Kajal Aggarwal| കമൽ ഹാസന്റെ ഇന്ത്യൻ 2 വിൽ നായിക കാജൽ അഗർവാൾ അല്ല; ദീപികയോ കത്രീനയോ വേണമെന്ന് നിർമാതാക്കൾ

വിക്രമിനു ശേഷം ആരാധകർ കാത്തിരിക്കുന്ന കമൽ ഹാസൻ (Kamal Haasan)ചിത്രമാണ് ഇന്ത്യൻ‌ 2 (Indian 2). ശങ്കർ (Shankar)സംവിധാനം ചെയ്യുന്ന ചിത്രം കമൽ ഹാസന്റെ സിനിമാ ജീവിതത്തിലെ ഏറ്റവും മുതൽമുടക്കുള്ള ചിത്രമായാണ് വിശേഷിപ്പിക്കുന്നത്.

1996 ൽ പുറത്തിറങ്ങിയ ഇന്ത്യൻ എന്ന ചിത്രത്തിന്റെ സീക്വൽ ആയാണ് ഇന്ത്യൻ 2 എത്തുന്നത്. കോവിഡിന് മുമ്പേ പ്രഖ്യാപിച്ച ചിത്രം നിരവധി കാരണങ്ങളാൾ ഏറെ നാളായി ചിത്രീകരണം നിർത്തി വെച്ചിരിക്കുകയാണ്.

സിനിമയുടെ സെറ്റിലുണ്ടായ അപകടത്തിൽ ഏതാനും ക്ര്യൂ അംഗങ്ങൾ മരിച്ചത് വലിയ വാർത്തയായിരുന്നു. ചിത്രീകരണത്തിന് ഉപയോഗിച്ച ഹെവി ഡ്യൂട്ടി ക്രെയിൻ തകർന്നുണ്ടായ അപകടത്തിൽ മൂന്ന് പേരാണ് മരിച്ചത്. പത്ത് പേർക്ക് പരിക്കേറ്റിരുന്നു. മരിച്ചവരുടെ കുടുംബത്തിന് കമൽ ഹാസനും ശങ്കറും നിർമാതാക്കളായ ലൈക പ്രൊ‍ഡക്ഷനും ചേർന്ന് ഒരു കോടി രൂപ വീതം നഷ്ടപരിഹാരം നൽകിയിരുന്നു.

കാജൽ അഗർവാളായിരുന്നു ചിത്രത്തിൽ നായികയായി തീരുമാനിച്ചിരുന്നത്. ഇതിനു ശേഷം കോവിഡും പിന്നാലെ ചിത്രീകരണങ്ങളെല്ലാം നിർത്തിവെക്കുകയും ചെയ്തു. ഇതിനിടയിൽ കാജൽ അഗർവാൾ വിവാഹിതയാകുകയും ഒരു കുഞ്ഞ് ജനിക്കുകയും ചെയ്തു.

ഇപ്പോൾ കേൾക്കുന്ന വാർത്തകൾ അനുസരിച്ച് കാജൽ അഗർവാളിന് പകരം മറ്റൊരു നായികയെ പരിഗണിക്കാനാണ് നിർമാതാക്കളുടെ തീരുമാനം എന്നാണ്. ബോളിവുഡ് ഹംഗാമ ഡോട്ട് കോം വാർത്തയനുസരിച്ച് സിനിമയിൽ നിന്ന് അഗർവാളിനെ മാറ്റി കഴിഞ്ഞു. (image: Instagram)

കമൽഹാസന്റ ഏറ്റവും വലിയ ചിത്രമെന്ന പ്രത്യേകതയോടെ പാൻ ഇന്ത്യ റിലീസാണ് നിർമാതാക്കൾ ഇന്ത്യൻ 2 വിന് ലക്ഷ്യമിടുന്നത്. അതിനാൽ കാജൽ അഗർവാളിനേക്കാൾ താരമൂല്യമുള്ള ബോളിവുഡിലെ മുൻനിര നായികമാർ ആരെങ്കിലും വേണമെന്നാണ് നിർമാതാക്കളുടെ ആവശ്യം. (image: Instagram)

ദീപിക പദുകോൺ, കത്രീന കൈഫ് എന്നീ നായികമാരുടെ പേരുകളാണ് നിർമാതാക്കളുടെ മുന്നിലുള്ളത്. നിലവിൽ ദീപിക പദുകോൺ പ്രഭാസിനൊപ്പം തന്റെ ആദ്യ തെന്നിന്ത്യൻ ചിത്രത്തിൽ അഭിനയിക്കുന്നുണ്ട്. വാർത്തകൾ ശരിയാണെങ്കിൽ ദീപികയോ കത്രീനയോ കമൽഹാസന്റെ നായികയായി ഇന്ത്യൻ 2 ൽ എത്തും.