John Abraham| '299 രൂപയ്ക്ക് എന്നെ കിട്ടില്ല'; OTT പ്ലാറ്റ് ഫോമിൽ അഭിനയിക്കില്ലെന്ന് ജോൺ എബ്രഹാം

ചെറിയ ഇടവേളയ്ക്കു ശേഷം സിനിമാ ലോകത്ത് വീണ്ടും സജീവമാകാനൊരുങ്ങുകയാണ് ബോളിവുഡ് താരം ജോൺ എബ്രഹാം(John Abraham). ജോൺ അഭിനയിച്ച 'ഏക് വില്ലൻ റിട്ടേൺ' (Ek Villain Returns)തിയേറ്ററുകളിൽ പുറത്തിറങ്ങാനിരിക്കുകയാണ്.

ചിത്രത്തിന്റെ പ്രമോഷന് നൽകിയ അഭിമുഖത്തിലാണ് ജോൺ എബ്രഹാം ഒടിടി പ്ലാറ്റ് ഫോമുകളെ കുറിച്ചും തിയേറ്ററുകളെ കുറിച്ചുമുള്ള തന്റെ നിലപാട് വ്യക്തമാക്കിയത്.

നിർമാതാവെന്ന നിലയിൽ ഒടിട‌ിയെ പിന്തുണക്കുന്നുവെങ്കിലും നടൻ എന്ന നിലയിൽ തന്റെ സിനിമകൾ തിയേറ്ററിൽ പുറത്തിറങ്ങാനാണ് ആഗ്രഹമെന്ന് ജോൺ എബ്രഹാം തുറന്നു പറയുന്നു.

തന്നെ ബിഗ് സ്ക്രീൻ ഹീറോ എന്ന നിലയിലാണ് സ്വയം കാണുന്നതെന്നും ജോൺ എബ്രഹാം. ബോളിവുഡിലെ പ്രമുഖ താരങ്ങളും നിർമാതാക്കളും സംവിധായകരുമെല്ലാം ഒടിടി സാധ്യതകൾ മുന്നിൽ കണ്ട് സിനിമകളിലും സീരീസുകളിലും സജീവമാകുമ്പോഴാണ് ജോൺ എബ്രഹാമിന്റെ പരാമർശം. ‌‌

ഇടൈംസിന് നൽകിയ അഭിമുഖത്തിലാണ് ജോൺ എബ്രഹാം ഒടിടിയെ കുറിച്ചുള്ള തന്റെ നിലപാട് വ്യക്തമാക്കിയത്. താനൊരു ബിഗ് സ്ക്രീൻ ഹീറോ ആണെന്നും അങ്ങനെയാണ് തന്നെ കാണാൻ ആഗ്രഹിക്കുന്നതും ജോൺ.

ബിഗ് സ്ക്രീൻ റിലീസിനുള്ള ചിത്രങ്ങളിൽ അഭിനയിക്കാനാണ് തന്റെ ആഗ്രഹം. തന്റെ സിനിമക കാണുന്നതിനിടയിൽ ആളുകൾ ടാബ്ലറ്റ് ഓഫ് ചെയ്ത് വാഷ് റൂമിലും മറ്റും പോകുന്നത് ഇഷ്ടപ്പെടുന്നില്ല. മാത്രമല്ല, 299 രൂപയ്ക്കും 499 രൂപയ്ക്കും ലഭിക്കുന്ന ആളാകാനും തനിക്ക് താത്പര്യമില്ല. അതിൽ തനിക്ക് പ്രശ്നമുണ്ട്.

ഒടിടിയെ കുറിച്ചുള്ള ജോൺ എബ്രഹാമിന്റെ പരാമർശത്തിനെതിരെ രൂക്ഷമായാണ് നെറ്റിസൺസ് പ്രതികരിച്ചത്. ഇനി ജോൺ എബ്രഹാമിന്റെ സിനിമ തിയേറ്ററിൽ കാണാൻ പോയാൽ അദ്ദേഹത്തിന് ഒഴിച്ചു കൂടാനാകാത്ത ഷർട്ട് ഊരിമാറ്റുന്ന സീൻ എത്തുമ്പോൾ താൻ മൂത്രമൊഴിക്കാൻ പോകും എന്നാണ് ട്വിറ്ററിൽ ഒരാൾ പ്രതികരിച്ചത്.

ഒടിടി ആയാലും തിയേറ്റർ ആയാലും ജോൺ എബ്രഹാമിന്റെ അഭിനയം കാണാൻ ആരും ആഗ്രഹിക്കുന്നില്ലെന്നാണ് മറ്റൊരു പ്രതികരണം.

അറ്റാക്ക് പർട്ട് 1 ആണ് ജോൺ എബ്രഹാമിന്റെ ഏറ്റവും ഒടുവിൽ ഇറങ്ങിയ ചിത്രം. സിനിമ പ്രേക്ഷകരെ തൃപ്തിപ്പെടുത്തുന്നതിലും തിയേറ്ററിലും പരാജയമായിരുന്നു.