ആദ്യം കണ്ടുമുട്ടിയ അതേ ഫിലിം ഫെസ്റ്റിവൽ വേദിയിൽ വിവാഹശേഷം ആദ്യമെത്തിയ നവ ദമ്പതികളായ സംവിധായകനും അവതാരകയും

ആറു വർഷം മുൻപ്, ടാഗോർ തിയേറ്ററിനു മുൻപിൽ വച്ച് അപ്രതീക്ഷിതമായി കണ്ടുമുട്ടുകയും പരിചയപ്പെടുകയും ചെയ്ത സുരഭിയെന്ന കൂട്ടുകാരിയെ പാമ്പള്ളി ജീവിതത്തിൽ കൂടെ കൂട്ടിയിരിക്കുകയാണ്.

കണ്ടുമുട്ടിയത് ടാഗോറിൽ, വിവാഹ ശേഷം ആദ്യമെത്തിയും ടാഗോറിൽ തന്നെ. എഴുത്തുകാരനും സംവിധായകനുമായ പാമ്പള്ളി എന്ന സന്ദീപ് കുമാറും ഭാര്യ സുരഭിയുമാണ് ഇപ്പോൾ സോഷ്യൽ മീഡിയയിലെ താരങ്ങൾ.

കല്ലമ്പലം ജെജെ ഓഡിറ്റോറിയത്തിൽ വച്ചാണ് പാമ്പള്ളിയും സുരഭിയും വിവാഹിതരായത്. വിവാഹസദ്യയും കഴിഞ്ഞ് വിവാഹവേദിയിൽ നിന്നും വധൂവരന്മാർ നേരെയെത്തിയത് ഐഎഫ്എഫ്‌കെ വേദിയിലേക്കാണ്.

ചലച്ചിത്ര അക്കാദമി ചെയർമാൻ രഞ്ജിത്, സെക്രട്ടറി അജോയ് ചന്ദ്രൻ തുടങ്ങിയവർ വധൂവരന്മാരെ മധുരം നൽകി സ്വീകരിച്ചു. ടാഗോറ്‍‍ തിയേറ്ററിൽ‘ലോർഡ് ഓഫ് ദി ആന്റ്സ്’ എന്ന ഇറ്റാ‌ലിയൻ സിനിമ കണ്ടുകൊണ്ട് ഇരുവരും ഒന്നിച്ചുള്ള ജീവിതയാത്രയ്ക്ക് തുടക്കം കുറിച്ചു.

കഴിഞ്ഞ പത്തിരുപത് വർഷത്തിനിടെ തന്റെ ജീവിതത്തിൽ പല വിധത്തിൽ സ്വാധീനം ചെലുത്തിയ ഒന്നാണ് കേരള രാജ്യാന്തര ചലച്ചിത്ര മേളയെന്നാണ് പാമ്പള്ളി പറയുന്നത്. “18 വർഷം തുടർച്ചയായി ഐഎഫ്എഫ്കെ കണ്ടാൽ ‘സിനിമയുടെ ഗുരുസ്വാമിയായി ഇനി തെങ്ങുവയ്ക്കാം’ എന്നൊരു ചൊല്ലുണ്ട് ചലച്ചിത്രപ്രേമികൾക്കിടയിൽ. ആ അർത്ഥത്തിൽ ഞാനുമൊരു ഗുരുസ്വാമിയാണ്,” ചിരിയോടെ പാമ്പള്ളി പറഞ്ഞു

കല്ലമ്പലം നാവായിക്കുളം സ്വദേശിയാണ് സുരഭി. ഇപ്പോൾ ഹെൽത്ത് സർവീസസ് ഡയറക്ടറേറ്റിൽ ഉദ്യോഗസ്ഥയായി ജോലി ചെയ്യുന്നു.

2018ൽ മികച്ച നവാഗത സംവിധായകനുള്ള ദേശീയ ചലച്ചിത്ര പുരസ്കാരം നേടിയ വ്യക്തിയാണ് പാമ്പള്ളി. ലക്ഷദ്വീപിലെ ലിപിയില്ലാത്ത ഭാഷയായ ‘ജസരി’യിൽ ഒരുക്കിയ ‘സിൻജാർ’ എന്ന ചിത്രമാണ് പാമ്പള്ളിയെ പുരസ്കാരത്തിനു അർഹനാക്കിയത്.

മേളയുടെ അഞ്ചാം ദിവസം (ഡിസംബർ 13) ഐഎഫ്എഫ്കെ വേദിയിൽ തന്റെ ആദ്യ ഹോളിവുഡ് ചിത്രം അനൗൺസ് ചെയ്യാനൊരുങ്ങുകയാണ് പാമ്പള്ളി.