'ടൊവി ഇത്ര ഭംഗി ആയി ചെയ്തതിൽ എനിക്ക് ഒരു അത്ഭുതവും തോന്നുന്നില്ല': 2018ലെ ടൊവിനോയുടെ പ്രകടനത്തെക്കുറിച്ച് സുഹൃത്ത് അരുൺ

കേരളം നേരിട്ട മഹാപ്രളയത്തെ അഭ്രപാളികളിലെത്തിച്ച സംവിധായകൻ ജൂഡ് ആന്റണി ജോസഫിന്റെ ചിത്രം '2018' മികച്ച പ്രതികരണവുമായി മുന്നേറുകയാണ്. യാഥാർഥ്യത്തെ അത്രമേൽ സ്വാഭാവികതയോടു കൂടി ബിഗ് സ്‌ക്രീനിലെത്തിച്ചതിന്റെ ക്രെഡിറ്റ് ജൂഡിനും സിനിമയുടെ വലുതും ചെറുതുമായ മേഖലകളിൽ പ്രവർത്തിച്ച ഓരോരുത്തർക്കുമാണ്. പ്രളയകാലത്ത് നേരിട്ട് പ്രവർത്തിക്കുകയും, സിനിമയിലും ഒരു സുപ്രധാനവേഷം ചെയ്യുകയും ചെയ്ത നടനാണ് ടൊവിനോ തോമസ്. നടന്റെ പ്രകടനത്തെ അഭിനന്ദിച്ചു കൊണ്ട് സുഹൃത്ത് അരുൺ പോസ്റ്റ് ചെയ്ത ഇൻസ്റ്റഗ്രാം കുറിപ്പ് ശ്രദ്ധനേടുകയാണ്

അക്കാലത്ത് തന്റെ ഫോൺ ഗാലറിയിൽ നിറഞ്ഞ ചില ചിത്രങ്ങൾ സഹിതമാണ് അരുൺ സുഗതന്റെ പോസ്റ്റ്. ഒരു പ്രളയവും, ആ പ്രളയം പ്രമേയമാക്കിയ സിനിമയും, രണ്ടിലും ഒരുപോലെ നിറഞ്ഞ കൂട്ടുകാരൻ ടൊവിനോയെയും കണ്ടതിന്റെ അനുഭവമാണ് ഈ കുറിപ്പിൽ. പോസ്റ്റിലേക്ക് കടക്കാം (തുടർന്ന് വായിക്കുക)

'മഹാ പ്രളയത്തിന്റെ ഭീകരത നേരിട്ട് അനുഭവിച്ച ഒരാളായത് കൊണ്ടാവാം ഇപ്പോഴും സിനിമയുടെ എഫക്റ്റിൽ നിന്നും പുറത്ത് വരാൻ സാധിച്ചിട്ടില്ല. ചിത്രം കണ്ടുകഴിഞ്ഞ എന്നെ പോലെ പ്രളയത്തെ നേരിൽ കണ്ട എന്റെ ഓരോ സുഹൃത്തുക്കളും വിളിച്ചു പറയുന്ന കാര്യങ്ങൾ കേൾക്കുമ്പോൾ 2018 എന്ന സിനിമയെ കുറിച്ച് രണ്ടു വാക്ക് കുറിക്കണം എന്ന് തോന്നി...

ഇത് പോലൊരു പടം ചെയ്ത് ഞങ്ങൾ മലയാളികളെ എല്ലാ രീതിയിലും ഇമോഷണൽ ആക്കി ത്രില്ലാക്കി ആ മനുഷ്യത്വത്തിന്റെ നാളുകളെ ഓർമ്മപ്പെടുത്തിയ ജൂഡ് ആന്റണിക്ക് ഒരു വലിയ സല്യൂട്ട്...

പിന്നെ അനൂപ്, ആ കഥാപാത്രത്തെ എന്റെ സുഹൃത്തായ ടൊവി ഇത്ര ഭംഗി ആയി ചെയ്തതിൽ എനിക്ക് ഒരു അത്ഭുതവും തോന്നുന്നില്ല. കാരണം, ഇങ്ങനെ ഒരു അനൂപിനെ ഞാൻ റിയലായി അവനിലൂടെ തന്നെ കണ്ടിട്ടുള്ളതാണ്...

കൂടുതലൊന്നും പറയാനില്ല. ലവ് യു. അന്ന് കൂടെ ഉണ്ടായ ഓരോരുത്തരെയും ഞാൻ ഇന്ന് ഓർക്കുന്നു. അതേ പോലെ തന്നെ സിനിമയിലെ ഓരോ കഥാപാത്രങ്ങളും ഒന്നിനൊന്നു മെച്ചപെട്ട് അഭിനയിച്ചു എന്നല്ല ജീവിച്ചു എന്ന് വേണം പറയാൻ...

എന്റെ ഗാലറിയിലെ ചില ചിത്രങ്ങൾ കൂടെ ഞാൻ ചേർക്കുന്നു.' എന്ന് പറഞ്ഞാണ് അരുൺ സുഗതൻ പോസ്റ്റ് അവസാനിപ്പിച്ചത്

കുഞ്ചാക്കോ ബോബൻ, ആസിഫ് അലി, വിനീത് ശ്രീനിവാസൻ, അപർണ ബാലമുരളി എന്നിവർ ചിത്രത്തിൽ സുപ്രധാവേഷങ്ങൾ ചെയ്യുന്നു