HBD Sai Pallavi| ഡോക്ടർ, നർത്തകി; പിറന്നാൾ ദിനത്തിൽ നടി സായി പല്ലവിയെ കുറിച്ച് രസകരമായ കാര്യങ്ങൾ അറിയാം

 2014ൽ ജോർജിയയിൽ മെഡിക്കൽ പഠനം നടത്തുന്നതിനിടെയാണ് 'പ്രേമ'ത്തിലെ മലർ മിസ്സാകാൻ സംവിധായകൻ അൽഫോൺസ് പുത്രൻ സായി പല്ലവിയെ ക്ഷണിക്കുന്നത്. അവധി സമയത്ത് നാട്ടിലെത്തി, സിനിമയില്‍ അഭിനയിച്ചശേഷം പഠനം പൂർത്തിയാക്കാൻ താരം ജോർജിയയിലേക്ക് മടങ്ങി. പ്രേമം റിലീസായതോടെ 'മലർ മിസ്' ഏറെ ശ്രദ്ധിക്കപ്പെട്ടു. ആ വർഷത്തെ മികച്ച പുതുമുഖ നായികക്കുള്ള ഫിലിം ഫെയർ പുരസ്കാരം ഉൾപ്പെടെ ഒട്ടേറെ അവാർഡുകൾ താരത്തെ തേടി വന്നു. ‌2005ൽ പുറത്തിറങ്ങിയ കസ്തൂരിമാനിലും 2008ൽ പുറത്തിറങ്ങിയ ധാംധൂമിലും ബാലതാരമായി സായി പല്ലവി അഭിനയിച്ചിരുന്നു.

2015ൽ മലയാളത്തിലെ രണ്ടാമത്തെ സിനിമയായ 'കലി'യിൽ അഭിനയിക്കാൻ വീണ്ടും പഠനത്തിൽ നിന്നും ഇടവേളയെടുത്തു. 2016ൽ പുറത്തിറങ്ങിയ ദുൽഖർ ചിത്രത്തിൽ അഞ്ജലി എന്ന കഥാപാത്രകത്തെയാണ് സായി പല്ലവി അവതരിപ്പിച്ചത്. മികച്ച നടിക്കുള്ള ഫിലിംഫെയർ പുരസ്കാരത്തിനുള്ള നാമനിർദേശപട്ടികയിലും ഈ ചിത്രത്തിലൂടെ സായി പല്ലവി ഇടംപിടിച്ചു. നീലഗിരിയിലെ കോട്ടഹിരി എന്ന ഗ്രാമത്തിൽ നിന്നും വെള്ളിത്തിരയിലെത്തുന്ന ആദ്യനായികയാണ് സായി പല്ലവി.

സിനിമാ നടി എന്നതിലുപരിയായി സായി പല്ലവി ഒരു പ്രൊഫഷണൽ ഡോക്ടറാണ്. ഒരു കാർഡിയോളജിസ്റ്റ് ആകാനാണ് സായി ആഗ്രഹിച്ചത്. ജോർജിയയിലെ ടിബിലിസിയിൽ നിന്ന് എംബിബിഎസ് ബിരുദധാരിയാണ് നടി.

നൃത്തം ഏറെ ഇഷ്ടപ്പെടുന്ന സായി പല്ലവി ഇതുവരെ നൃത്തം പഠിച്ചിട്ടില്ല എന്നതാണ് കൗതുകകരം. ബോളിവുഡ് നടി ഐശ്വര്യ റായിയുടെയും മാധുരി ദീക്ഷിതിന്റെയും ഡാൻസ് വീഡിയോകൾ അവർ മാത്രമാണ് കണ്ടിരുന്നത്. നൃത്തം പഠിച്ചത് ഇതുവഴി മാത്രമാണ്. ഐശ്വര്യ റായിയുടെയും മാധുരി ദീക്ഷിതിന്റെയും കടുത്ത ആരാധിക കൂടിയാണ് താരം.

തന്റെ ലുക്കിൽ താൻ ഒരിക്കലും വിശ്വസിച്ചിരുന്നില്ലെന്നും പ്രേമത്തിന് വേണ്ടി തന്നെ സമീപിച്ചപ്പോൾ തന്റെ മുഖത്തെ കുറിച്ച് വളരെ പരിഭ്രമം തോന്നിയെന്നും സായി പല്ലവി ഒരു അഭിമുഖത്തിൽ പറഞ്ഞിരുന്നു. എന്നിരുന്നാലും, അൽഫോൺസ് പുത്രൻ താരത്തിന് ആത്മവിശ്വാസം നൽകി..

2017ൽ ഫിദ എന്ന തെലുങ്ക് ചിത്രത്തിൽ ഭാനുമതിയായും സായി പല്ലവി തിളങ്ങി. ഫിലിം കംപാനിയൻ ഈ ദശാബ്ദത്തിലെ ഏറ്റവും മികച്ച 100 അഭിനയ പ്രകടനങ്ങളിലൊന്നായി ഈ ചിത്രത്തിലെ സായി പല്ലവിയുടെ പ്രകടനത്തെ തെരഞ്ഞെടുത്തിരുന്നു. എ എൽ വിജയ് സംവിധാനം ചെയ്ത ദിയ ആയിരുന്നു അടുത്ത സിനിമ.

ധനുഷിന്റെ നായികയായി മാരി 2ൽ സായി പല്ലവി എത്തി. ഈ സിനിമയിലെ റൗഡി ബേബി ദക്ഷിണേന്ത്യയിൽ ഏറ്റവും അധികംപേർ കണ്ട വീഡിയോ ഗാനമായി റെക്കോർഡിട്ടു. 2019ൽ ഫഹദ് ഫാസിലിന്റെ നായികയായി അതിരനിലും സായി പല്ലവി പ്രത്യക്ഷപ്പെട്ടു.

വെട്രിമാരൻ സംവിധാനം ചെയ്ത ഒരു നെറ്റ്ഫ്ലിക്‌സ് ആന്തോളജി ഫിലിം സീരീസായ പാവ കഥൈകളിലെ ഊർ ഇരവു എന്ന സിനിമയിലും സായി പല്ലവി അഭിനയിച്ചു. 2021-ൽ നാഗ ചൈതന്യയ്‌ക്കൊപ്പം ലവ് സ്റ്റോറി എന്ന റൊമാന്റിക് സിനിമയിൽ അഭിനയിച്ചു. നാനിയ്‌ക്കൊപ്പം ശ്യാം സിംഗ റോയിയിലും മികച്ച പ്രകടനം നടത്തി.  (Images credit- @Saipallavi instagram)