വാത്തി, മോമോ, വെയ്ൽ എത്തി; പൂവൻ അടുത്ത ആഴ്ച; ഒടിടി റിലീസുകൾ

ധനുഷ്-സംയുക്ത ചിത്രം 'വാത്തി', 'മോമോ ഇൻ ദുബായ്', ഹിന്ദി ചിത്രം 'കുത്തേ', ഹോളിവുഡ് ചിത്രം 'വെയ്‌ൽ' എന്നിവ ഈ ആഴ്ച ഒടിടി പ്ലാറ്റ്ഫോമിൽ റിലീസ് ചെയ്തു.

മമ്മൂട്ടി- ബി. ഉണ്ണികൃഷ്ണൻ ടീമിന്റെ ‘ക്രിസ്റ്റഫർ’, സിജു വിൽസന്റെ ‘വരയൻ’, മാളവിക മോഹനൻ- മാത്യു ഒന്നിച്ച ‘ക്രിസ്റ്റി’, സിദ്ധാർഥ് ഭരതൻ സംവിധാനം ചെയ്ത ‘ചതുരം’, ഷാഹി കബീറിന്റെ ‘ഇലവീഴാ പൂഞ്ചിറ’, വിൻസി അലോഷ്യസിന്റെ ‘രേഖ’, തമിഴ് ചിത്രം ‘ഡാഡ’ എന്നിവയാണ് മാർച്ച് രണ്ടാം വാരം ഒടിടി റിലീസിനെത്തിയിരുന്നു.

ജോജു ജോർജ് ചിത്രം ഇരട്ട, ലെജൻഡ് ശരവണന്റെ ലെജൻഡ്, ഡിസിയുടെ ബ്ലാക്ക് ആദം എന്നിവ ആദ്യ വാരം ഒടിടി റിലീസ് ചെയ്തത്. മോഹൻലാൽ ചിത്രം എലോൺ മാർച്ച് 3 മുതൽ സ്ട്രീം ചെയ്തു തുടങ്ങി.

ആന്റണി വർഗീസിന്റെ പൂവൻ മാർച്ച് 24ന് സീ 5 പ്ലാറ്റ്ഫോമിലൂടെ റിലീസ് ചെയ്യും.

മോമോ ഇൻ ദുബായ് - ഹലാൽ ലൗ സ്റ്റോറി എന്ന ചിത്രത്തിനു ശേഷം സക്കരിയയുടെ തിരക്കഥയിലും നിർമാണത്തിലും ഒരുങ്ങിയ ചിത്രമാണ് 'മോമോ ഇൻ ദുബായ്’. അനു സിത്താര, അനീഷ് ജി. മേനോൻ, ജോണി ആന്റണി എന്നിവരെ പ്രധാന കഥാപാത്രങ്ങളാക്കി നവാഗതനായ അമീൻ അസ്ലം ചിത്രം സംവിധാനം ചെയ്തിരിക്കുന്നു. മനോരമ മാക്സിലൂടെ ഇന്ന് ചിത്രം ഒടിടിയിൽ റിലീസ് ചെയ്തു.

വാത്തി- ധനുഷിനെ നായകനാക്കി തെലുങ്ക് സംവിധായകന്‍ വെങ്കി അറ്റ്ലൂരിയാണ് തിരക്കഥയെഴുതി സംവിധാനം ചെയ്ത ചിത്രം. ബോക്സ് ഓഫിസിലും വമ്പൻ വിജയം നേടിയ സിനിമയിൽ അധ്യാപകനായാണ് ധനുഷ് എത്തിയത്. സംയുക്തയാണ് നായിക. ഇന്ന് നെറ്റ്ഫ്ലിക്സിലാണ് ചിത്രം റിലീസ് ചെയ്തത്.

ദ വെയ്‌ൽ- ബ്രെൻഡൻ ഫ്രേസർക്ക് മികച്ച നടനുള്ള ഓസ്കർ വാങ്ങിക്കൊടുത്ത ചിത്രം. മദർ, ബ്ലാക് സ്വാൻ തുടങ്ങിയ ചിത്രങ്ങളിലൂടെ ശ്രദ്ധേയനായ ഡാരെൻ അരൊണൊഫ്സ്കിയാണ് സംവിധാനം. പൊണ്ണത്തടി മൂലം ജീവിതം വിരസമാകുന്ന മനുഷ്യൻ, തന്റെ പതിനേഴ് വയസ്സ് പ്രായമുള്ള മകളുമായി സ്നേഹബന്ധം നിലനിർത്താൻ ശ്രമിക്കുന്നതാണ് ചിത്രത്തിന്റെ കഥ. ഇന്നെ സോണി ലിവിൽ ചിത്രം റിലീസ് ചെയ്തു.