'പ്രളയം സ്റ്റാര്‍ എന്ന് വിളിക്കുന്നതിന് എന്ത് തെറ്റാണ് ചെയ്തത്? ട്രോളുകൾ പരിധി കടന്നപ്പോള്‍ വേദന തോന്നി'; ടൊവിനോ തോമസ്

2018ലെ പ്രളയസമയത്തെ ഇടപെടലുകള്‍ക്ക് ശേഷം തന്നെ പ്രളയം സ്റ്റാർ എന്നു വിളിച്ചത് വേദനിപ്പിച്ചെന്ന് നടന്‍ ടൊവിനോ തോമസ്. 2018 എന്ന സിനിമയുടെ പ്രമോഷന്റെ ഭാഗമായി നടന്ന വാര്‍ത്താസമ്മേളനത്തില്‍ സംസാരിക്കുകയായിരുന്നു ടൊവിനോ. പ്രളയസമയത്ത് ടൊവിനോ ചെയ്തത് പി.ആര്‍. വര്‍ക്കാണെന്നായിരുന്നു പലരുടെയും വിമര്‍ശനം ഉയർന്നിരുന്നു.

ചാവാന്‍ നില്‍ക്കുന്ന നേരത്ത്‌ പി.ആര്‍നെ പറ്റി ചിന്തിക്കാനുള്ള ദീര്‍ഘവീക്ഷണമോ ബുദ്ധിയോ എനിക്കില്ലായിരുന്നെന്ന് ടൊവിനോ പറഞ്ഞു. . ആ സമയത്ത് ഞാന്‍ ചെയ്ത കാര്യങ്ങള്‍ ആരെയെങ്കിലും വേദനിപ്പിച്ചുവെന്നോ എന്ന് എനിക്കറിയില്ല.

ജനിച്ചുവളര്‍ന്ന സ്ഥലത്താണ് പ്രളയ സമയത്ത് ഞാനിറങ്ങി പ്രവര്‍ത്തിച്ചത്. പ്രളയം വന്ന സമയത്ത് എന്നെ പ്രളയം സ്റ്റാര്‍ എന്ന് വിളിക്കുന്നതിന് ഞാന്‍ എന്ത് തെറ്റാണ് ചെയ്ചതെന്ന് ടൊവിനോ ചോദിച്ചു.

ട്രോളുകളും വിമര്‍ശനങ്ങളും പരിധി കടന്നപ്പോള്‍ വേദന തോന്നിയെന്നും ഒരിക്കലും പ്രതീക്ഷിക്കാത്ത ആക്ഷേപങ്ങളാണ് ഉയര്‍ന്നതെന്നും താരം പറഞ്ഞു. ആദ്യമൊക്കെ തമാശകള്‍ ആസ്വദിച്ചു. പിന്നെ വിഷമം തോന്നി. അതിന് ശേഷം ഞാന്‍ കാര്യമായി പുറത്തിറങ്ങിയില്ലെന്ന് ടൊവിനോ പറയുന്നു.

പ്രളയം' സിനിമയിലേക്ക് ജൂഡ് ആന്റണി ജോസഫ് വിളിച്ചപ്പോഴും വരാന്‍ തയ്യാറായിരുന്നില്ല. പിന്നീട് ഈ സിനിമയുടെ സാധ്യത മനസിലാക്കിയ ശേഷമാണ് അഭിനയിക്കാന്‍ തീരുമാനിച്ചതെന്ന് ടൊവിനോ വ്യക്തമാക്കി.