അധോലോക നായകനാ, പേര് ഉണ്ണിയേട്ടൻ; മലയാളി പ്രേക്ഷകർക്ക് ആളെ വേണ്ടത്ര മനസ്സിലായോ ആവോ

ഇതിപ്പോൾ മേക്കോവറുകളുടെ (makeover) കാലമാണല്ലോ. ആരെയും അമ്പരപ്പിക്കുന്ന തരത്തിൽ മേക്കോവർ നടത്തി തലൈവർ മുതൽ തല വരെ പ്രേക്ഷകരെ അമ്പരപ്പിച്ചിരിക്കുന്നു. മലയാളത്തിലും അക്കാര്യത്തിൽ ആരും മോശമല്ല. ഇവിടെപ്പിന്നെ സ്റ്റാർസ് മാത്രമല്ല, അതിൽ മുൻപിൽ. പുതുമുഖങ്ങൾ വരെ കിട്ടുന്ന അവസരങ്ങളിലെല്ലാം മേക്കോവർ പരീക്ഷണം നടത്താറുണ്ട്. ഏറെ സമയച്ചിലവും ബുദ്ധിമുട്ടും എറിയതാണെങ്കിലും, അത്തരമൊരു മേക്കോവർ നടത്താൻ പലരും തയ്യാറാവുന്നു എന്നത് തന്നെ സവിശേഷത

അത്തരത്തിൽ ഒരാളുടെ മേക്കോവർ ചിത്രങ്ങൾ സോഷ്യൽ മീഡിയയിൽ എത്തിക്കഴിഞ്ഞു. പ്രേക്ഷകർക്ക് വളരെ മുഖപരിചയമുള്ള ആളാണിതെന്നു കൂടി ഓർക്കുക. മേക്കോവർ നടത്തി ആളെ ഒരു അധോലോക നായകനാക്കി മാറ്റിയിരിക്കുകയാണ്‌. പേരുമിട്ടു, തീർത്തും നിരുപദ്രവകാരിയായ ഉണ്ണിയേട്ടൻ! പിടികിട്ടിയോ? (തുടർന്ന് വായിക്കുക)

എന്നാൽ കുറച്ചു ക്ലൂ അങ്ങോട്ട് പിടിച്ചോ: ആള് ഇന്ത്യൻ സിനിമ പോയിട്ട്, മലയാള സിനിമയിലെ പോലും അഭിനേതാവല്ല. എന്നാൽ മലയാളി പ്രേക്ഷകർക്ക് വളരെയേറെ പരിചിതനുമാണ്. അതും പതിറ്റാണ്ടുകളായി

ഒറ്റനോട്ടത്തിൽ 'ജോയ് മാത്യു അല്ലേ' എന്നെങ്ങാനും ചോദിക്കാനുള്ള പ്രവണത ഉണ്ടായാലും തെറ്റുപറയാനില്ല. പക്ഷെ ജോയ് മാത്യു അല്ല. ഇനിയിപ്പോൾ സസ്പെൻസ് വേണ്ട. ഇതാ, താഴെക്കാണുന്ന ചിത്രത്തിലെ ആളാണയാൾ

ഒന്നാം രാഗം പാടി... എന്ന ഗാനം ഇന്നും മലയാളിയുടെ നാവിൻതുമ്പത്തെത്തിക്കുന്ന നമ്മുടെ പ്രിയ ഗായകൻ ജി. വേണുഗോപാൽ ആണിത്. ഒരു ചാനൽ പരിപാടിക്കുവേണ്ടി നടത്തിയ മേക്കോവറാണ് നിങ്ങൾ മുകളിൽ കണ്ടത്. എന്താണ് സംഭവിച്ചതെന്ന് അദ്ദേഹത്തിന്റെ ഭാഷയിൽ തന്നെ വായിച്ചു മനസിലാക്കാം:

'അടുത്ത വിഷു ഏഷ്യാനെറ്റ് സ്റ്റാർ സിങ്ങർ ജഡ്ജസ് ഒൺലി സ്കിറ്റ് റെഡിയാകുന്നു സുഹൃത്തുക്കളേ. ഇത്തവണ ബോംബെയിൽ നിന്നുള്ള ഒരു അധോലോക ഡോൺ ആയാണ് മേക്കോവർ. വളരെ നിരുപദ്രവകരമായ ഒരു പേരും, ഉണ്ണിയേട്ടൻ! "പുഷ്പ" എന്ന അല്ലു അർജുൻ സിനിമയുടെ സ്പൂഫ് ഡയലോഗ്സും!'