ടുണ്ട്. എന്നാൽ വിമർശനങ്ങളായിരുന്നു എനിക്ക് ഇന്ധനമായത്. കഠിനാധ്വാനം ചെയ്യാനും തന്നെ മെച്ചപ്പെടുത്താനും ഈ വിമർശനങ്ങൾ ഒരുപാട് സഹായിച്ചു.- ദീപിക പറയുന്നു.

ഷാരൂഖ് ഖാൻ നായകനാകുന്ന പഠാൻ ആണ് ദീപികയുടെ ഇനി പുറത്തിറങ്ങാനുള്ള ചിത്രം. സിദ്ധാന്ത് ചതുർവേദി, അനന്യ പാണ്ഡ‍േ എന്നിവർക്കൊപ്പം മറ്റൊരു ചിത്രവും പുരോഗമിക്കുന്നു. ഭർത്താവ് റൺവീർ സിങ് കപിൽ ദേവായി വേഷമിടുന്ന 83 ലും ദീപികയാണ് നായിക. കപിൽ ദേവിന്റെ ഭാര്യയായ റോമി ദേവിന്റെ വേഷമാണ് ചിത്രത്തിൽ ദീപിക ചെയ്യുന്നത്.