Deepika Padukone | 'സ്തനങ്ങൾക്ക് ശസ്ത്രക്രിയ നടത്തണം'; പതിനെട്ടാം വയസിൽ ലഭിച്ച ഏറ്റവും മോശം ഉപദേശത്തെക്കുറിച്ച് ദീപിക പദുകോൺ

ആമസോൺ പ്രൈമിൽ പുറത്തിറങ്ങിയ ഗെഹരായിയാൻ (Gehraiyaan)എന്ന ചിത്രത്തിന് ലഭിച്ചുകൊണ്ടിരിക്കുന്ന മികച്ച പ്രതികരണത്തിന്റെ സന്തോഷത്തിലാണ് ദീപിക പദുകോൺ (Deepika Padukone).

ഫിലിം ഫെയറിന് നൽകിയ അഭിമുഖത്തിൽ കരിയറിന്റെ തുടക്കകാലത്തെ കുറിച്ചും അഭിനയ ജീവിതത്തെ കുറിച്ചുമെല്ലാം ദീപിക പദുകോൺ പറയുന്നുണ്ട്.

കരിയറിൽ ലഭിച്ച ഏറ്റവും മോശം ഉപദേശവും ഏറ്റവും നല്ല ഉപദേശവും എന്താണെന്നും ദീപിക വെളിപ്പെടുത്തുന്നു.

തനിക്ക് ലഭിച്ച ഏറ്റവും മോശം ഉപദേശമായി ദീപിക പറയുന്നത് പതിനെട്ടാം വയസ്സിലുണ്ടായ അനുഭവമാണ്. സ്തനങ്ങൾക്ക് വലുപ്പം കൂട്ടണമെന്നതായിരുന്നു അത്. വെറും പതിനെട്ട് വയസ്സായിരുന്നു അന്നെനിക്ക് പ്രായം. അത് കാര്യമായി എടുക്കാതിരിക്കാനുള്ള ബുദ്ധി എനിക്കെങ്ങനെ ഉണ്ടായി എന്ന് പലപ്പോഴും ചിന്തിക്കാറുണ്ടെന്നും ദീപിക പറയുന്നു.

ഏറ്റവും മികച്ച ഉപദേശം ലഭിച്ചത് ഷാരൂഖ് ഖാനിൽ നിന്നാണെന്നും ദീപിക. ഷാരൂഖ് ഖാന്റെ നായികയായി ഓം ശാന്തി ഓശാനയിലൂടെയാണ് ദീപിക ബോളിവുഡിൽ എത്തുന്നത്.

ഷാരൂഖാനിൽ നിന്ന് താൻ ഒരുപാട് കാര്യങ്ങൾ പഠിച്ചിട്ടുണ്ട്. തനിക്ക് ഏറ്റവും നല്ല ഉപദേശം തന്നതും അദ്ദേഹമാണ്.

നല്ല സമയം ചെലവഴിക്കാനാകുമെന്ന് നിങ്ങൾക്ക് ഉറപ്പുള്ളവർക്കൊപ്പം അഭിനയിക്കണമെന്നാണ് അദ്ദേഹം പറഞ്ഞത്. കാരണം ഒരു സിനിമയെടുക്കുമ്പോൾ നിങ്ങൾ സ്വന്തം ജീവിതം കൂടിയാണ് ജീവിക്കുന്നത്. അവർക്കൊപ്പമുള്ള ഓർമകളും അനുഭവങ്ങളും കൂടിയാണ് ഉണ്ടാക്കുന്നത്. ഇതായിരുന്നു ഷാരൂഖിന്റെ ഉപദേശം.

ആദ്യം ചിത്രം മുതൽ ഷാരൂഖുമായി അടുത്ത ബന്ധം സൂക്ഷിക്കുന്ന നടിയാണ് ദീപിക. ഇരുവരും ഒന്നിച്ചഭിനയിക്കുന്ന പുതിയ ചിത്രം പഠാൻ ചിത്രീകരണം പുരോഗമിക്കുകയാണ്.

ഷാരൂഖും ദീപികയും ഒന്നിച്ചഭിനയിക്കുന്ന നാലാമത്തെ ചിത്രമാണിത്. ഓം ശാന്തി ഓമിനു ശേഷം ചെന്നൈ എക്സ്പ്രസ്സ്, ഹാപ്പി ന്യൂ ഇയർ എന്നീ ചിത്രങ്ങളും ഇവരുടേതായി പുറത്തിറങ്ങി.