Squid Game| 'വിജയത്തിൽ അഹങ്കരിക്കരുത്'; സ്ക്വിഡ് ഗെയിമിലെ ഇന്ത്യൻ നടനോട് അമ്മ പറഞ്ഞത്

ദക്ഷിണ കൊറിയൻ സീരീസ് സ്ക്വിഡ് ഗെയിമിന്റെ ആവേശത്തിലാണ് സീരീസ് പ്രേമികൾ. സർവകാല റെക്കോർഡുകളും തകർത്താണ് ഈ കൊറിയൻ സീരീസ് നെറ്റ്ഫ്ലിക്സിൽ മുന്നേറുന്നത്.

നെറ്റ്ഫ്ലിക്സ് ചരിത്രത്തിലെ എക്കാലത്തേയും ഹിറ്റായി സ്ക്വിഡ് ഗെയിം ഇതിനകം മാറിക്കഴിഞ്ഞു. 111 മില്യണിലധികം ഉപഭോക്താക്കളാണ് നെറ്റ്ഫ്ലിക്സിൽ ഇതുവരെ സീരീസ് കണ്ടു കഴിഞ്ഞത്. ഇതുവരെയുള്ളതിൽ ഏറ്റവും വലിയ ലോഞ്ചിങ്ങാണ് സ്ക്വിഡ് ഗെയിമിന് ലഭിച്ചതെന്ന് നെറ്റ്ഫ്ലിക്സ് ഔദ്യോഗികമായി അറിയിക്കുകയും ചെയ്തു.

സ്ക്വിഡ് ഗെയിം കണ്ട ഇന്ത്യക്കാരെല്ലാം അതിലെ അലി അബ്ദുൽ എന്ന കഥാപാത്രത്തെ ശ്രദ്ധിച്ചു കാണും. കൊറിയൻ താരങ്ങൾക്കൊപ്പം ആദ്യാവസാനം കട്ടയ്ക്ക് നിന്ന അലിയെ കണ്ടാൽ ഒരു ഇന്ത്യൻ ഛായ തോന്നിയെങ്കിൽ അതിൽ കാര്യമുണ്ട്.

ഇന്ത്യക്കാരനായ അനുപം ത്രിപാഠിയാണ് അലി അബ്ദുൽ എന്ന പാകിസ്ഥാൻ സ്വദേശിയായി സ്ക്വിഡ് ഗെയിമിൽ എത്തിയത്. സ്ക്വിഡ് ഗെയിം അവസാന എപ്പിസോഡും കണ്ടു തീർത്താൽ വേദനയോടെ ഓർക്കുന്ന നിരവധി കഥാപാത്രങ്ങളിൽ ഒരാളാണ് അലിയും.

സ്ക്വിഡ് ഗെയിമിന്റെ ചരിത്ര നേട്ടത്തിന്റെ സന്തോഷത്തിലാണ് മറ്റ് താരങ്ങളെ പോലെ അനുപം ത്രിപാഠിയും. ഇന്റർനെറ്റിലെ പുതിയ സെൻസേഷനാണ് അലി എന്ന അനുപം.

ഉയരങ്ങളിലെത്തുമ്പോഴും തന്റെ അമ്മയുടെ വാക്കുകളാണ് അനുപം ഓർക്കുന്നത്. വിജയത്തിൽ വല്ലാതെ അഹങ്കരിക്കരുത്. കാൽ ഭൂമിയിൽ തന്നെ ഉറച്ച് നിൽക്കണം. എന്നാണ് അനുപമിന്റെ അമ്മയുടെ ഉപദേശം.

ലോകം മുഴുവൻ തന്റെ മകനെ കുറിച്ച് സംസാരിക്കുന്നു എന്നറിഞ്ഞപ്പഴാണ് അനുപമിന്റെ അമ്മയുടെ പ്രതികരണം എന്നതാണ് ശ്രദ്ധേയം. എത്ര ഉയരങ്ങൾ കീഴടക്കിയാലും വന്ന വഴി മറക്കരുതെന്നും അഹങ്കരിക്കരുതെന്നും മകനെ ഉപദേശിക്കുകയാണ് ഈ അമ്മ.

തന്റെ വിജയത്തിൽ ലോകത്ത് ഏറ്റവും സന്തോഷിക്കുന്നത് അമ്മയാണെന്നാണ് അനുപം പറയുന്നത്.

സ്ക്വിഡ് ഗെയിമിൽ പ്ലേയർ 199 ആയിരുന്നു അനുപം. ഷോയിലെ പ്രധാന ആകർഷണങ്ങളിൽ ഒന്നും നിഷ്കളങ്കനായ അലി അബ്ദുൽ തന്നെ. ഇൻസ്റ്റഗ്രാമിൽ വെറും മൂവായിരം മാത്രമുണ്ടായിരുന്ന അനുപം ത്രിപാഠിയുടെ ഫോളോവേഴ്സിന്റെ എണ്ണം ഇന്ന് മൂന്ന് മില്യണിലധികമാണ്.

സീരീസ് പുറത്തിറങ്ങിയ സെപ്റ്റംബർ 17 വരെ തന്നെ അറിയുന്നവർ മൂവായിരം പേരായിരുന്നു. സീരീസ് പുറത്തിറങ്ങിയതിന് ശേഷം നിർത്താതെ തനിക്ക് സന്ദേശങ്ങൾ വന്നുകൊണ്ടിരിക്കുകയാണെന്നും അനുപം പറയുന്നു.

പതിനൊന്ന് വർഷമായി കൊറിയയിലാണ് അനുപം ത്രിപാഠി. പഠനവും ജോലിയും ഒന്നിച്ചു കൊണ്ടുപോകുന്നു. ന്യൂഡൽഹിയിലാണ് അനുപം ജനിച്ചു വളർന്നത്. അമ്മ ഇപ്പോഴും ഡൽഹിയിലാണ് താമസിക്കുന്നത്.