Pushpa 2| പുഷ്പ 2 ൽ ഐറ്റം ഡാൻസുമായി സാമന്തയുണ്ടാകില്ല; പകരം ദിഷ പതാനി

അല്ലു അർജുൻ നായകനായ പുഷ്പയുടെ (Pushpa: The Rise)ഏറ്റവും വലിയ പ്രത്യേകതകളിൽ ഒന്ന് സാമന്തയുടെ (Samantha Ruth Prabhu) ഐറ്റം ഡാൻസായിരുന്നു. തെന്നിന്ത്യൻ സിനിമാലോകത്തെ സൂപ്പർ നായിക ആദ്യമായി ചെയ്യുന്ന ഐറ്റം ഡ‍ാൻസ് എന്ന നിലയിലായിരുന്നു ആദ്യം ശ്രദ്ധിക്കപ്പെട്ടത്.

എന്നാൽ ചിത്രം പുറത്തിറങ്ങിയതോടെ സ്ഥിതി മാറി. നായികയേക്കാളും സാമന്തയുടെ ഐറ്റം ഡ‍ാൻസിനായിരുന്നു കൂടുതൽ ആരാധകർ. തെലുങ്ക് പ്രേക്ഷകരെ മാത്രമല്ല, ഇന്ത്യ മുഴുവൻ തന്നെ ഊ.. ആണ്ടവാ.. എന്ന ഗാനം സൂപ്പർ ഹിറ്റായി.

മൂന്ന് മിനുട്ടുള്ള പാട്ടിന് 5 കോടി രൂപയാണ് സാമന്ത പ്രതിഫലമായി വാങ്ങിയത്. ഐറ്റം ഡാൻസിലൂടെ കൂടുതൽ പ്രേക്ഷകർ തന്നെ സ്വീകരിച്ചുവെന്നും സാം പറഞ്ഞിരുന്നു. പുഷ്പയിലെ നായകൻ അല്ലു അർജുനും സംവിധായകൻ സുകുമാറിനുമാണ് സാമന്ത നന്ദി പറയുന്നത്.

അതേസമയം, പുഷ്പയുടെ രണ്ടാം ഭാഗത്തിന്റെ പണിപ്പുരയിലാണ് സംവിധായകൻ. രണ്ടാം ഭാഗത്തിലും ഗംഭീരമായൊരു ഐറ്റം സോങ് ഉണ്ടാകുമെന്നാണ് അണിയറ പ്രവർത്തകർ പറയുന്നത്. പക്ഷേ, ഒരു മാറ്റം മാത്രം ഉണ്ടാകും.

രണ്ടാം ഭാഗത്തിൽ ഐറ്റം ഡാൻസുമായി ആരാധകരെ ത്രസിപ്പിക്കാൻ സാമന്ത എത്തില്ല. പകരം ബോളിവുഡിൽ നിന്നുമൊരു നടിയാകും എത്തുക എന്നാണ് റിപ്പോർട്ടുകൾ.

Koimoi.com റിപ്പോർട്ട് അനുസരിച്ച് ദിഷ പതാനിയാകും രണ്ടാം ഭാഗത്തിൽ ഐറ്റം ഡാൻസ് ചെയ്യുക. രസകരമായ കാര്യമെന്തെന്നാൽ സാമന്ത അവതരിപ്പിച്ച ഐറ്റം ഡാൻസ് ചെയ്യാൻ സംവിധായകൻ ആദ്യം സമീപിച്ചത് ദിഷയെ ആയിരുന്നത്രേ. ദിഷ വേണ്ടെന്നു വെച്ച ഐറ്റം സോങ്ങിലാണ് സാമന്ത കിടിൻ പ്രകടനം നടത്തി ഇന്ത്യ മുഴുവൻ ആരാധകരെ സൃഷ്ടിച്ചത്.