Rajinikanth | സീറ്റ്ബെൽറ്റ് ധരിക്കാത്തതിന് നടൻ രജനീകാന്തിന് പോലീസ് പിഴ ചുമത്തിയോ?

സ്വന്തം ലംബോർഗിനി ഓടിക്കുന്ന ചിത്രം വൈറൽ ആയതിനു തൊട്ടുപിന്നാലെ നടൻ രജനീകാന്തിന് സീറ്റ് ബെൽറ്റ് ധരിക്കാത്തതിന്റെ പേരിൽ പൊലീസ് പിഴ ചുമത്തി എന്ന് ആരോപണം. വഴിയിൽ തടഞ്ഞ് നിർത്തിയാണത്രേ ചെന്നൈ പോലീസ് സ്റ്റൈൽമന്നന് പിഴ ചുമത്തിയ രസീത് നൽകിയത് എന്ന് റിപ്പോർട്ടിൽ പറയുന്നു

സീറ്റ് ബെൽറ്റ് ധരിക്കാത്തതിന് രജനികാന്തിന് ജൂൺ 26 ന് പൊലീസ് പിഴ ചുമത്തിയിരുന്നത്രേ. മകൾ സൗന്ദര്യക്കും കുടുംബത്തിനുമൊപ്പം ലംബോർഗിനിയുടെ മുന്നിൽ പോസ് ചെയ്യുന്ന ചിത്രം സോഷ്യൽ മീഡിയയിൽ എത്തിയതിന് തൊട്ടുപിന്നാലെയാണ് രജനികാന്ത് കാർ ഓടിക്കുന്ന ചിത്രത്തിന്റെ വരവ്. എന്നാൽ ഈ ചിത്രത്തിൽ മാസ്ക്കും സീറ്റ് ബെൽറ്റും ധരിച്ചിട്ടുണ്ട് താനും

മറ്റൊരു വിവാദവും ഇതിനോടൊപ്പം തന്നെ തലപൊക്കുന്നു. കേളമ്പക്കത്തുള്ള ഫാം ഹൗസിലേക്ക് പുറപ്പെടാൻ രജനീകാന്ത് ഇ-പാസ് കരസ്ഥമാക്കിയിരുന്നോ എന്നാണ് ചോദ്യം. ചെന്നൈയിൽ കോവിഡ് പ്രതിസന്ധിക്കിടെ അത്തരമൊരു യാത്ര ചെയ്യണമെങ്കിൽ ഇ-പാസ് നിർബന്ധമാണ്

രജനീകാന്തിന് കിട്ടി എന്ന് പറയപ്പെടുന്ന ഒരു ഇ-പാസിന്റെ കോപ്പി സോഷ്യൽ മീഡിയയിൽ പലയിടത്തും പ്രചരിക്കുന്നുണ്ട്. അതുപ്രകാരം ഒരു മെഡിക്കൽ എമർജൻസിയുടെ ഭാഗമായാണ് രജനി യാത്ര ചെയ്തത് എന്ന പരാമർശം ഉണ്ട്

അതേസമയം എന്താണ് മെഡിക്കൽ എമർജൻസിയുടെ കാരണമെന്ന ചോദ്യവും ഉയർന്നുവരുന്നുണ്ട്

ശിവ സംവിധാനം ചെയ്യുന്ന 'അണ്ണാത്തെ' എന്ന സിനിമയിലാണ് രജനീകാന്ത് അടുത്തതായി വേഷമിടുന്നത്. ഖുശ്‌ബു, മീന, കീർത്തി സുരേഷ്, നയൻതാര എന്നിവർ നായികാ വേഷങ്ങളിൽ എത്തും. 2020 ദീപാവലിക്ക് റിലീസ് ചെയ്യാൻ വച്ചിരുന്ന ചിത്രം 2021ലേക്ക് മാറ്റിയിട്ടുണ്ട്