Bigg Boss Malayalam | കൃഷ്ണകുമാർ കുടുംബത്തിൽ നിന്നും ഒരാൾ ബിഗ് ബോസിൽ എത്തുമെന്ന പ്രചരണം; വാസ്തവമിതാണ്

കോവിഡ് പ്രതിസന്ധിയും ലോക്ക്ഡൗണും ഉണ്ടായ ശേഷം പ്രേക്ഷകർ ഏറ്റവുമധികം ശ്രദ്ധിക്കാൻ തുടങ്ങിയവരാണ് നടൻ കൃഷ്ണകുമാറും കുടുംബവും. സിനിമാ മേഖല പ്രതിസന്ധിയിൽ ആയ ആ വേളയിൽ സോഷ്യൽ മീഡിയയിൽ സജീവമായി തങ്ങളുടെ സമയം രസകരമായി വിനിയോഗിച്ചാണ് ഈ കുടുംബം ശ്രദ്ധ നേടിയത്

അതിനോടകം ഈ വീട്ടിലെ പുതിയ തലമുറയിലെ രണ്ടു പേര് സിനിമയിൽ മുഖം കാണിച്ചു കഴിഞ്ഞിരുന്നു; മൂത്ത മകൾ അഹാനയും ഇളയ മകൾ ഹൻസികയും. മൂന്നാമത്തെയാൾ ഇഷാനിയുടെ ആദ്യ സിനിമ 'വൺ' ഷൂട്ടിംഗ് തുടങ്ങി റിലീസ് ചെയ്യും എന്ന നിലയിൽ എത്തിയപ്പോഴാണ് പ്രതിസന്ധി ഘട്ടം രൂക്ഷമായി എങ്ങും അടച്ചുപൂട്ടലുകൾ ഉണ്ടായത്

ഇപ്പോൾ ബിഗ് ബോസ് മൂന്നാം സീസൺ മലയാളത്തിൽ തുടങ്ങുന്നു എന്ന് വാർത്ത വന്നതിനു പിന്നാലെ, കൃഷ്ണകുമാർ കുടുംബം അതുമായി ബന്ധപ്പെട്ട് ചർച്ചകളിൽ ഇടം നേടിത്തുടങ്ങി. ഈ വീട്ടിലെ രണ്ടുപേർ ബിഗ് ബോസ് വീട്ടിൽ എത്തുന്നു എന്ന തരത്തിൽ ആണ് സോഷ്യൽ മീഡിയ ചർച്ച പൊടിപൊടിച്ചത്

നേരത്തെ നടിയും ഗായികയുമായ റിമി ടോമി ബിഗ് ബോസിൽ എത്തും എന്ന് വാർത്ത ഉണ്ടായെങ്കിലും റിമി അത് നിഷേധിച്ച് രംഗത്തു വരികയായിരുന്നു. ഒരു ഇൻസ്റ്റഗ്രാം പോസ്റ്റിൽ രൂക്ഷമായി പ്രതികരിച്ച റിമി പിന്നീട് ആ പോസ്റ്റ് പിൻവലിച്ചു. ഈ കുടുംബത്തിലെ അംഗവും പ്രതികരിക്കുകയാണ്

സുഹൃത്തിന്റെ വീട്ടിൽ പിറന്നാൾ ആഘോഷിക്കാൻ എത്തിയപ്പോൾ പോലും ചോദ്യം ഉണ്ടായ സാഹചര്യത്തിലാണ് രണ്ടാമത്തെ മകൾ ദിയ കൃഷ്ണ യൂട്യൂബ് വീഡിയോ വഴി വിശദീകരണം നൽകിയത്. ദിയയും ഇളയ സഹോദരി ഇഷാനിയും ബിഗ് ബോസിൽ പങ്കെടുക്കുന്നു എന്നാണ് സോഷ്യൽ മീഡിയയിൽ വന്ന വാർത്ത

പക്ഷെ ദിയയോ ഇഷാനിയോ ബിഗ് ബോസിൽ ഉണ്ടാവില്ല. തങ്ങളുടെ ദൈനം ദിന കാര്യങ്ങളുമായി സജീവമായ സ്ഥിതിക്ക് ഇതിനായി ചിലവഴിക്കാൻ സമയമില്ല എന്ന് ദിയ വ്യക്തമാക്കുന്നു. സിനിമ അല്ലെങ്കിലും സോഷ്യൽ മീഡിയ ഇൻഫ്ലുവെൻസർമാരായും പ്രോഡക്റ്റ് പ്രൊമോട്ടർമാരായും ഇവർ തിരക്കിലാണ്

അഹാന കൃഷ്ണയുടേതായി രണ്ടു ചിത്രങ്ങളാണുള്ളത്. അടി, നാൻസി റാണി തുടങ്ങിയ ചിത്രങ്ങളിലാണ് അഹാന വേഷമിടുന്നത്. ഇതിൽ ദുൽഖർ നിർമ്മിക്കുന്ന 'അടി' ചിത്രീകരണം പൂർത്തിയാക്കി

ഇവരുടെ അച്ഛൻ കൃഷ്ണകുമാർ സീരിയൽ ഷൂട്ടിങ്ങുമായി തിരക്കിലുമാണ്