Isha Alya Death: 'കവര്‍ച്ചക്കാരുടെ' വെടിയേറ്റ് നടി ഇഷ ആല്യ കൊല്ലപ്പെട്ട സംഭവത്തിൽ ട്വിസ്റ്റ്; ഭർത്താവ് അറസ്റ്റിൽ

റാഞ്ചി: ജാർഖണ്ഡില്‍ നിന്നുള്ള നടി ഇഷ ആല്യ (റിയ കുമാരി) കവര്‍ച്ചക്കാരുടെ വെടിയേറ്റ് കൊല്ലപ്പെട്ട സംഭവത്തിൽ വമ്പൻ ട്വിസ്റ്റ്. കുടുംബത്തിന്റെ പരാതിയിൽ ഭർത്താവ് പ്രകാശ് കുമാറിനെ പൊലീസ് അറസ്റ്റ് ചെയ്തു. 

ബുധനാഴ്ച പുലര്‍ച്ചെ റാഞ്ചിയില്‍ നിന്നും കൊല്‍ക്കത്തയിലേക്ക് സഞ്ചരിക്കുകയായിരുന്ന നടിയെ ഹൗറ ഹൈവേയില്‍ വെച്ച് കവർച്ചക്കാർ വെടിവെച്ചുകൊന്നുവെന്നായിരുന്നു  ആദ്യ റിപ്പോർട്ട്, ഭർത്താവ് പ്രകാശ് കുമാറിന്റെയും മൂന്ന് വയസുമാത്രം പ്രായമായ കുഞ്ഞിന്റെയും മുന്നിൽവെച്ചായിരുന്നു ആക്രമണമെന്നും മാധ്യമങ്ങൾ റിപ്പോർട്ട് ചെയ്തിരുന്നു.

ഭർത്താവ് പ്രകാശ് കുമാറും സഹോദരനും നിരന്തരം പീഡിപ്പിച്ചിരുന്നുവെന്നും കൊലപ്പെടുത്തുമെന്ന് ഭീഷണിപ്പെടുത്തിയിരുന്നുവെന്നും നടിയുടെ കുടുംബം പൊലീസിൽ നല്‍കിയ പരാതിയിൽ പറയുന്നു.

 ബുധനാഴ്ച വൈകുന്നേരത്തോടെയാണ് ഇഷയുടെ ബന്ധുക്കൾ ഹൗറയിലെത്തി പൊലീസിൽ പരാതി നല്‍കിയത്. പ്രകാശ് കുമാറിന്റെ രണ്ടാം ഭാര്യയാണ് ഇഷ ആല്യ. ആദ്യ ഭാര്യക്കെതിരെയും പരാതിയിൽ നടിയുടെ കുടുംബം ആരോപണം ഉന്നയിക്കുന്നു.

വെടിയുണ്ടയുടെ ഷെല്ലുകൾ വാഹനത്തിനുള്ളിൽ നിന്നുതന്നെ കണ്ടെത്തിയതോടെ കൊലപാതകത്തിൽ പൊലീസിന്റെ സംശയമുന പ്രകാശ് കുമാറിലേക്ക് നീണ്ടിരുന്നു. പ്രാഥമിക പോസ്റ്റ്മോർട്ടം റിപ്പോർട്ടിൽ നടിക്ക് വെടിയേറ്റത് പോയിന്റെ ബ്ലാങ്കിൽ നിന്നാണെന്നു കണ്ടെത്തിയിരുന്നു.

ബുധനാഴ്ച രാവിലെ ആറുമണിക്ക് ഒരു സ്ഥലത്ത് താൻ മൂത്രമൊഴിക്കാന്‍ വണ്ടി നിര്‍ത്തിയപ്പോഴാണ് മൂന്ന് കവര്‍ച്ചക്കാര്‍ ഇവരുടെ വാഹനം വളഞ്ഞതെന്നും ഇവരെ എതിര്‍ക്കാന്‍ ഇഷ ആലിയ ശ്രമിച്ചപ്പോഴാണ് നടിയെ കവര്‍ച്ചക്കാര്‍ നടിയെ പോയന്‍റ് ബ്ലാങ്കില്‍ വെടിവച്ചു കൊന്നത് എന്നുമാണ് പ്രകാശ് പൊലീസിനോട് ആദ്യം പറഞ്ഞത്. പ്രകാശിനെ സംഭവ സ്ഥലത്ത് എത്തിച്ച് സംഭവം പുനരാവിഷ്കരിച്ച് പൊലീസ് സംഭവത്തില്‍ വ്യക്തത തേടിയിരുന്നു.

ജാർഖണ്ഡില്‍ അറിയപ്പെടുന്ന നടിയാണ് ഇഷ ആല്യ, ഇവരെ സിനിമയില്‍ എത്തിച്ച സംവിധായകന്‍ കൂടിയാണ് ഇവരുടെ ഭര്‍ത്താവായ പ്രകാശ് കുമാര്‍. യഥാർത്ഥ പേര് റിയ കുമാരി എന്നാണ്. ഷോപ്പിംഗ് നടത്താനാണ് ഇവർ കൊൽക്കത്തയിലേക്ക് പോയത്.