പുരുഷൻമാരുടെ അടിവസ്ത്രത്തിന്‍റെ ആദ്യ വനിതാ ബ്രാൻഡ് അംബാസഡറായി ജാക്വിലിൻ ഫെർണാണ്ടസ്

ന്യൂഡൽഹി: രാജ്യത്തെ പരസ്യവിപണിയിൽ പുതു ചരിത്രമെഴുതി ബോളിവുഡ് താരം ജാക്വിലിൻ ഫെർണാണ്ടസ്. ഇതാദ്യമായി പുരുഷൻമാരുടെ അടിവസ്ത്ര ബ്രാൻഡിന്‍റെ അംബാസിഡറായി മാറിയിരിക്കുകയാണ് അവർ. പുരുഷൻമാരുടെ അടിവസ്ത്ര ബ്രാൻഡിന്‍റെ അംബാസഡറായി ജാക്വിലിൻ ഫെർണാണ്ടസ് വരുമെന്ന വാർത്ത നേരത്തെ പുറത്തുവന്നിരുന്നു. എന്നാൽ ഇതനുസരിച്ചുള്ള ആദ്യ ടിവി പരസ്യം ഇന്ന് ജാക്വിലിൻ ഫെർണാണ്ടസ് അവരുടെ ഇൻസ്റ്റാഗ്രാമിലൂടെ പുറത്തുവിട്ടു.

ഇത്തരമൊരു പരസ്യത്തിലൂടെ ബ്രാൻഡിന്റെ ചരിത്രപരമായ കാമ്പെയ്‌നിന്റെ ഭാഗമായതിലുള്ള ആവേശം ജാക്വിലിൻ ഫെർണാണ്ടസ് മറച്ചുവെച്ചില്ല, “എന്തൊരു അത്ഭുതകരമായ അനുഭവമാണ് ഗൗരി ഷിൻഡെ സംവിധാനം ചെയ്ത ഈ പരസ്യം"

ചാരനിറത്തിലുള്ള ഷോർട്ട്‌സ് ധരിച്ച് അതീവ ഗ്ലാമറായാണ് ജാക്വിലിൻ ഈ പരസ്യത്തിൽ പ്രത്യക്ഷപ്പെടുന്നത്. പുരുഷൻമാരുടെ ഇന്നർവെയർ വിൽക്കാൻ ആഗ്രഹിക്കുന്നവർക്ക് ബോളിവുഡിലെ ഗ്ലാമർ താരങ്ങളിൽ ഒരാളായ ജാക്വിലിൻ ഫെർണാണ്ടസിനേക്കാൾ മികച്ച മറ്റൊരു ഓപ്ഷൻ ഉണ്ടാകില്ലെന്നാണ് സോഷ്യൽ മീഡിയയിൽ ആരാധകരുടെ പ്രതികരണം.

നടിയെ ഈ കാമ്പെയ്‌നിന്റെ ഭാഗമാക്കിയതിന് ആരാധകർ അഭിനന്ദിച്ചു, “സിനിമ ഇൻഡസ്‌ട്രിയിൽ നിങ്ങളേക്കാൾ മികച്ചവരായി ആരുമില്ല, നിങ്ങൾ ഏറ്റവും സുന്ദരിയുമാണ്”, “നിങ്ങൾ ചെയ്യുന്നതിൽ എനിക്ക് വളരെ സന്തോഷം തോന്നുന്നു”- എന്നിങ്ങനെ പോകുന്നു ജാക്വിലിന്‍റെ പുതിയ പരസ്യത്തെക്കുറിച്ചുള്ള പ്രതികരണങ്ങൾ.

പുരുഷൻമാരുടെ അടിവസ്ത്ര പരസ്യങ്ങളിൽ ഇതുവരെ പ്രത്യക്ഷപ്പെട്ട ഏതൊരു സ്ത്രീയേക്കാളും ഏറെ മികച്ച് നിൽക്കുന്നത് ജാക്വിലിൻ തന്നെയാണെന്ന് മറ്റൊരാൾ അഭിപ്രായപ്പെടുന്നത്. പരസ്യം പുറത്തുവിട്ടുകൊണ്ടുള്ള പോസ്റ്റിന് മികച്ച പ്രതികരണമാണ് ലഭിക്കുന്നത്. ഇതിനോടകം ആയിരകണക്കിന് ആളുകൾ ഈ പരസ്യം പങ്കുവെക്കുകയും ലൈക് ചെയ്യുകയും ചെയ്തിട്ടുണ്ട്.

അടുത്തിടെ ജാക്വിലിൻ അഭിനയിച്ച ഹോളിവുഡ് ചിത്രമായ 'ടെൽ ഇറ്റ് ലൈക്ക് എ വുമൺ' എന്നതിലെ 'അപ്ലാസ്' എന്ന ഗാനം ഓസ്കാർ പുരസ്ക്കാരത്തിനായി നാമനിർദ്ദേശം ചെയ്യപ്പെട്ടു. വിദ്യുത് ജംവാൾ, സോനു സൂദ് എന്നിവരുടേത് ഉൾപ്പടെ കൈനിറയെ ചിത്രങ്ങളുമായാണ് ജാക്വിലിൻ ഫെർണാണ്ടസ് മുന്നോട്ടുപോകുന്നത്.